Энэ сарын 4-нд Хан-Уул дүүргийн 15 дугаар хороонд байрлах “SM” төрөлжсөн гоо сайхан, эрэгтэйчүүдийн эмнэлэгт хамрын муруй арилгах болон эрэгтэйчүүдийн мэс засалд орсон 39 настай эрэгтэй нас барсан. Талийгаач ямар нэгэн суурь өвчингүй байсан учир мэс засалд орсон гэх. Тэрбээр хоёр төрлийн мэс засалд дараалж орсны улмаас амиа алдахад хүрсэн байж болзошгүй хэмээн үзэж байна. Мөн “SM” эмнэлэг мэс засал хийхдээ стандартын дагуу үйлчилгээ үзүүлсэн эсэх нь эргэлзээтэй байгаа. Тиймээс тус хэргийг Хан-Уул дүүргийн цагдаагийн Нэгдүгээр хэлтэст шалгаж байгаа аж.

           Бид талийгаачийн мэс засал хийлгэсэн “SM” эмнэлэг хэзээ үүссэн, ямар хүмүүс удирдаж ажиллуулдаг, өмнө нь “Тодканнам” нэртэйгээр үйл ажиллагаа явуулж байсан эсэх, тэдгээр эмнэлгийн цаана хэн байдаг талаар сурвалжилсан юм. Хэргийг сануулбал, Хан-Уул дүүргийн 15 дугаар хороонд байрлах “Тод Каннам” арьс гоо заслын эмнэлэгт 2019 оны гуравдугаар сарын 26-нд хэвлийн өөхөө соруулах хагалгаанд орсон эмэгтэй нас барсан. Тухайн үед талийгаачийг Яаралтай түргэн тусламжийн машинаар Улсын нэгдүгээр эмнэлгийн Эрчимт эмчилгээний тасагт хүргэж, эмчилсэн ч удалгүй нас барсан байдаг.

         Тус эмнэлгийг  Хан-Уул дүүргийн Цагдаагийн нэгдүгээр хэлтсийнхэн болон Мэргэжлийн хяналтын байгууллагаас шалгасан аж. Шалгалтын үеэр тус эмнэлэгтэй холбоотой гурван зөрчил илэрсэн байна. Нэгдүгээрт, тусламж үйлчилгээний чиглэлд заагдсанаас өөр ерөнхий мэс заслын тусламж үйлчилгээ үзүүлсэн. Хоёрдугаарт, Баянзүрх дүүргийн II хороонд үйл ажиллагаа явуулах байтал Хан-Уул дүүрэгт үйл ажиллагаа явуулж байсан. Гуравдугаарт, тус эмнэлэг нь гоо сайхны нөхөн сэргээх чиглэлээр тусламж үйлчилгээг арьс эмчилгээний мэргэшсэн гоо сайхны эмчгүйгээр үзүүлж байжээ. Тиймээс Зөрчлийн тухай хуулийн 6.7.1-т зааснаар гурван сая төгрөгөөр торгож, Нийслэлийн Мэргэжлийн хяналтын газрын 2019 оны дөрөвдүгээр сарын 3-ны өдрийн албан бичигт дурдсан дүгнэлтийг үндэслэн “Тод ББ” ХХК-ийн “Тод Каннам” эмнэлгийн тусгай зөвшөөрлийг түдгэлзүүлэхээр шийдвэрлэсэн байдаг. Уг хэрэгт холбогдуулан ХУД-ийн прокурорын газраас тус эмнэлгийг ерөнхий эмч Д.Тодномбат, эмч Б.Мөнгөнчимэг нарт бусдын амь насыг санамсаргүй хөнөөсөн хэмээн яллах дүгнэлт үйлдэн шүүхэд хүргүүлсэн гэдэг.

“SM”, “Тодканнам”  эмнэлгийн эзэн хэн бэ

        “Сайн сайхан медикал” компанийн гүйцэтгэх захирал нь Г.Мөнх-Оргил, хувьцаа эзэмшигч нь “Тод ББ” ХХК болон Хүрэлбаатарын Сайнбилэг нар юм. “Сайн сайхан медикал” компани 2013 оны аравдугаар сарын 28-нд үүсэн байгууллагдахдаа “Хөдөө аж ахуйн түүхий эд, малын бөөний худалдаа”, “Автомашинаар ачаа тээвэрлэх”, “Сэргээгдэх эрчим хүчний чилэлээр зөвлөгөө өгөх” үйл ажиллагааны эрхтэй нээгджээ. Харин 2015 оноос “Эмэгтэйчүүдийн үзлэг, өвчний оношлогоо, эмчилгээ”, “Шүдний холимог үзлэг, оношлогоо, НАСЗ”, “Эмийн худалдаа, эм импорт, экспортлох чиглэлтэй болж өөрчлөгдсөн байна. Мөн 2019 онд рентген оношлогоо хийх эрх авсан байна.

       Харин түүний хувьцаа эзэшигч болох “Тод ББ” компанийн эзэмшигч нь Даваасүрэнгийн Тодбилгүүн, Даваасүрэнгийн Тодномбат, Дашдэндэвийн Оюунцэцэг нар юм. Харин гүйцэтгэх захирлаар нь Даваасүрэнгийн Тодням ажилладаг. Тэгвэл ах, дүүгийн хамтран байгуулсан тус компанийн харьяа “Тод каннам” эмнэлэг нь хуулийн байгууллагад дуудагдсаныхаа дараа нэрээ өөрчилж, зүсээ хувилган “SM” нэртэй төрөлжсөн гоо сайхны мэс заслын үйлчилгээ  үзүүлж байгаа гэх. Үүнтэй холбоотой зарим баримтыг дурдая.

БАРИМТ-1: “Сайн сайхан медикал” ХХК-ийн гүйцэтгэх захирал Галсандоржийн Мөнх-Оргил 2018 онд “Тод каннам” гоо сайхны мэс заслын нэгдсэн эмнэлгийн Anti-Aging залуужуулах эмчилгээний төвийн ерөнхий менежерээр ажилладаг байжээ. Тэрбээр 2019 оны нэгдүгээр сарын 30-нд “PRP эмчилгээ хийлгэснээр арьс залуужиж, гэрэлтэнэ” хэмээх гарчигтай ярилцлага өгсөн байна. Харин өдгөө “SM” эмнэлгийн гүйцэтгэх захирлаар ажиллаж байгаа нь тус хоёр эмнэлэг холбоотой гэдгийг илтгэж байгаа юм. 

БАРИМТ-2: “Тод ББ” компанийн гүйцэтгэх захирал Д.Тодням  2017 оноос Монголын эмнэлэг эрүүл мэндийн менежментийн академийн удирдах зөвлөлийн даргаар ажиллаж байжээ.  Мөн оны арваннэгдүгээр сард үүсэн байгуулагдсан “Эм энд Кэй медикал солиушн” компанийн гүйцэтгэх захирлын алба хашдаг.  Тус компаниас “Тод ББ” болон Byun Sung Kwan гэх Бүгд найрамдах Солонгос Улсын иргэн хувьцаа эзэшдэг байна.

             2009 оны арваннэгдүгээр сараас  “Тод ББ” компанийн гүйцэтгэх захирлаар ажилласан.  Түүний компаниас  төрөл садан болох Д.Тодбилгүүн хувьцаа эзэмшдэг. Мөн “Тод ББ” ХХК-ийн “Тод каннам” эмнэлгийн ерөнхий эмчээр түүний төрөл садан болох Д.Тодномбат ажилладаг байжээ. Д.Тодномбат 2015 оноос “Тод фарм” ХХК байгуулж,  2016 оноос Монголын нөхөн сэргээх, гоо сайхны мэс засалчдын нийгэмлэгийн гишүүнээр элссэн байна. Ийнхүү ах дүү гурав нэгнийгээ дэмжиж хамтран ажилладаг. Харин тэдний эзэмшлийн гоо сайхны эмнэлэгт үйлчлүүлсэн иргэд удаа дараа амиа алдаад буй.

БАРИМТ-3: “Сайн сайхан медикал” компанийн хувьцаа эзэмшигч Хүрэлбаатарын Сайнбилэг “Эс эс медикал” ХХК-ийг 2017 оны дөрөвдүгээр сард “Эмэгтэйчүүдийн үзлэг, өвчний оношлогоо, эмчилгээ”, “Гадаад худалдаа”, “Бизнесийн чиглэлээр зөвлөгөө өгөх үйл ажиллагааны эрх авч байжээ. Тэрбээр Сэлэнгэ аймагт “Хүдэр жугнай” хэмээх нөхөрлөлтэй, Хятадын Чанг нан интернейшнл гэх мах, махан бүтээгдэхүүний үйлдвэрлэл худалдаа, аялал жуулчлалын  компанид хувьцаа эзэмшдэг байна. 

БАРИМТ-4: 2015 онд “Тодканнам” эмнэлгийн цахим хуудаст оруулсан зар мэдээнд 7000-4108 утас байсан бол 2019 оны “SM” гоо сайхны мэс заслын эмнэлгийн зар мэдээлэл дээр мөн 7000-4108 гэх утасны дугаар байсан нь “Тодканнам” гэх эмнэлэг зүсээ хувиргаж “SM” болсон гэдгийг баталж байгаа юм. “SM” гоо сайхны төрөлжсөн эмнэлэг мэс заслын тусламж үйлчилгээ нь чанарын өндөр шаардлагад нийцсэн тул ЭМЯ-наас зургадугаар сарын 21-нд магадлан итгэмжлэгдсэн байна. Иймээс “Тод каннам” эмнэлгийн үйл ажиллагаа зогсоогүй, харин ч өргөжиж, дахин хүний амь  хохироосон байж болзошгүй.