Сонгинохайрхан дүүргийн XXXIII хороо буюу Тахилтын жалганаас цагдаагийн байгууллагынхан Н хэмээх 53 настай эмэгтэйн цогцсыг олсон талаар бид өмнө нь мэдээлсэн билээ. Уг хэргийг талийгаачтай хамтран амьдарч байсан 40 настай Т.Нармандах гэгч өнгөрсөн сарын 7-8-нд шилжих шөнө үйлдсэн болох нь тогтоогдсон бөгөөд түүнийг цагдан хориод байгаа аж. Уг хэргийн мөрөөр хийсэн сурвалжилгыг хүргэж байна. 

Хүү нь цагдаагийн байгууллагад гомдол гаргаснаар талийгаачийг эрэн хайж эхэлжээ

/Талийгаач Н-ийн амьдарч байсан байр/

Албаны эх сурвалж “Анх талийгаачийн хүү цагдаагийн байгууллагад “Миний ээж 53 настай Н гэртээ ирэхгүй олон хоног боллоо” гэж хандсанаар талийгаачийг эрэн хайж эхэлсэн юм билээ. Энэ хугацаанд талийгаачтай ойр дотнын харилцаатай хүмүүсээс мэдүүлэг авсан байна. Тэдний дундаас талийгаачтай сүүлийн хэдэн сарын хугацаанд хамтран амьдарч байсан Т.Нармандах гэгчийг саатуулан шалгах явцад хэргээ хүлээсэн байдаг.

Тодруулбал,  “Талийгаачийг Баянзүрх дүүрэгт хутгалж хөнөөгөөд, үе мөчөөр нь салгаад, өөрийнхөө машинд ачиж, Тахилт орчмын жалганд шатаасан. Энэ бүхнийг согтуу байхдаа хувийн таарамжгүй харилцаанаас үүдэн үйлдсэн” гэсэн утга бүхий мэдүүлэг өгч, улмаар талийгаачийг шатаасан газраа зааж өгсөн байдаг. Гэхдээ хэргийг шалгах ажиллагаа үргэлжилж байна” гэлээ. Талийгаач эмэгтэйн цогцсыг өнгөрсөн даваа гарагт буюу есдүгээр сарын 18-нд олсон байна. 

Талийгаачийн охин: Ийм аймаар хэрэг гарчихаад байхад цагдаагийн байгууллагаас худал мэдээлэл хийж болохгүй

Бид талийгаачийн ар гэрийнхэнтэй холбогдож, болсон явдлын талаар болоод сэжигтний талаар тодруулахад, “Ээжийгээ бурхан болсон талаарх мэдээллийг бид бага дүүгээсээ нууцалсан байгаа. Хэргийн талаарх мэдээллийг шаардлагатай бол тодорхой хугацааны дараа бид албан ёсоор хийнэ. Ийм аймаар хэрэг гарчихаад байхад цагдаагийн байгууллагаас худал мэдээлэл хийж болохгүй. Тэдний мэдээлснээс огт өөр зүйл болсон ч юм бил үү. Одоогоор өөр мэдээлэл өгөх боломжгүй” гэлээ. 

Сэжигтэн Т.Нармандах гэж хэн бэ

Хамтран амьдрагчаа хөнөөж, мөчилж, шатаасан хэрэгт сэжигтнээр татагдан шалгагдаж байгаа Т.Нармандах нь 1980 оны аравдугаар сарын 17-нд төрсөн, 40 настай, эрэгтэй. Эх сурвалж түүнийг талийгаачтай сүүлийн жил орчмын хугацаанд хамтран амьдарч, гэрт нь ирж очин байдаг байсан гэх мэдээллийг өгч байсан ч талийгаачийн ар гэрийнхэн үгүйсгэж байсан юм. 

Т.Нармандах нь БНСУ-д амьдарч байгаад Монголд 5-6 жилийн өмнө ирсэн. Аав, ээж, дүүгийн хамт Баянзүрх дүүргийн IV хорооны ... байрны ... тоотод амьдардаг байжээ. Мөн тэрбээр хүнд техникийн операторын сургагч багшаар ажилладаг байсан гэх мэдээлэл байна.

Бид сэжигтний талаар тус хорооны нэгэн ажилтнаас тодруулахад “Таны асуугаад байгаа хүн Солонгос Улсад ажиллаж, амьдарч байгаа гэсэн бүртгэлтэй байна. Өнгөрсөн жилийн хүн амын тооллогоор ингэж бүртгүүлсэн байна” гэв. Харин амьдардаг байрных нь СӨХ-ийн ажилтнаас тодруулахад “Энэ айлд өдөртөө ихэвчлэн хүн байдаггүй юм.

Энд Т.Нармандах гэж хүн амьдардаг нь үнэн. Орой л аав, ээж нь ажлаасаа ирдэг юм. Эднийх хоёр хүүхэдтэй. Миний ажигласнаар Т.Нармандах нь саажилттай, харвачихсан юм шиг байдалтай байдаг. Ийм хэрэг гарсан талаарх мэдээллийг өнөөдөр мэдээллийн сайтуудаас  л уншиж, мэдлээ” гэлээ.

Харин сэжигтний талаар түүний хамгийн сүүлд ажиллаж байсан "Ф" сургалтын төвийн захирал Н.П “Манай төвд 2017-2019 он хүртэл хүнд техникийн операторын сургагч багшаар ажиллаж байсан.

Хамгийн сүүлд 2019 оны арванхоёрдугаар сарын 27-нд цалингаа аваад эргэж ирээгүй. Анх ажилд орохдоо Солонгос Улсаас ирээд удаагүй байгаа гэж байсан. МУИС-ийг төгссөн юм билээ. Зан харилцааны хувьд доголдолтой, ширүүн талдаа хүн байсан. Хамгийн сүүлд миний машиныг унаж яваад зам тээврийн осол гаргаж, зугтаж алга болсон” гэв.