Ардчилсан нам X Их хурлаа өчигдөр цахимаар хийсэн. Эхний өдрийн хурлаар намын даргаа бүх гишүүдийн саналаар сонгодог дүрмийг өөрчилж, ҮБХ, Их хурал гэсэн хоёр шатлалаар сонгох асуудлыг хэлэлцсэн байна. Харин өнөөдөр үргэлжлүүлэн намын дотоод асуудлаар хуралдахаар болсон байна. АН-ын даргын үүргийн түр орлон гүйцэтгэгч Ц.Туваан намын түр удирдлагын хувьд ҮБХ-гоо хуралдуулж, Их хурлаа зохион байгуулж байгаа юм. Харин АН-ын өмнөх дарга С.Эрдэнэ "Намынхаа Үндсэн дүрмийг барьж ажиллах нь Улс төрийн намын тухай болон бусад хуулиар хүлээсэн үүрэг. Үүнийг зөрчих эрх хэнд ч байхгүй. Дүрмийн бус үйл ажиллагаа явуулж байна. Тиймээс намын даргын тамга тэмдгийг 24 цагийн дотор хүлээлгэн өгөх ёстой гэсэн байр суурийг илэрхийлсэн юм. Мөн өчигдрийн хуралдаанаар Үндсэн дүрмийн нэмэлт өөрчлөлтийг хэлэлцэж өөрчлөлт тус бүрд санал хураалт явуулснаар өндөрлөсөн юм.