Хүнсний бараа, ундаа усны үнэ өмнөх оны мөн үеэс 12.9 хувиар өсжээ

2021-07-21, 542

Үндэсний статистикийн хорооноос Монгол Улсын нийгэм эдийн засгийн 2021 оны эхний хагас жилийн статистик үзүүлэлтийг танилцууллаа. Энэ үеэр ҮСХ-ны Эдийн засгийн статистикийн газрын Ахлах статистикч М.Оюунжаргал хэрэглээний бараа, үйлчилгээний үнийн статистик, инфляцын түвшинг танилцуулав.

Хэрэглээний бараа, үйлчилгээний үнэ буюу инфляцын түвшин 2021 оны эхний хагаст өмнө жилийн мөн үеэс 6.6 хувиар, өмнөх оны эцсээс долоон хувиар, өмнөх сараас 0.7 хувиар өссөн байна.

Уг өсөлтөд

Хүнсний бараа, ундаа усны үнэ дүнгээрээ 12.9 хувиар
Согтууруулах ундаа тамхины бүлгийн үнэ дүнгээрээ 2.9 хувиар
Орон сууц, ус цахилгаан, хий, түлшний бүлгийн үнэ дүнгээрээ 4.8 хувиар
Хувцас, бөс бараа, гутлын бүлгийн үнэ дүнгээрээ 3.3 хувиар
Эм, эмнэлгийн үйлчилгээний бүлгийн үнэ дүнгээрээ 5.2 хувиар
Тээврийн бүлгийн үнэ дүнгээрээ 4.9 хувиар өссөн нь гол нөлөө үзүүлжээ.

Хэрэглээний бараа, үйлчилгээний үнэ өмнөх оноос 6.6 хувиар өсөхөд хүнсний бараа, ундаа усны үнэ өссөн нь 55 хувийн нөлөө үзүүлсэн байна. Инфляцын түвшин өмнөх сард мөн 6.6 хувь гарсан нь импортын барааны бүлгийн үнэ өссөнтэй холбоотой аж.

Инфляцын түвшин 2018 оны зургадугаар сард 7.2 хувь, 2019 оны зургадугаар сард 8.3 хувь, 2020 оны зургадугаар сард 2.8 хувь гарч байжээ.

Хүнсний бараа, ундаа усны үнэ өмнөх оны мөн үеэс 12.9 хувиар өсжээ