Дэлхийн банкнаас өнөөдөр “Уул уурхай ба оюун ухаан-Байгалийн баялгийн өгөөжийг институци болон хүний хөгжилд чиглүүлэх нь” сэдэвт эдийн засгийн хөгжлийн загварын тойм судалгааг танилцууллаа.

Дэлхийн банк сүүлд гаргасан тайландаа “Эрдэс баялгийн эрэлт дэлхийн зах зээлд буурч болзошгүй тул Монгол Улс уул уурхайгаас хамааралтай байдлаа бууруулах шаардлагатай”-г онцолжээ. БНХАУ нүүрсний хэрэглээгээ бууруулах зорилт тавиад байгаа. Мөн уур амьсгалын өөрчлөлтийн улмаас хөрөнгө оруулагчдын хандлага өөрчлөгдөж байгаа зэрэг нь эрдэс баялгийн эрэлтэд сөргөөр нөлөөлж байгаа аж.

Дэлхийн банкны монгол дахь суурин төлөөлөгч Андрей Михнев “Монгол Улс эрдэс баялгаасаа улам хараат болохын зэрэгцээ чадварлаг, мэргэшсэн ажиллах хүчнээ дутуу ашиглаж байна. Уул уурхайн баялгын өгөөжийг илүү төрөлжсөн, хүртээмжтэй эдийн засгийн өсөлт болгон хувиргах хэрэгтэй. Хүн болон институци гэх мэт өгөгдсөн суурь баялгаа дутуу ашиглаж байгаагаас үйлдвэрлэл болон экспортыг төрөлжүүлж чадахгүй, улмаар түүхий эдийн зах зээлээс улам хараат болж, үнийн савалгаанд улам өртөмтгий болж байна. Энэ мухардмал байдлаас гарахын тулд уул уурхайд хөрөнгө оруулдаг шигээ “Оюун ухаан” буюу чадварлаг боловсон хүчин, институцээ хөгжүүлэхэд дорвитой хөрөнгө оруулдаг болох хэрэгтэй” гэв.

Төрөлжсөн, тогтвортой эдийн засгийн суурийг бий болгох үүднээс Дэлхийн банкнаас бодлогын дараах дөрвөн гол чиглэлийг зөвлөмж болгов. Үүнд:

• Макро эдийн засгийн бодлогоор үйлдвэрлэлийг бус хэрэглээг тогтворжуулахад анхаарах
• Бизнесийн хэт олигополи байдлыг бууруулж, хөрөнгө оруулалтын орчныг эрчимтэй сайжруулах
• Эдийн засагт улс төрийн нөлөөг багасгах, ил тод нээлттэй байдлыг нэмэгдүүлэх, хяналт зохицуулалтын чанарыг ахиулахын тулд засаглалын реформуудыг хурдасгах
• Бүтээгдэхүүнийг төрөлжүүлэхээс илүүтэй нөөц, баялгаа төрөлжүүлэхэд анхаарах

хэрэгтэйг дурдсан байна.