Говь-Алтай аймгийн Цээл суманд үйл ажиллагаа явуулдаг “Алтайн хүдэр” ХХК-ийн 300 гаруй ажилтан коронавирусийн халдвар авч, уурхайн байрандаа тусгаарлагдаад байгаа аж. Бидэнд ирсэн мэдээллээр “Манай уурхайн 300 гаруй хүн халдвар авчихаад байхад удирдлагууд тоохгүй байна. Хоол унд, эмчилгээ маш муу байгаа” гэсэн юм.

Бид үүний дагуу “Алтайн хүдэр” компанийн гүйцэтгэх захирал н.Сэлэнгэтэй холбогдож, тодруулах гэсэн боловч тэрбээр “Ярилцлага авах бол цаг авч байж холбогд” гэсэн юм.

Харин үүний дараа тус компанийн уурхай хариуцсан дарга н.Бат-Оргилтой холбогдлоо. Тэрбээр “Манай уурхайн ажилтнаас зургадугаар сарын 1-нд халдвар илэрсэн. Нийт 300 гаруй ажилтан маань халдвар авсан нь үнэн. Одоогийн байдлаар уурхайн тусгаарлах байранд 230 хүн эмчлүүлж байна. Үүнээс 20 хүнийх нь биеийн байдал хүндэвтэр байгаа. Уурхайн нэг ээлжинд 500 гаруй хүн ажилладаг. Эдгэсэн болон халдвар аваагүй ажилтнуудаа гэр рүү нь буцаасан байгаа. Уурхайн үйл ажиллагаа зургадугаар сарын 14-нөөс зогссон. Коронавирусийн халдвар авсан үед уух витамин с, д, арбидол эм уулгаж байгаа. Эмчилгээг Говь-Алтай сумын Нэгдсэн эмнэлгийн эмч нар хариуцаж хийж байна. Өдрийн гурван хоол өгч байгаа. “Хоол өгөхгүй, эмчилгээ хийхгүй байна” гэдэг нь ташаа мэдээлэл байна” гэв.