“Боржигон” зочид буудалд тусгаарлагдаж буй иргэн хоолны хордлогод орсон талаар зарим хэвлэл мэдээлжээ. Тодруулбал, есдүгээр сарын 17-нд Турк Улсаас тусгай үүргийн онгоцоор ирсэн иргэн Э хоолны хордлого авчээ. Тэрбээр "Боржигон"  зочид буудлаас орсон байцайтай хуурганаас хордлого авч,  бөөлжих, суулгах шинж тэмдэг илэрч, биеийн байдал нь хүндэрсэн гэнэ. Мөн хордлого авсан иргэний ар гэрээс бөөлжилт, суулгалтын эсрэг эм тусгаарлах байр руу хүргэж өгсөн байна.  Одоогийн байдлаар хордлого авсан иргэн тусгаарлах байрандаа хордлого тайлах эмчилгээ хийлгэж байгаа аж.

Энэ талаар бид ХӨСҮТ-ийн Олон нийттэй харилцах хэлтсээс тодруулахад “Манайд одоогийн байдлаар тийм мэдээлэл ирээгүй. Одоо энэ талаар судалж үзье” гэв. Харин УОК-оос тодруулахад “Эрүүл мэндийн яам, ХӨСҮТ-өөс тодруулаарай. Бид мэдэхгүй” гэлээ.

Харин “Боржигон” зочид буудлын ахлах тогооч Ч.Амарбаяраас тодруулахад “Тухайн өдөр манайх өдөр нь цуйван, оройн хоолонд байцайтай хуурга орсон. Манайх 60 хүний хоол хийж байгаа, одоогийн байдлаар тэр хүнээс өөр хоолны хордлого авсан хүн байхгүй. Шаардлагатай бол эрүүл ахуйн байцаагч болон бусад албаныхан шалгалт хийж болно. Хоолноос хордлого авах ямар ч боломж байхгүй. Цуйвангийн гурилыг жигнээд, болгоод, дараа нь халааж хоолонд нь хийж өгсөн. Би хоолныхоо дээжийг авч хадгалсан байгаа. Хордлого авсан гээд байгаа хүнтэй нь холбогдоход “Өдөр түүхий гурилтай цуйван, орой гүйцэт болоогүй байцайтай хуурга идсэнээс болж хордлого авчихлаа” гэж хэлсэн. Би бүгдийг нь болгосон ямар ч асуудал байхгүй. Харин эмч нар “Цагаан будааны шүүс сайн өг” гэж хэлэхээр нь би хийж өгсөн. Өнөөдөр биеийн байдлыг нь асуухад гүйлгэж, бөөлжихөө больсон гэж хэлсэн” гэв.