Ховд аймгийн Алтай сумын Нэгдсэн эмнэлэг "Ковид-19" цар тахлын эсрэг вакцин хийхдээ алдаа гаргаж, өөр вакцин андуурч хийжээ. Тодруулбал, энэ сарын 28-нд ерөнхий боловсролын 11,12 дугаар ангийн зургаан хүүхдэд "Ковид-19"-ийн эсрэг вакцин хэмээн тавт вакцин тарьсан байна.

Энэ талаар бид тус эмнэлгийн эмч Б.Наранчимэгтэй холбогдож тодрууллаа. Тэрбээр "Зургадугаар сарын 28-ны өглөө 11:45 цагт эхэлж, "Ковид-19"-ийн вакцинтай андуураад тавт вакцин хийсэн. Хөдөөнөөс гурван хүн эхлээд орж ирж хийлгэсэн. Дараа нь гурван хүүхэд ирээд нийт зургаан хүүхдэд тавт вакциныг хийсэн байна лээ. Ингээд бид вакцин андуурч хийснээ мэдээд дахин цар тахлын эсрэг вакцин хийсэн. Одоогоор вакцин хийлгэсэн хүүхдүүдийн биед ямар нэг сөрөг зүйл илрээгүй. Эцэг, эхчүүдтэй нь би биечлэн уулзсан. Мөн хүүхдийн биеийн байдлыг хянасан. Тавт вакциныг маш бага тунгаар тарьсан. Нэг хүүхдэд хийх ёстой тунг зургаан хүүхдэд хувааж 0,3 мл тунгаар хийсэн. Тавт вакцин  нь хөл ханиад, сахуу, татан зэрэг өвчний эсрэг хийдэг вакцин байгаа" гэв.