Гудамж талбай, олон нийтийн газар ил задгай бие засаж буй иргэдийн зураг бүхий мэдээлэл олон нийтийн сүлжээнд тархаад байгаа. Тодруулбал, 6801 УАВ улсын дугаартай хар хөх өнгийн “Сай” загварын автомашины жолооч, зорчигч автозам дээр бие засаж байгаа зураг цахим орчинд тархаж, багагүй шүүмжлэл дагуулаад байна.

Энэ талаар бид 6801 УАВ улсын дугаартай хар хөх өнгийн “Сай” загварын автомашины эзэмшигчтэй холбогдож, тодруулахад “Би машинаа өнгөрсөн оны аравдугаар сард зарсан. Машиныг минь авсан хүн, нэр утасны дугаараа өөрийнхөө нэр рүү шилжүүлээгүй бололтой. Хүмүүс намайг олон нийтийн газар бие засаж, гудамж талбай бохирдуулсан мэт бичиж байгаад харамсаж байна. Зурган дээрх хүн бол би болон миний хамаарал бүхий хүн биш гэдгийг албан ёсоор хэлье. Тус зурагтай холбоотойгоор надтай цагдаагийн газраас холбогдож, тодруулсан. Би Амартүвшин гэж хүнд зарсан гэдгээ хэлсэн” гэв.

Зөрчлийн тухайн хуулийн 5.1 дүгээр зүйлд Олон нийтийн газарт зүй бусаар биеэ авч явах талаар:

-Олон нийтийн газар, авто зам, орон сууцны орчны газар, гудамж, талбайд бие зассан, эсхүл нус, цэр, тамхины иш, хог хаясан бол хүнийг арван нэгжтэй тэнцэх хэмжээний төгрөгөөр торгоно.

-Согтууруулах ундаа хэрэглэхийг хориглосон газарт архидан согтуурсан, эсхүл ажил, үйлдвэрлэлийн зайлшгүй шаардлагатай нөхцөл, эсхүл заншлын дагуу хэрэглэж байгаагаас бусад тохиолдолд хот, суурин газарт биедээ хутга, эсхүл хүний биед гэмтэл учруулж болох тусгайлан бэлтгэсэн зэвсгийн чанартай зүйл авч явсан бол зэвсэг, хэрэгслийг хурааж хүнийг хорин таван нэгжтэй тэнцэх хэмжээний төгрөгөөр торгоно.

-Мансуурсан нь эрүүгийн хариуцлага хүлээлгэхээргүй бол хүнийг нэг зуун нэгжтэй тэнцэх хэмжээний төгрөгөөр торгох, эсхүл албадан сургалтад хамруулж долоогоос гуч хоногийн хугацаагаар баривчлах шийтгэл оногдуулна хэмээн тус тус заажээ.