Баян-Өлгий аймгийн Засаг дарга Д.Бауыржан бусдад зодуулж, гэмтэл авсан тухай мэдээлэл зарим хэвлэл мэдээллийн хэрэгслээр цацагдаад байна. Тодруулбал, Баян-Өлгий аймгийн удирдлагууд Ерөнхийлөгчийн сонгуульд У.Хүрэлсүх ялсны баярыг тэмдэглэж, архидан согтуурч, нэр бүхий УИХ-ын гишүүний дүү нар нийлж Баян-Өлгий аймгийн засаг дарга Д.Бауыржаныг зодсон байж болзошгүй хэмээгээд байгаа юм.

Энэ талаар Засаг дарга Д.Бауыржантай холбогдож тодрууллаа. Тэрбээр “Намайг Засаг дарга болсоноос хойш нэг нууц хаягнаас дарамталж, гүтгэж байгаа. Миний нэрээр нээсэн нууц хаягнаасаа намайг нууц амрагтай, хууль бусаар төрийн эрх авсан, бусдад зодуулсан гэх мэтээр бичиж, худал мэдээлэл түгээж байна. Би цагдаагийн газарт хандаж, өргөдөл гомдол гаргасан. Сүүлчийн нэг жилийн хугацаанд энэ үйлдэл давтагдаж байна. Сонгуулийн өдөр би иргэдийг сонгуулиа өгөөрэй хэмээн уриалж, лайв бичлэг хийсэн юм. Тэр бичлэгээс миний зургийг татаж аваад, дээр нь юм зурчихсан юм шиг байна лээ. Өөр хүний хөхөрч, няцарсан биений зургийг тавьж, намайг мэтээр бичиж байгаа. Би хэнд ч зодуулаагүй. Бид сонгуулийн ялалтын баярыг тэмдэглээгүй. Манай аймагт коронавирусийн халдвар гарч, нөхцөл байдал хүнд байна. Наргиж, цэнгэх зав бидэнд алга. Бид гэрээсээ ажиллаж байгаа. Дахиад хэлэхэд УИХ-ын гишүүний дүү болон бусад этгээдүүд намайг зодоогүй” гэлээ.