-ХҮДЭР СУМААС ШИЛЖҮҮЛЭН СУУЛГАХААР АЧИЖ ЯВСАН 2050 МОДНЫ 1470 НЬ ХААЧСАН БЭ-

 Эргэлт.мн мэдээллийн сайт уулын модыг шилжүүлэн суулгах нэрийдлээр мөнгө угааж, ашиг олж, байгаль сүйтгэж, байгал орчны эсрэг ноцтой гэмт хэрэг үйлдэж байгаа талаар цуврал сурвалжилга бэлтгэж байгаа билээ. Сэлэнгэ аймгийн Хүдэр сумаас шилжүүлэн суулгахаар авч явсан 2050 ширхэг модыг хаана суулгаж, аль газар хүлээж авсан талаар сурвалжиллаа.

          Бид өмнөх дугаартаа уулын модыг нэг ширхгийг нь 37-39 мянган төгрөгөөр худалдаж аваад, нийслэлийн ногоон байгууламжид 380-600 мянган төгрөгөөр нийлүүлж, их хэмжээний мөнгө угааж байгаа талаар ноцтой баримтыг хүргэсэн. Тухайлбал, “Энх ногоон газар” ХХК нь Хүдэр сумаас 500 ширхэг нарс мод шилжүүлэн суулгаж авсан байдаг. Ингэхдээ 1.5-2 метр өндөртэй мод 300 ширхэг, 3-4 метрийн өндөртэй нарс 200 ширхгийг авах зөвшөөрөл авсан байгаа юм. Зөвшөөрөл олгох тухай бичигт бичигдсэнээр “Энх ногоон газар” ХХК нь 500 ширхэг модыг 19.640.000 төгрөг төлсөн. Эдийн засгийн үнэлгээгээр тус компани нь 86.086.000 төгрөгийг тушааж модоо авах эрхтэй болох байсан. Гэтэл 500 ширхэг модыг 19.640.000 төгрөг буюу нэг модыг дунджаар 39 мянган төгрөгөөр бодож авсан нь анхаарал татаж байгаа юм.

Мөн “Тод газар” ХХК нийслэлийн ногоон байгууламжинд зориулж, 1000 ширхэг нарс мод сугалж авч явсан. Гэхдээ хэдэн төгрөгөөр авсан бэ гэдэг нь тодорхойгүй. Энэ бүхэнд хариулт хайлаа.

Д.СҮХБАТ: 580 ШИРХЭГ НАРС МОД ШИЛЖҮҮЛЭН СУУЛГАСАН

            Улаанбаатар хотын Захирагчийн ажлын албаны Ногоон байгууламжийн бодлогын асуудал хариуцсан мэргэжилтэн, доктор Д.Сүхбат “Улаанбаатар хотод жилд дунджаар 250-350 мянган ширхэг 16 төрөл зүйлийн мод, бут тарьдаг. Тарьсан ногоон байгууламжийн 90 хувь нь шилэн навчит, 10 хувьд нь шилмүүст төрлийн мод тарьдаг гэж ойлгож болно. Нийт тарилтын 80 орчим хувь нь хаврын тарилтаар явагддаг. Энэ жилийн хувьд 580  ширхэг нарс мод шилжүүлэн суулгасан байгаа. Нэг ширхэг нарс модыг 380 мянган төгрөгөөг худалдаж авсан. Мод шилжүүлэн суулгах ажлыг “Тод газар” ХХК хариуцаж ажилласан. Ганцхан тендер зарласан юм. Захирагчийн ажлын албанаас жил бүр тарьц суулгацын зах үнийн судалгаа гэж жил бүр гаргадаг. Орон нутгийн удирдах байгууллага жилд хэчнээн ширхэг мод бэлтгэх, гаргах, нийлүүлэх гэдгээ ИТХ-аараа баталж гаргадаг. Сэлэнэ аймгийн гаргасан шийдвэрийг би мэдэхгүй. Зөвхөн нийслэлд мод шилжүүлэн суулгадаггүй” гэлээ.

          Албаны хүний хэлж буйгаар энэ жилийн хэмжээнд 580 ширхэг мод шилжүүлэн суулгасан гэнэ. Ингэхдээ нэг модыг нь 380 мянгаар авч, нийт 220.400.000 төгрөгөөр худалдан авчээ. Шилжүүлэн суулгасан модны 280 ширхгийг нь Хан-УУл дүүргийн 11 дүгээр хороо, Зайсан, Бурхантай хөшөөний цэцэрлэгт суулгасан аж. Харин 1470 мод нь хаачсан бэ.

Бид энэ талаар Сэлэнгэ аймгийн Хүдэр сумаас мод шилжүүлэн суулгах зөвшөөрөл авсан таван компанитай холбогдож, тодруулах гэсэн боловч мэдээлэл өгөхөөс татгалзлаа.

          “ЭНХ НОГООН ГАЗАР” ХХК нь Хүдэр сумаас 550 ширхэг мод шилжүүлэн суулгахаар авч явсан. Эл компани Захирагчийн ажлын албанд шилжүүлэн суулгасан модоо нийлүүлээгүй. Энэ талаар тодруулахад “Одоогийн байдлаар манай байгууллага мэдээлэл өгөх боломжгүй байна. Бид шилжүүлэн суулгах модоо зохих технологийн дагуу зөөвөрлөсөн. Авсан модныхоо нүхийг бөглөсөн. Нөхөн сэргээлтийн ажил аравдугаар сард үргэлжилж байхад дээрээс “Хэл ам гарлаа. Ажлаа зогсоо” гэх шийдвэр гарч, хөдөлгөөн хийхийг хориглосон. Ийм шийдвэр гарсан учраас нөхөн сэргээлтийн ажил зогссон байсан” гэлээ.

                 Харин “Амьд газар” “Амьд төгөл”, “Тод газар” “Форест докторс” ХХК-ийн холбогдох хүмүүс ажлын байрандаа байхгүй, утас нь унтраастай гэх шалтгаанаар мэдээлэл өгөөгүй юм. Одоогийн байдлаар “Тод газар” ХХК шилжүүлэн суулгахаар ачиж ирсэн 1000 ширхэг модны 580-ыг нь нийслэлд нийлүүлсэн. Бусдыг нь хэрхсэн нь тодорхойгүй байна.

            Эх сурвалжийн бидэнд өгсөн мэдээллээр компаниуд нийслэлийн ногоон байгууламж гэдэг нэрийн дор уулын модыг үнэгүй шахам аваад, Улаанбаатар хотод оруулж, барилгын компани, томоохон хотхонуудад өндөр үнээр зардаг гэнэ. Тэд ингэхдээ нэг ширхэг модыг 400-600 мянган төгрөгөөр дамлаж, нийлүүдэг ажээ. Хүдэр сумаас шилжүүлэн суулгахаар ачиж ирсэн модны 70 орчим хувь нь хувийн хотхоны үүд, ногоон байгууламжид өнгө нэмж, өндөр үнээр зарагдсан гэдгийг хэлж байгаа юм.

Г.ТАЙВАНБААТАР: НЭГ ШИРХЭГ МОДЫГ 37-39 МЯНГАН ТӨГРӨГӨӨР НИЙЛҮҮЛСЭН НЬ ҮНЭН

              Хүдэр сумын Ойн ангийн дарга Г.Тайванбаатараас нөхөн сэргээлтийн ажил хэрхэн хийгдсэн талаар тодрууллаа.

           Тэрбээр “Би мод шилжүүлэн суулгах үеэр байгаагүй. Та бүгдийг сурвалжлаад явсны дараа Экологийн цагдаагийн албанаас ирж, хоёр хоног бөглөөгүй нүх бүрийг тоолж, зургаар баримтжуулаад явсан. Нөхөн сэргээлтийн ажил бүрэн хийгдэж дууссан. Шилжүүлэн суулгах зөвшөөрөл авсан таван компанийн хүмүүсээр нөхөн сэргээлтийн ажлыг хийлгэсэн. Одоо Хүдэр сумын хэмжээнд онгорхой нүх болон нөхөн сэргээлтийн ажил хийгдээгүй талбай байхгүй. Бид ойн зурвас байгуулах ёстой, өтгөрөлттэй ойд мод шилжүүлэн суулгах газар зөөж өгсөн. Яагаад модны зах, малын бэлчээрээс авсныг мэдэхгүй. Сэлэнгэ аймгийн Иргэдийн төлөөлөгчдийн хурлын тогтоол, чиглэл өгсний дагуу бид шилжүүлэн суулгах талбай зааж өгсөн. Нэг ширхэг модыг 37-39 мянган төгрөгөөр олгосон нь үнэн. Аймгийн Байгаль орчин, аялал жуулчлалын газрын даргын гарын үсэгтэй зөвшөөрлийн бичигт хэдэн төгрөгөөр олгох нь нарийн заагдсан байдаг. “Тод газар” ХХК 25 сая төгрөг төлж, модоо авсан баримт нь сумын Татварын байцаагчид байгаа. Улаанбаатар хотын ногоон байгууламжид гэсэн бичгийн дор мод шилжүүлэн суулгадаг болохоор бид хаана хүргэснийг нь мэдэхгүй, хяналт тавих боломжгүй” гэлээ.