АПУ ХК-ны II улирлын санхүүгийн тайлан гарчээ.  Энэ компаны цэвэр ашиг цар тахлын өмнөх үе буюу 2019 оны эхний хагас жилд 9.3 тэрбум төгрөг байсан бол энэ оны мөн үед 82.1 тэрбум төгрөгт хүрснээр 8.8 дахин өссөн байна. Мөн экспортын борлуулалт нь цар тахлын өмнөх үеэс 288.8 тэрбум төгрөг буюу 73.8% нэмэгджээ.

       Тухайлбал, өнгөрсөн онд  АПУ ХК Хятадын зах зээлд зориулан Сэнгүр брэндийн дөрвөн төрлийн шар айраг, Оросын ГУМ их дэлгүүрт Chinggis khan брэндээ худалдаалснаар уг хоёр улс руу экспортолж буй борлуулалт 2020 оноос 440% болон 220% өссөн. Энэ оны эхний хагас жилийн байдлаарх АПУ ХК-ийн нийт хөрөнгө өмнөх оны мөн үеэс 133.9 тэрбум төгрөгөөр өсөж, 729.4 тэрбум төгрөгт хүрсэн.Үүний  71.7% нь эзэмшигчийн өмч аж. Харин компанийн нийт өр төлбөр 206 тэрбум төгрөг бөгөөд энэ нь нийт эргэлтийн хөрөнгийн 64.3% юм.

      Үүнээс харвал өр хөрөнгийн харьцаа нь 28.2% байна. Монголын хамгийн анхны 1.4 их наяд төгрөгийн зах зээлийн үнэлгээ бүхий  компани бол АПУ ХК юм. Цар тахал, дайн гээд хүнд хэцүү цагийг үл хайхран цэвэр ашиг, борлуулалтаа нэмэгдүүлснээс харахад тэд цаашдаа урт хугацаанд  Монголын шингэн хүнсний акул хэвээр байх бололтой.