Эргэлт.мн мэдээллийн сайт Замын-Үүд сумын нэр бүхий дарга нарын их хэмжээний авлига авсан, авлигын мөнгөө оффшор дансанд байршуулсан болон албан тушаалаа урвуулан ашигласан талаарх ноцтой хэргүүдийг эх сурвалжийн баримтанд тулгуурлан цувралаар хүргэж байгаа билээ.

“Х.УРАНБАЯРЫН АРД УИХ-ЫН ГИШҮҮН ЭГЧ НЬ БАЙДАГ БОЛОХООР ДЭЭРЭЛХҮҮ, ХЭНХЭГ БАЙДАГ ГЭЖ ЗАМЫН-ҮҮДИЙНХЭН ЯРЬДАГ” ГЭВ

            Тэгвэл энэ удаагийн дугаартаа АТГ-аас цагдан хорьж, Эрүүгийн хэрэг үүсгэн шалгаж буй Цагдаагийн хошууч Х.Уранбаярын талаар онцолж байна. Учир нь, түүнийг АТГ болон хууль, хяналтын байгууллагаас “Их хэмжээний авлига авсан, авлигын мөнгөөр тээврийн хэрэгсэл авч түүнийгээ нуун дарагдуулсан, хилийн онц чухал объектын хяналтын камерийг санаатайгаар салгасан, автомашины пүүг унтраасан, “Засгийн газрын” гэсэн тодотголтой ачааны машинд бусдын барааг тээвэрлэсэн” зэрэг үндэслэлээр шалгаж байгаа гэнэ.

Тухайлбал, эх сурвалжийн мэдээлснээр “Манай Замын цагдаагийн дарга Х.Уранбаяр, АТҮТ-ийн А.Хатансайхан хоёр урдаас орж ирж байгаа тал ачаатай автомашиныг гаалийн хашаанд оруулдаг. Ингээд бүх камераа унтрааж байгаад тус машиныг дүүрэн болтол ачаа ачдаг юм билээ. Тэр машин нь “Эрүүл мэндийн яам” гэсэн нэрэн дор явдаг болохоор ачаагаа дүүргэв үү, үгүй юү Улаанбаатар хот руу хөдөлдөг. Өөрөөр хэлбэл, Эрүүл мэндийн яамны нэг машин ачааг үгсэн хуйвалдаж хоёр машинд хувааж хийгээд үлдсэн зайнд нь өөр хүмүүсийн ачааг оруулдаг. Тэндээсээ л авлига авдаг юм шиг байгаа юм” гэв.

            Мөн Хятадаас даац хэтрүүлсэн машин орж ирэхэд “Пүүлэх” буюу жинлэх үед нь тэр хоёр, мэргэжлийн хяналтын байцаагч нартай ярилцаж ачааг хэд дахин багасгаж, хэвийн хэмжээнээс бага гэсэн бичиг хийж өгдөг байсан гэнэ. Энэ нь гүйцэтгэх ажиллагааны үеэр илчлэгдэж “Хяналтын камер яагаад ойр ойрхон удаан хугацаагаар унтрах болсон, автомашин жинлэх төхөөрөмж яагаад сааталд орсон” зэрэг нь шалгагдаж байгаа аж. Харин зарим эх сурвалж Х.Уранбаярыг “УИХ-ын гишүүн Гомпилдоогийн Мөнхцэцэгийн хүргэн болохоор Замын-Үүдэд түүнээс том хүн гэж бараг байхгүй” хэмээж байв. Тодруулбал, энэ талаар нэрээ нууцлахыг хүссэн эх сурвалж “Г.Мөнхцэцэг гишүүн өмнөх дөрвөн жил манай тойргоос сонгогдохдоо аймагтаа дорвитой хийсэн зүйлгүй. Харин ч Замын-Үүдийн байж болох бүх газар ах, дүү хамаатан садан, хамаарал бүхий хүмүүсээ “чихсэн” сураг бий. Замын-Үүдийнхэн бүгд мэднэ дээ 2017 онд зүтгүүлсээр байгаад өөрийн төрсөн дүү Г.Мөнхтүвшинг манай суманд Хяналт прокуророор тавьсан. Бас Г.Мөнхзул гэдэг дүү нь манай сумын нэгдсэн эмнэлэгт сувилагчаар ажилладаг. Х.Уранбаяр сүүлийн жилүүдэд үндэслэлгүй хөлжсөн. Жижиг тэрэг ундаг байсан хүн жил гаруйн өмнөөс “Lexus 470” унадаг болсон. Зан харилцаа гэж авах юм байхгүй, дээрэлхүү. Ард нь УИХ-ын гишүүн эгч нь байдаг болохоор дээрэлхүү, хэнхэг байдаг гэж Замын-Үүдийнхэн ярьдаг" гэв.

Ард нь УИХ-ын гишүүн эгч нь байдаг болохоор тийм хэнхэг байдаг гэж Замын-Үүдийнхэн бүгд л ярьдаг

ЦАГДААГИЙН ХОШУУЧ Х.УРАНБАЯР ӨӨРИЙН ХӨЛӨГЛӨДӨГ “LEXUS 470” АВТОМАШИНАА АВЛИГЫН МӨНГӨӨР АВСАН УУ

                      Өөр нэгэн эх сурвалжийн мэдээлснээр “Замын-Үүдийн гааль, мэргэжлийн хяналтын байцаагч нар бүгд хувьдаа үнэтэй, том машинтай. Тэдний машин хамгийн түрүүнд, хаалт саадгүй гардаг болохоор өндөр үнээр ачаа зөөнө. Дээрээс нь авлига авцгаана. "Замын цагдаагийн Х.Уранбаяр" гэхэд л Өмнөговь аймагт хоёр, Замын-Үүдэд хоёр том автомашинтай. Хилийн цэргийн том цолтой офицерууд ч бүгд ачааны машинтай” гэсэн юм. Үнэхээр Дорноговь болон Өмнөговь аймагт 2-4 ачааны автомашин явуулдаг бол тэдгээр нь мөн адил  Х.Уранбаярын нэр дээр бүртгэлгүй гэдгийг түүний хөрөнгө орлогын мэдүүлгээс харж болно.

        Өөрөөр хэлбэл, түүний хөрөнгө орлогын мэдүүлэгт ачааны автомашин ч тэр, “Lexus 470” ч тэр байхгүй. Тэр бүү хэл, “0007 ДГО” улсын дугаар нь тухайн автомашиных биш ажээ. Тодруулбал, тус улсын дугаараар www.smartcar.mn вэб сайтаас мэдээллийг хайж үзэхэд Бүгд Найрамдах Солонгос Улсын "Ssangyong" үйлдвэрт 2002 онд үйлдвэрлэсэн "Истана" маркийн автомашины танилцуулга гарч ирнэ. 2010 онд Монголд оруулж ирсэн мөнгөлөг өнгийн "Истана" маркийн авто машины улсын дугаараар Замын цагдаагийн тасгийн дарга Х.Уранбаяр өөрийн тансаг унаагаа чимсэн нь энэ аж. Угтаа бол тээврийн хэрэгслийн улсын бүртгэлийн дугаарыг эрх бүхий байгууллагын зөвшөөрөлгүйгээр дур мэдэн солих, өөр тээврийн хэрэгсэлд шилжүүлэн ашиглах эрх хэнд ч байхгүй. Харин Автотээврийн газар танилтай, Замын цагдаагийн албан хаагчид хууль дүрэм үйлчилдэггүйн тод жишээ энэ юм.

Энэ талаар Тээврийн хэрэгслийн тоо бүртгэл хөтлөх, улсын дугаар олгох журмын долдугаар бүлгийн

36-д  Зам тээврийн осол, хэрэгт өртөж их хэмжээний эвдрэл гарсан, эсвэл осол хэргийн   газраас   тээврийн   хэрэгслээ   орхиж   зугтаасан,   түүнчлэн   өөр  тээврийн хэрэгслийн улсын дугаарын тэмдгийг ашигласан бол тээврийн хэрэгслийн улсын дугаарын тэмдгийг Замын цагдаагийн албаны байцаагч түр хурааж болно.

37-д Тээврийн хэрэгслийн улсын дугаарын тэмдгийг энэ журмын 36-д заасан үндэслэлээр хураан авсан байцаагч аймаг, дүүргийн замын цагдаагийн албаны бүртгэгчээр дамжуулан Мэргэжил, техникийн хяналтын хэлтэст 24 цагийн дотор мэдэгдэж тэмдэглүүлнэ" хэмээн заажээ. 

           Мөн Цагдаагийн хошууч Х.Уранбаяр нь замын хөдөлгөөний дүрмийг ягштал биелүүлж, бусдад зөв үлгэр дууриалал үзүүлэх ёстой атал хоёр ч удаа замын хөдөлгөөний дүрэм зөрчиж, торгуулж байжээ. Тухайлбал, түүний торгууль төлсөн түүхээс харахад өнгөрсөн оны есдүгээр сард Улаанбаатар хотын Баянзүрх дүүргийн нутаг дэвсгэрт замын хөдөлгөөний дүрэм зөрчиж, 50 мянган төгрөгөөр торгуулсан байна. Мөн өнгөрсөн гуравдугаар сард Дорноговь аймгийн Замын-Үүд сумын дөрвөн замын уулзвар орчим дүрэм зөрчиж, 20 мянган төгрөгөөр торгуулсан байна.

            Түүний хөрөнгө, орлогоо нуун дарагдуулсан эсэхийг их хэмжээний авлига авсан хэрэгтэй нь хамтатган хууль, хяналтынхан тогтооно. Харин иргэдийн дунд “УИХ-ын гишүүн Г.Мөнхцэцэг эгч нь байхад хуулийн хариуцлага хүлээхгүй гараад ирнэ дээ” гэдэг цуу яриа тарсан байна.

Үргэлжлэл бий...