Ковид-19 цар тахлын дэгдэлтэд өртсөн зээлдэгч, иргэд, аж ахуйн нэгжүүд харилцагч банкандаа хандан зээлийн бүтэцдээ өөрчлөлт оруулах боломжтой байгаа тухай Монголбанкнаас мэдээллээ. Өнөөдрийн байдлаар 125206 зээлдэгчийн 5.3 их наяд төгрөгийн зээл Ковид-19 цар тахалд өртсөн нь нийт зээлийн 33 хувийг бүрдүүлж байна. Төрөөс хэрэгжүүлж буй ипотекийн хөнгөлөлттэй зээлийн төлбөрийг түр хугацаанд хойшлуулах арга хэмжээ энэ оны тавдугаар сараас аравдугаар сарын хооронд үргэлжилсэн. Тухайн хугацаанд 38152 зээлдэгчийн 2 их наяд төгрөгийн зээлийг зургаан сарын хугацаатайгаар хойшлуулсан бөгөөд Монголбанкны зүгээс ЗГ-тай зөвшилцөж, дэмжих тохиолдолд уг арга хэмжээг цаашид үргэлжлүүлэх боломжтой хэмээн үзсэн байна.

Арванхоёрдугаар сарын 1-ний 06:00 цаг хүртэлх хугацаагаар хойшилсон бүх нийтийн бэлэн байдалд шилжих шийдвэрийн дагуу цар тахлаас урьдчилан сэргийлэх зорилгоор арилжааны банкууд тодорхой хугацаагаар ажиллахгүй. Харин Монгол Улсын санхүүгийн хэвийн байдлыг алдуулахгүй, цахим гүйлгээнд анхаарч ажиллана хэмээн Монголбанкнаас мэдээлсэн юм. Дээр дурдсан 5.3 их наяд төгрөгийн зээлийн 3.7 их наяд төгрөгийн зээлд бүтцийн өөрчлөлт хийсний 2.2 их наяд төгрөг нь бизнесийн зээл, 1.5 их наяд төгрөг нь иргэдийн зээл байна.