Өвөрхангай аймгийн Зүүнбаян-Улаан сумын ерөнхий боловсролын сургуулийн  ахлах ангийн сурагч охин бусдын гарт харамсалтайгаар амиа алдсан ноцтой хэрэг гараад байна. Талийгаач охиныг нутгийн залуу Б гэгч нь үерхэхийг удаа дараа шаардаж, эцэст нь буудаж, амийг нь хөнөөгөөд өөрийгөө хороосон хэргийг Өвөрхангай аймгийн цагдаагийн газар шалгаж байна.

Талийгаач охин бусдын дарамт, шахалтад байгааг ангийн багш, дотуур байрны багш, сургуулийн захирал нь мэдэж байсан ч түүнд туслаагүй, түүнийг хамгаалж, өмгөөлж, сэтгэл зүйн туслалцаа үзүүлээгүй. Үүгээр ч зогсохгүй охиныг элдэв үгээр доромжилж, ангийн багш нь алгадсан, сургуулийн захирал нь утсанд нь ирсэн чат, мессежийг бусдад задруулан, охиныг зүй бусаар тавласан гэх мэдээллийг охины ар гэрийнхэн өгөөд байгаа. Мөн охиныг нь амь эрсдэж, хүйтэн зэвсгийн золиос болчихоод байхад “Охин чинь өөрөө эрэгтэй хүн дагаж явсан. Хэд хоног явж байгаад ирнэ биз” гэх тайлбар өгч, эрлийн ажиллагааг удаашруулсан зэрэг гомдлыг талийгаачийн ар гэрийнхэн бидэнд өгсөн.

           Тэгвэл тус сумын сургуулийн захирал Д.Болдмаа ёс зүйгүй үйлдэл удаа дараа гаргаж, сурагчдаа хохироож байжээ. Энэ тухайн мэдээллийг Зүүнбаян-Улаан сумын иргэд манай редакцид ирүүлснийг уншигч танд хүргэж байна.

СУРГУУЛИЙН ЗАХИРАЛ Д.БОЛДМАА ГЭЖ ХЭН БЭ

Зүүнбаян-Улаан сумын захирал Д.Болдмаа нь тус сумын уугуул иргэн. 2000 оноос тус сургуульд бага ангийн багшаар ажилд оржээ. Тэрбээр бага ангийн багшаар ажиллаж байгаад 2016 оноос сургуулийн захирлаар томилогдсон байна. Ажиллах хугацаандаа тэрбээр Боловсролын тэргүүний ажилтан, Монгол Улсын тэргүүлэх зэргийн багш болж байжээ.

СУРАГЧДЫГ ХИЧЭЭЛДЭЭ ТААРУУ СУРДАГ БОЛ АЙМГААС ИРСЭН ШАЛГАЛТАД ОРУУЛДАГГҮЙ

            Өвөрхангай аймгийн Боловсролын газраас жил бүр ирж, шалгалт хийдэг гэнэ. Энэ үед сургуулийн захирал Д.Болдмаа ангийн багш нарт үүрэг өгч, хичээлдээ муу дүнтэй сурагчдыг шалгалтад оруулдаггүй талаар эх сурвалж мэдээлэв. Тэрбээр сурагчдыг сургуулийн нэр хүндийг гутааж, онооноос хасна гэх шалтгаанаар хичээлд нь суулгадаггүй байжээ. Энэ талаар Зүүнбаян-Улаан сумын иргэн “Манай хүүхэд тухайн үед гуравдугаар ангийн сурагч байсан. Аймгийн Боловсролын газраас шалгалт ирсэн өдөр хүүхдэд маань чөлөө олгоод явуулсан байсан. Багш нь хэлэхдээ “Чамайг шалгалтад оруулахгүй. Чөлөөтэй гээд тооцно. Чи гэртээ байж байгаарай. Сургуулиар ирэх хэрэггүй” гэсэн байна лээ. Миний хүүхэд муу сурдаг байж болно. Гэхдээ багш хүн хичээлээ заах үүрэгтэй биз дээ. Хүүхэдтэйгээ харьцаж, харилцаа үүсгэж байж хүүхэд хичээлээ сурах болов уу гэж боддог. Ангийн багшаас нь асуухаар “Захирлын өгсөн үүрэг даалгавар” гэж хэлдэг юм билээ. Захирал Д.Болдмаа бол өөрийн талын багш нараараа өөрийгөө хамгаалуулж, өөрийнх нь эсрэг дуугарсан багш, ажилтнуудаа байнга ажлаар “дарж” дээрэлхэж, дарамталдаг гэнэ лээ. Энэ тухай сумын хүмүүс ярьдаг ч хүүхдээ сургуульд сургаж байгаа учраас хэл ам хийж чаддаггүй” гэлээ.

СУРАГЧДЫГ ЭЛСЭЛТИЙН ЕРӨНХИЙ ШАЛГАЛТ ӨГӨХ ЭСЭХИЙГ Д.БОЛДМАА ЗАХИРАЛ ШИЙДДЭГ

           Захирал Д.Болдмаа сурагчдыг шалгалтад оруулдаггүйгээс гадна элсэлтийн ерөнхий шалгалт өгөхийг хориглож, олон хүүхдийн ирээдүйг баллаж байсан гэнэ. Д.Болдмаа захирлын даалгавар, чулуу шиг хатуу үгнээс болж тус сургуулийн олон сурагч мэргэжил эзэмших боломжгүй болжээ. Өөрөөр хэлбэл, Д.Болдмаа төгсөх ангийн сурагчдыг дарамталж, элсэлтийн ерөнхий шалгалт өгөх эрхийг нь хасдаг аж. Мөн тэрбээр хүүхдүүдийг хоёроос дээш хичээлээр Элсэлтийн ерөнхий шалгалт өгөхийг л зөвшөөрдөг аж. Дөрвөөс дээш хичээлээр элсэлтийн ерөнхий шалгалт өгөх хүсэлт өгвөл элдэв үгээр загнадаг, дарамталдаг гэнэ.

Энэ талаар мэдээлэл өгсөн иргэдийн яриаг үргэлжлүүлэн хүргэе.

         БАРИМТ:1 “Хүүхдүүдийг элсэлтийн шалгалт өгүүлэхгүй дарамталж, хааж боодог асуудал Д.Болдмаа захирлын үед олон гарч байна. Манай үеэл дүү өнгөрсөн жил ерөнхий боловсролын сургуулиа төгссөн. Төгсөх жил нь сургуулийн захирал Д.Болдмаа дүүг минь өрөөндөө дуудаж, “Чамайг шалгалт өгүүлэхгүй шүү. Энийг хатуу ойлгоорой” гэж хэлсэн байна лээ. Бид тухайн үед захирал багш хүүхдүүдийг байнга шахуу тэгдэг болохоор тоогоогүй. Миний дүүгийн хувьд дуугүй, даруухан хүүхэд учраас захирлын өөдөөс ганц ч үг хэлээгүй байна лээ. Тэгээд хэсэг хугацааны дараа буюу дөрөвдүгээр сард дахин дуудаж, шалгалт өгүүлэхгүй гэж хэлсэн байсан. Бид энэ тухай мэдэж, хэл ам хийсэн боловч шалгалтын бүртгэл дуусаж дүү минь ЭЕШ өгөх боломжгүй болсон. Уг нь дүү минь хичээлдээ муу сурдаггүй дундаж сурдаг. Ингээд захирал багшаас болж инженер болох мөрөөдөл нь талаар өнгөрч, хөдөө сумандаа нэг жил амьдарсан. Энэ жилээс Япон хэлний сургалтад сууж байгаа. Залуу хүүхэд мэргэжил, боловсролгүй яаж насыг барах билээ. Захирлын хувьд сурлага тааруу хүүхдүүд Элсэлтийн ерөнхий шалгалт өгснөөр сургуулийн онооноос доош татна, нэр хүндэд нь сөргөөр нөлөөлнө, багш, захирлын үнэлгээ буурч, цалин урамшуулал нь хасагдана гэдэг шалтгаанаар хүүхдэд ингэж ханддаг юм билээ. Өөрөөр хэлбэл, Өвөрхангай аймгийн Боловсролын газраас 21 сумын сургуулиа жагсаадаг юм билээ л дээ. Энэ жагсаалтад хойгуур байр эзлэх вий гэсэндээ тааруу авч мэднэ гэж бодсон хүүхдүүдийг шалгалт өгүүлдэггүй. Мөн өнгөрсөн жилийн төгсөлтөөс гадна ангийнх нь А гэх хүүхдийг шалгалт өгүүлэхгүй гэсэн байна лээ” гэлээ.

         БАРИМТ:2 “Би Зүүнбаян-Улаан сургуулийн ....оны төгсөлт. Манай анги болон бусад төгсөлтийн сурагчдыг Д.Болдмаа захирал хоёроос дээш хичээлээр ЭЕШ өгүүлэхгүй гэдэг байсан. Хоёроос дээш хичээлээр шалгалт өгөөд муу үнэлгээ авах юм бол сургуулийн оноо, үнэлгээ, нэр хүнд унана гэдэг байсан. Д.Болдмаа багшийг захирал болсноос хойш дөрвөөс дээш хичээлээр шалгалт өгч байсан хүүхэд бараг байхгүй. Өөрийнхөө төрсөн ганц охиныг хүртэл дөрвөн хичээлээр л шалгалт өгөхийг нь зөвшөөрч байсан юм билээ. Хичээлдээ тааруу, дуугүй, ноомой хүүхдүүдийг шалгалт өгүүлэх тун дургүй. Байнга хэл амаар доромжилж, дарамталдаг. Олон хүүхдийн нүдэн дээр “Чи шалгалт өгч яадаг юм. Шалгалт өгөөд чиний ирээдүй сайжрах уу” зэрэг үгийг хүүхдүүдэд хэлж, өөртөө итгэх итгэлийг нь үгүй хийдэг. Энэ талаар нь зарим багш гомдол гаргаж, аймгийн Боловсролын газарт ханддаг юм билээ. Харамсалтай нь, Д.Болдмаа захирал танил талтай учраас өргөдлүүдийг хүчингүй болгож, албан тушаалтайгаа байгаад байдаг” гэв.

ТЭР СУРГУУЛИЙН ЗАХИРАЛ, БАГА АНГИЙН БАГШ, МЭДЭЭЛЭЛ ЗҮЙН БАГШААР АЖИЛЛАЖ, ГУРВАН ДАВХАР ЦАЛИН АВДАГ

Д.Болдмаатай холбоотой гомдол, өргөдөл Өвөрхангай аймгийн Боловсролын газарт удаа дараа ирж байсан учраас 2019 онд арга хэмжээ авч байжээ. Түүнийг ажлаас нь түдгэлзүүлэх саналыг гаргаж, түр орлон гүйцэтгэгчээр томилсон гэнэ. Харин хоёр жилийн хугацаанд захирлын албан тушаалд томилогдох хүн байхгүй гэх шалтгаанаар тэрбээр түр орлон гүйцэтгэгчийнхээ ажлыг өнөөдрийг хүртэл хийсээр байна. Мөн тэрбээр сургуулиас гурван давхар цалин авч байсан зөрчил гаргаж байжээ.

          Энэ талаар нэгэн иргэн “Түр орлон гүйцэтгэгч болохоосоо өмнө буюу захирал байхдаа тэрбээр нэгдүгээр ангийн сурагчдын анги удирдсан багшаар өөрийгөө томилж байсан юм билээ. Түр орлон гүйцэтгэгчийнхээ ажлыг өгсөн ч ажилдаа үлдэнэ гэж тэр тооцоолсон байгаа юм. Мөн энэ хугацаанд Мэдээлэл зүйн хичээлийг хүүхдүүдэд заадаг байсан. Хичээл заасан цалингаа өөр хүний нэр дээр авдаг гэнэ лээ. Энэ мэт зөрчлүүд Д.Болдмаа захиралд байдаг ч түүнд хэн ч хариуцлага тооцож, арга хэмжээ авдаггүй. Түүнчлэн сургуулийн нийгмийн ажилтан нь тогооч мэргэжилтэйгээс гадна хуурамч дипломтой багш, ажилтан манай сургуульд байдаг гэж сонсож байсан” гэв.