Өчигдөр Улсын Дээд шүүх хуралдаж Ардчилсан намын даргын асуудлыг хэлэлцсэн байна. Энэ талаар Ардчилсан намын Хэрэг эрхлэх газраас мэдээлэл хийлээ. Тус намын даргын үүрэг гүйцэтгэгч, УИХ-ын гишүүн Ц.Туваан хэлэхдээ  “Ардчилсан намын аравдугаар Их хурал өнгөрсөн 12 дугаар сард хуралдаж, АН-ын үндсэн дүрмийн нэмэлт өөрчлөлтийг хэлэлцэн баталсан. Уг өөрчлөлтөө бүртгүүлэхээр Улсын Дээд шүүхэд өгсөн. Улсын Дээд шүүх өчигдөр хуралдаж манай намын үндсэн дүрмийн нэмэлт өөрчлөлтийг тодорхой шалтгаануудын улмаас бүртгэж авсангүй. Тухайлбал, “Улсын Дээд шүүх үндсэн дүрмийн нэмэлт өөрчлөлтийн зарим зүйл заалт ойлгомжгүй байна. Мөн тодорхойгүй өөрчлөлт орсон байна” гэсэн. Ардчилсан намын Аравдугаар Их хурал бол хүчин төгөлдөр. Манай намын 1400 гаруй төлөөлөгч оролцсон. Улсын Дээд шүүх тодруулах зүйл байна гээд буцааж байгаа нь манай намын Их хурал хүчин төгөлдөр болсон гэсэн үг. Шаардсан материалуудыг нь бүрдүүлж өгөөд үндсэн дүрмээ дахин бүртгүүлэхээр Улсын Дээд шүүхэд өгнө. Миний бие Ардчилсан намын дэд даргаар ажиллаж байсан. Дараагийн намын дарга болоход үндсэн дүрмээрээ боломжгүй.

Өмнөх удирдлага нь хариуцлага хүлээж бүгдээрээ огцордог. Тиймээс С.Эрдэнэ дарга, миний бие бүгд хариуцлага хүлээж огцорсон. Гэхдээ намын үйл ажиллагаа тасалдахгүй явна гэдэг утгаараа үүрэг гүйцэтгээд явж байгаа. Би шинэ сонгогдсон намын даргадаа тамгаа гардуулж, эрх үүргийг нь шилжүүлж өгнө. Сүүлийн үед Улсын бүртгэлийн Ерөнхий газар Хууль зүйн яам, эрх баригч МАН-ын бүлэглэлийн гар хөл болж байна. Ардчилсан намыг хоёр хуваах, энэ хүмүүсээр дамжуулж хоёр салсан мэт процессуудыг эрээ, цээргүй явуулж байна. Энэ процесс дээр тухай бүрд нь хариултыг нь өгөх болно. Ардчилсан намынхан шударга ёсны төлөөх тэмцлээ үргэлжлүүлнэ. Бидний замд саад болох гэсэн бүлэглэлийн эрх ашигт няцаалт өгч, устгаж явах болно. Мөн Улсын дээд шүүхэд бүртгэгдсэн байсан миний нэр цахим бүртгэлээс хасагдсан. Үүнийгээ тодорхой болгоод дахин бүртгүүлэхээр өгнө. Ардчилсан намын үйл ажиллагаа хэвийн үргэлжилж байгаа” гэлээ.

НИЙСЛЭЛИЙН АН-ЫН ДАРГА Д.ПҮРЭВДАВАА “Өнгөрсөн хэд хоногийн дотор Ардчилсан намыг салсан мэтээр нийтэд ойлгуулах хүмүүс их байлаа. Өнөөдөр 21 аймаг, есөн дүүргийн АН-ын үйл ажиллагаа хэвийн явагдаж байна. 2017 онд бүртгэлийн асуудал буцаж байсан. Улсын Дээд шүүхээс зарим нэг заалтыг тодруулахаар буцааж байсныг тухайн үед С.Эрдэнэ дарга засаад өгч байсан. Өнгөрсөн жилүүдэд ЖДҮ сангаас зээл авсан, 60 тэрбумын хэргийг АН ил болгож байсан. Мөн оффшор бүсэд хөрөнгөө байршуулсан хүмүүсийг ил болгож, хөрөнгийг нь эх орондоо авчрах ажлыг зохион байгуулж байгаа. Энэ нөхдүүдийн эрх ашиг хөндөгдөж байгаа учраас АН-ын үйл ажиллагаанд гаднаас нөлөөлж байна. Харамсалтай нь манай өмнөх удирдлага дээрх нөхдүүдэд ашиглуулж байна гэж харж байгаа. Ардчилсан нам бол үргэлж зөвийн талд зогсоно, зөрчигдсөн эрхийн талд зогсож дуу хоолойгоо хүргэнэ. Манай намын өмнөх удирдлага маань хадган дээр тавьж өгсөн тамгаа үрэгдүүлчихсэн мэтээр ярьж, гомдол гаргаад тэр тамгыг нь эрх баригч намын хэрэгжүүлэгч агентлаг нь өдөрт нь гаргаж өгөөд бүртгэлийн маргааныг үүсгэж байгаа нь хар дагуулж байгаа юм. Манай намын дэмжигчид намынхаа үйл ажиллагаанд бат итгэлтэй байж болно” гэлээ.