Удаа дараагийн сонгуулийн ялагдлаас хойш Ардчилсан намынхан даргаа солих гээд мунгинасаар л байна. 2020 оны УИХ-ын сонгуульд ялагдал хүлээсэн намын дарга С.Эрдэнэ “Хариуцлагаа хүлээж байна” гэдгээ өөрийн биеэр мэдэгдэж, тамгаа УИХ-ын гишүүн Ц.Туваанд гардуулж өгсөн билээ. Харин Ардчилсан намын даргын түр орлон гүйцэтгэгч Ц.Туваан нь намын Их хурлыг хуралдуулсан нь “асуудал” үүсгэв. Учир нь,намын хуучин дарга С.Эрдэнэ Ц.Тувааныг “Түр орлон гүйцэтгэгч байж Их хурал зарлан хуралдуулах эрхгүй, хууль зөрчиж байна” хэмээн үзэж, 24 цагийн дотор “Тамгаа хүлээлгэж өгөхийг шаардсан” билээ. Гэвч шаардлагыг хүлээж аваагүй учраас “Улсын бүртгэлд С.Эрдэнэ АН-ын дарга хэвээрээ байгаа” гэдгээ дахин мэдэгдэж “Түр эрхийг цуцлах тухай” тушаал гарган Ц.Тувааныг намын даргаас чөлөөлсөн байна. Ингээд С.Эрдэнэ, Ц.Туваан нар түнжин хагарч, Ардчилсан намын тамгаа “булаацалдсан” Их хурал болж өндөрлөв.

      Уг нь тэд нэг үе Ардчилсан намын дарга, дэд даргын алба хашиж байсан, “Шонхор” фракцынх гэж хэлж болно. С.Эрдэнийг намын даргаар ажиллаж эхэлсэн үеэс Ц.Туваан нь намын Ерөнхий нарийн бичгийн даргаар томилогдож, дараа нь дэд даргын алба хүртэл хашсан билээ. Гэвч 2020 оны Их хурлын сонгуулийнялагдлын дараа С.Эрдэнэ “улс төрийн соёл” гаргаж албан тушаалаа өөрийн “итгэлт хүн” гэгдэх Ц.Туваанд хүлээлгэж өгсөн нь тэдний муудах шалтгааны эхлэл болжээ.

Учир нь, УИХ-ын гишүүн Ц.Туваан “Шонхор” фракцын ч биш угтаа МОАХ-аас гаралтай нэгэн. Үүнийг нь С.Эрдэнэ мэдэхийн дээдээр мэдэж буй. Гэхдээ олон жил намын гал тогоонд ажилласан түүнийг өөрийнхөө фракц хэмээн бодож явсан биз. Гэвч УИХ-ын гишүүн Ц.Туваан намын тамгаа авснаас хойш МОАХ тэр дундаа Ерөнхийлөгч Х.Баттулгын эгнээнд шилжсэн гэх мэдээлэл бий. 

    Тэгвэл энэ удаагийн Их хурлыг Ерөнхийлөгч Х.Баттулга “хайрцагласан” гэдгийг намын зарим залуус хэлж байна. Цахимаар хуралдсан учраас өмнөх шигээ “гал гарсан” хурал болоогүй байж мэдэх. Гэвч намын даргын асуудал ч , Үндсэн дүрмийн өөрчлөлт ч тэр бүгд тодорхой болчихсон, нэг ёсондоо үлбэгэр хурал байсан гэх. Тодруулбал, Ардчилсан намын дараагийн даргаар Монголын Үндэсний Худалдаа аж үйлдвэрийн танхимын Ерөнхийлөгөөр ажиллаж байгаа О.Амартүвшингийн нэр тодорхой яригдаж эхэлсэн байна. Түүнийг МҮХАҮТ-ын Ерөнхийлөгчийн албан тушаалд томилогдоход Ерөнхийлөгч Х.Баттулгын дэмжлэг орсон гэх яриа ч бий. Энэ нь ч үнэнийн ортой. 

Тухайлбал, Ерөнхийлөгчийн гаргасан өрх бүрд нэг сая төгрөг олгох саналыг МҮХАҮТ-аас гар өргөн дэмжиж, аж ахуйн нэгжүүдийнхээ судалгааг танилцуулж байсан билээ. Түүнчлэн Ерөнхийлөгчийн Тамгын газар болон МҮХАҮТ хамтран “Малчдад ээлтэй төр” хүмүүнлэгийн төслийг өнгөрсөн  арваннэгдүгээр сард хэрэгжүүлсэн байна. Ингэхдээ нэг бог малын үнийг 30000 төгрөгөөр тооцож, урьдчилгаа 10 хувийг гэрээнд тусгагдсан дансанд шилжүүлж, үлдэгдлийг зургаан сарын дотор олгож байгаа аж. Энэ мэт тэдний хамтын ажиллагаа үргэлжилж буй. 

       Харин О.Амартүвшин энэ удаагийн Их хуралд нэлээд чухал үүрэг гүйцэтгэж оролцжээ. Ингэхдээ “Ардчилсан намын удаа дараагийн улс төрийн сонгуульд ялагдсан шалтгааныг судалсан дүгнэлт”-ийг нийт гишүүдэд танилцуулсан байна. Хэрвээ АН-ын даргаар сонгогдвол “Дараа, дараагийн сонгуульд ийм алдаа гаргахгүй” гэсэн түүний далд санаа байж болох. Он гараад 2021 оны Ерөнхийлөгчийн сонгуулийн ажил эхэлнэ. Ардчилсан намынхан дотооддоо “бужигнаантай” байгаа учраас энэ байдлаараа Ерөнхийлөгчийн сонгуульд оролцвол дахиад ялагдал хүлээхийг үгүйсгэхгүй. Тиймээс Ерөнхийлөгч Х.Баттулга Ардчилсан намыг өөрийн болгож, “зангидаад”, О.Амартүвшинг намын даргаар сонгож, Ерөнхийлөгчийн сонгуульд хүч үзэх магадлал өндөр байна.