Монгол Улс 2022 оны эхний долоон сард нийт 4.7 тэрбум ам.долларын бараа, түүхий эд импортолжээ. Энэ нь өнгөрсөн 2021 оны мөн үеэс 924.5 сая ам.доллар буюу 24.1 хувиар өссөн үзүүлэлт болж байна.

                        Импортоор оруулж ирсэн нийт бараа, бүтээгдэхүүний 97.6 хувийг валютын төлбөртэй худалдаа, 0.7 хувийг гадаадын зээлийн хөрөнгөөр нийлүүлсэн бараа, 0.5 хувийг гадаадын тусламжийн бараа, 1.1 хувийг гадаадын хөрөнгө оруулалтаар нийлүүлсэн бараа, 0.03 хувийг боловсруулалтын бараа эзэлжээ. Харин импортын барааны нийт дүнг дэлгэрүүлбэл, машин механик тоног төхөөрөмж болон эд анги, цахилгаан хэрэгсэл, тэдгээрийн сэлбэг 721.8 сая ам.доллар буюу 15.2 хувь, эрдэс бүтээгдэхүүн 1055.4 сая ам.доллар  буюу 26.7 хувь (үүний дотор нефтийн бүтээгдэхүүн 926.4 сая ам.доллар буюу 87.7 хувь), мал амьтан, ургамлын гаралтай бүтээгдэхүүн, хүнсний зүйл 616.4 сая ам.доллар буюу 12.9 хувь, авто агаарын тээврийн хэрэгсэл тэдгээрийн эд анги 816.3 сая ам.доллар буюу 17.1 хувь, үндсэн төмөрлөг болон түүгээр хийсэн бүтээгдэхүүн 493.6 сая ам.доллар буюу 10.4 хувь, химийн болон түүнтэй холбоотой үйлдвэрийн бүтээгдэхүүн 324.9  сая ам. доллар буюу 8.2  хувийг тус тус  эзэлж, эдгээр бүтээгдэхүүнд нийт дүнгийн 88.7 хувь ногдож байна.

2022 оны эхний долоон сарын байдлаар Монгол Улс дэлхийн 148 орноос гарал үүсэлтэй бараа, бүтээгдэхүүн импортолсноос БНХАУ-аас 34 хувь, ОХУ-аас 30.4 хувь, Японоос 8.6 хувь, БНСУ-аас таван хувь, АНУ-аас 3.3 хувийг оруулж ирсэн нь нийт импортын дүнгийн 81.3 хувийг эзэлж байгаа юм.