Экологийн цагдаагийн албанаас хөдөө орон нутагт үйл ажиллагаа явуулж байгаа уул уурхайн компаниудад хяналт шалгалтын ажлыг хийж байна. Алт олборлож байгаа компаниуд өөрсдийн лицензийн тайлбайгаас өөр газарт олборлолт явуулж хууль зөрчиж байгаа нийтлэг алдаа дутагдал гаргаж байгаа гэнэ. Өөрөөр хэлбэл, хууль бусаар алт олборлох болжээ. Мөн хууль бусаар олборлосон алтаа Монгол банканд тушаалгүй, хилээр гаргаж өндөр үнээр худалдах гэж оролдсон тохиолдол хэд хэдэн удаа бүртгэгдээд байгаа юм. Энэ талаар нэгэн эх сурвалж “ Нэр бүхий арав гаруй компанийн захиралд эрүүгийн хэрэг үүсгэн шалгаж байна. Тэд олборлосон алтаа татвараас нуух гэж оролдсон гэх үндэслэлээр шалгагдаж байна” гэв. Мөн Дархан-Уул аймгийн иргэдээс их хэмжээний алт худалдан авч, БНХАУ-ын хил давуулан худалдаалдаг Б гэгчийг өнгөрсөн есдүгээр сард саатуулжээ. Түүний гэрээс арван килограм алт хураан авч, улсын орлого болгосон байна.