УИХ-ын гишүүн С.Одонтуяа, Б.Пүрэвдорж, Ганибал нар цаг үеийн асуудлаар мэдээлэл хийлээ. Тодруулбал, төр нийгмийн зүтгэлтэн Г.Батхүүгийн амиа алдсан хэргийг дахин шалгуулах хүсэлтэй байгаагаа илэрхийлсэн юм. Энэ талаар УИХ-ын гишүүн С.Одонтуяа "Г.Батхүү агсан хоёр жилийн өмнө Төрийн оронд цаг бусаар амиа алдсан байдаг. Энэ хэрэг дээр Нийслэлийн цагдаагийн газрын Хүнд гэмт хэрэгтэй тэмцэх хэлтэс маш нууцыг зэрэглэлтэй мөрдөн шалгаж байсан. Энэ хугацаанд манай намын гишүүд хүлээцтэй хандаж байлаа. Гэтэл саяхан хэргийн эзэн холбогдогч байхгүй гэх үндэслэлээр Нийсллийн прокурорын газар хэргийг хаах санал явуулсан гэх мэдээлэл гарсан. Энэ хэргийг тойрсон учир битүүлэг асуудал их бий.

Тиймээс хэргийг хариуцлагатай мөрдөн шалгахыг шаардаж байна. Хэргийг ингэж хаалгахгүй. Учир битүүлэг олон асуудал гэдэг нь жилийн өмнө талийгаачийн ар гэрийнхэн болон өмгөөлөгч нар задлан шинжилгээний хариунд сэтгэл дундуур байгаагаа илэрхийлж байсан. Тэд шинжилгээний дүн буруу гэдэг хэд хэдэн дүгнэлт танилцуулж, гар утсан дээрх мэдээллийг нь устгасан болохыг хэлсэн. Гэтэл уг мэдээллийн дараа өмгөөлөгчийн мөрдөн байцаалтын нууц задалсан гэдэг үндэслэлээр ял сонсгосон байдаг. Тиймээс уг хэргийг нийтэд ил тод байлгах, учир битүүлгээр битгий хаагаач гэдэг асуудлыг бид тавьж байна.  Хөдөө хээр биш Төрийн ордонд гарсан хэргийг илрүүлж чадахгүй байгаа нь хууль хяналтьын байгууллагынхан ажлаа хийж чадаж байгаа эсэх, хуулиар хүлээсэн үүргээ гүйцэтгэдэг эсэхэд асар том эргэлзээ төрүүлж байна" гэлээ. 

Б.Бадрал