Сонгинохайрхан дүүргийн 32 дугаар хороонд 2025 оны тавдугаар сарын 19-ний  13:51 цагт “Гал гарч байна” гэх дуудлага Онцгой байдлын ерөнхий газарт иржээ. Дуудлагын дагуу Баянгол дүүргийн Онцгой байдлын хэлтсийн 18 дугаар анги, Сонгинохайрхан дүүргийн Онцгой байдлын хэлтсийн 26 дугаар ангийн алба хаагчид галын голомтод очиж ажиллан, унтраажээ.

Галын улмаас 36.700 ширхэг электрон тоолуур, Ssangyong Musso, УАЗ 220695, Nissan Cabstar, УАЗ 220692, Ssangyong Istana, Nissan ZN2033UBG4 загварын нийт зургаан автомашин, есөн ширхэг мотоцикл, хураалттай 15 ширхэг шонгийн мод, 100 метр цахилгааны кабель, 0.05 га талбайд байсан шар өвс, иргэн Н-ийн таван ханатай гэр шатсан байна.

Онцгой байдлын байгууллагаас галын аюулаас сэрэмжлүүлэх хүрээнд дараах зөвлөмжийг иргэдэд хүргэж байна.

•  Хашаа, саравчид шатамхай эд зүйлсийг бөөгнөрүүлэн хадгалахгүй байх

•  Шар өвс, хог хаягдлыг цэвэрлэн галын аюулгүй байдлыг хангах

•  Цахилгааны утас, тоног төхөөрөмжийн аюулгүй байдлыг тогтмол шалгах

•  Гал гарсан тохиолдолд 101 дугаарын утсаар яаралтай мэдэгдэх

•  Хүүхэд багачуудыг галын аюул, цахилгааны эрсдэлийн талаар ойлгуулж сургах

Иргэн бүр галын аюулгүй байдлаа хангаж, болзошгүй эрсдэлээс урьдчилан сэргийлэх нь хамгаас чухал гэдгийг мэргэжлийн байгууллага анхааруулж байна.