Элсэлтийн ерөнхий шалгалтын бүртгэл өнөөдөр эхэллээ. Тус шалгалтад хэрхэн бүртгүүлэх талаар болон бусад зүйлийг Боловсролын үнэлгээний төвийн элсэлтийн шалгалт хариуцсан ахлах мэргэжилтэн М.Болдсайханаас тодрууллаа.  

-Энэ жил хэчнээн хүүхэд элсэлтийн ерөнхий шалгалт өгөх вэ?

-Энэ жил ерөнхий боловсролын дунд сургуулийн 35800 орчим хүүхэд төгсөж байна. Үүн дээр өмнөх онд их сургуульд элсэж чадаагүй хүүхдүүдийг нэмвэл 39 мянган хүүхэд шалгалт өгөх тооцоо бий. Шалгалтын бүртгэл өглөөний 09:00 цагаас эхэлсэн. Дөрөвдүгээр сарын 20-ны 18:00 цагт хаагдана. Бүртгэл дууссан цагаас хойш нэмэлт бүртгэл хийхгүй. Өмнө ч нэмэлт бүртгэл хийж байгаагүй. Жил бүрийн элсэлтийн ерөнхий шалгалт өгөх хүүхдүүдийн тоо нэмэгддэг. 2019 онд 28 мянган хүүхэд шалгалт өгч байсан. Өнгөрсөн онд 30 мянган хүүхэд шалгалт өгсөн байна.

-Одоогоор хэчнээн хүүхэд бүртгүүлсэн байна вэ?

-Өгөөний 10:00 цагийн байдлаар 50 орчим хүүхэд эхний ээлжийн хувийн мэдээллээ оруулсан байна.

-Хүүхдүүд элсэлтийн ерөнхий шалгалтад бүртгүүлэхдээ юунд анхаарвал зохих вэ?

-Бүртгэлд хамрагдахын тулд ¾ хэмжээтэй цээж зураг файлаар өгсөн байх ёстой. Бүх төрлийн интернет гүйлгээ хийх цахим карт бэлдсэн байх ёстой. Өөрийнхөө регистрийн дугаарыг зөв оруулбал бүртгэл идэвхжинэ.  Боловсрол, шинжлэх ухааны яаманд байгаа элсэлт мэдээллийн сангаас тухайн хүүхдийн талаарх бүх датаг авна.

-Хүүхдүүд элсэлтийн ерөнхий шалгалтын бүртгэлд хамрагдахдаа ямар алдаа гаргадаг вэ?

-Шаардлага хангахгүй зураг оруулдаг. Мөн бусдын картаар хураамж төлдөг асуудал гардаг. Тэгэхээр журмаа сайтар уншиж, судлах хэрэгтэй. Бүртгэл дууссан үед сонгосон хичээлээ өөрчлөх асуудал гардаг. Тийм учраас сонирхож буй мэргэжлийн хичээлээ сайтар судлаж, эцсийн байдлаар хичээлээ сонгох хэрэгтэй.

-Шалталтын тов гарсан уу. Хэзээ гаргах вэ?

-Боловсролын үнэлгээний төвөөс Боловсрол, шинжлэх ухааны яаманд санал хүргүүлнэ. Тэгэхээр эцсийн шийдвэрийн Боловсрол, шинжлэх ухааны яамнаас гаргадаг гэсэн үг.

-Монгол хэл, бичгийн босго оноо тогтоодог. Энэ жил босго оноог шинэчлэх үү?

-2020 онд монгол хэл, бичгийн шалгалтыг цар тахлын улмаас зохион байгуулж чадаагүй. 2019 онд шалгалтад хамрагдаж 400-с дээш оноо авсан мөртлөө их, дээд сургуульд элсээгүй хүүхдүүд энэ жил элсэлтийн ерөнхий шалгалтад хамрагдахдаа тухайн шалгалтыг өгөхгүй байж болно.