Монгол Улсад 15 жилийн дараа шинэ үүрэн холбооны оператор болох “ONDO” бий болсон билээ. Үүсгэн байгуулагдсанаасаа хойш олон хүний анхаарлыг татаад байгаа  “ONDO” үйлчилгээний талаар цахим орчинд олон төрлийн мэдээлэл байгаа билээ. Дугаар худалдан авахаас эхлээд  дата ашиглах гээд бүх зүйл нь ондоо байгаа нь хүмүүсийн анхаарлын төвд байгаа билээ. Ингээд 60-аар эхэлсэн тус дугаарын талаар мэдэж авцгаая.

    Тус брэнд нь “Garneton” компанийн бүтээл бөгөөд And Global-ийн Ч.Анар, “Google”-ийн Б.Баттулга, “LendMN” захирал О.Болдбаатар болон өмнө нь “G-Mobile”, “Telecom-Mongolia” CTO байсан П.Нямбаяр нар үүсгэн байгуулсан.Анх “Digital Nation 2021” технологийн наадмын үеэр олон нийтэд танилцуулагдсан.

ДУГААР ХУДАЛДАН АВАХ

    “ONDO” дугаарыг худалдан авах нь бусад үүрэн холбооны дугаар худалдан авахаас ялгаатай. Та худалдан авахын тулд багахан дуудлага худалдаа хийх юм. Ямар нэг дугаар дээр эхний үнийн санал авах үед тухайн дугаарын нэг цаг гүйж эхэлнэ. Тухайн нэг цагийн хугацаанд танаас өөр хүн үнэ өсгөөгүй бол цаг дуусахад дугаар таных болно гэсэн үг. Харин, өөр оролцогч нэмж үнэ оруулах бүрд дуудлага худалдааны цаг  арван минутаар сунана. Нийт гурван цагаар цаг сунгагдах боломжтой. Ингэснээр эрэлт ихтэй дугааруудын дуудлага худалдаа хамгийн ихдээ дөрвөн цаг үргэлжилнэ. Хугацаа дуусахад хамгийн өндөр үнийн санал өгсөн хэрэглэгч тухайн дугаарыг авах эрхтэй болно.

Дуудлага худалдаанд оролцсон ч дугаараа авч чадаагүй бол дэнчингийн мөнгийг 100 хувь  буцаан авах бөгөөд нэг сая хүртэлх мөнгөн дүнг ажлын нэг өдөрт, таван сая хүртэл төгрөгийг ажлын хоёр өдөрт буцаан авах боломжтой.

АВСАН ДУГААРАА ХЭРХЭН ИДЭВХЖҮҮЛЖ, АШИГЛАХ ВЭ

Та дугаар авахдаа “Esim”болон биет симээс сонгож ашиглах боломжтой. “ONDO” дугаараа www.ondo.mn сайтаар эсвэл салбар дээр биечлэн очиж  идэвхжүүлэх боломжтой.Мөн сүлжээндээ дуудлага хийж, мессеж бичих бол заавал биечлэн ирж дугаараа идэвхжүүлэх ёстой.  Дуудлага худалдаагаар авсан дугаараа хоёр жилийн дотор идэвхжүүлэн ашиглах ёстой. Хэрэв хоёр жилийн хугацаанд идэвхжээгүй бол дахин худалдаанд гарна. Мөн дугаараа 60 хоногийн дараа өөр хүний нэр дээр шилжүүлж болно.

    Тус дугаарын сүлжээ одоогийн байдлаар зөвхөн Улаанбаатар хотод  барьж байгаа юм. Мөн бусад операторууд руу залгаж ярих, мессеж бичих боломжгүй байгаа юм. Зөвхөн “ONDO” сүлжээ орсон газруудад дата ашиглах боломжтой.

“ONDO” ДУГААРЫГ АШИГЛАХ БОЛОМЖТОЙ ГАР УТАС

 Тус дугаар бусад үүрэн операторууд шиг бүх утсанд ашиглаж болохгүй юм. Гар утас нь “VoLTE” дэмждэг байх шаардлагатай. Энэ нь одоогоор зөвхөн “iPhone Xs” болон түүнээс хойших загварын утас дээр ажиллана гэсэн үг юм. “VoLTE” дэмждэг “Samsung” загварын гар утас  дээр 2022 оны есдүгээр сараас эхлэн дуудлага хийх боломж нээгдэнэ. “VoLTE” дэмждэг бусад загварын утас дээр тун удахгүй ярианы үйлчилгээ нээгдэнэ.  Гэхдээ “VoLTE” дэмждэггүй байсан ч “4G/LTE” дэмждэг бол ярих боломжгүй ч датагаа ашиглах, мессеж бичих боломжтой.

“TRY ME” ГЭЖ ЮУ ВЭ

“TRY ME” багц гэдэг нь Та анх дугаар захиалахдаа 22000 төгрөгөөр  худалдаж авсан багц бөгөөд уг багц нь сүлжээндээ хязгааргүй ярьж, мессеж бичих болон сар бүр 10GB дата дагалдах юм. “TRY ME” багцад дагалдах эрхүүд нь бусад операторуудтай харилцан холболт хийх хүртэл сар бүр таны дугаарт идэвхжих бөгөөд дахин нэмэлт төлбөр авахгүй. Тус багцыг идэвхжүүлснээр сар бүр 10GB дата таны дугаарт урамшуулал болон орж ирнэ.

“ONDO” ҮЙЛЧИЛГЭЭ

“ONDO” дугаарууд хоорондоо дата шилжүүлэх боломжтой. Мөн дата багцын хугацаа дуусахгүй бөгөөд шинээр дата багц авах, шинэ сар эхлэхэд өмнөх дата багцын үлдэгдэл хадгалагдан үлдэнэ.

ЦАХИМ ХОЛБООС: https://ondo.mn/

https://www.facebook.com/ondo.mn/photos/?ref=page_internal