Монголбанкнаас эдийн засгийн нөхцөл байдлын талаар ээлжит мэдээлэл хийлээ. Энэ үеэр Монголбанкны ерөнхийлөгч Б.Лхагвасүрэн “Өнгөрсөн онд төлбөрийн тэнцэл 780 сая ам.долларын ашигтай гарсан. Энэ нь Монгол Улсын валютын нөөц нэмэгдэх, ханш тогтвортой байх эерэг статистик юм. Энэ онд төлбөрийн тэнцэл 500-600 сая ам.долларын ашигтай байхаар төсөөлж байгаа учир ханш дээр эдийн засгийн гадаад, дотоод дарамт байхгүй.

Нэгдүгээр сарын статистик мэдээллээр манай улсын гадаад худалдааны тэнцэл 181 сая ам.долларын ашигтай гарлаа. Тухайлбал, нүүрсний экспорт 2019 оны хэмжээндээ буюу коронавирусийн халдварын өмнөх үетэйгээ адил болсон гэсэн үг. Иймд нөөц нэмэгдэж, төгрөгийн ханш тогтвортой байх эдийн засгийн хандлага ажиглагдаж байна" хэмээлээ.