Орхон аймаг, Эрдэнэт хот 2025–2026 оны хичээлийн жилийн элсэлтийн шалгалт болон олон улсын стандарт шалгалтад өндөр амжилт үзүүлсэн сурагчид болон бэлтгэсэн багш нарыг 100 сая төгрөгөөр урамшуулжээ.

Энэ жилийн элсэлтийн шалгалтад Орхон аймгийн долоон сурагч монгол хэл, газар зүй, англи хэл, орос хэлний хичээлээр 800 оноо авчээ.

Мөн IELTS, Кембрижийн олон улсын математик, физикийн шалгалт, түүнчлэн олон улсын их, дээд сургуульд элсэх SAT зэрэг стандартчилсан шалгалтад өндөр оноо авч, элсэлтийн ерөнхий шалгалтын 800 оноотой дүйцэхүйц үнэлгээ хүртсэн 38 сурагч урамшуулал хүртжээ.

Эрдэнэт хотын элсэлтийн ерөнхий шалгалтын аймгийн дундаж хэмжээст оноо 2025 онд 516.85 байсан бол 2026 онд 527.04 болж, өмнөх оноос 10.19 оноогоор өссөн нь боловсролын чанарыг дээшлүүлэх, сурагчдын өрсөлдөх чадварыг нэмэгдүүлэхэд чиглэсэн бодлого, хөрөнгө оруулалтын үр дүн гэдгийг онцоллоо.