Тэргэнцэртэй сэлэмний  тамирчин Дамбийбалжирын Цолмон Дорнод аймгийн Баянтүмэн суманд 1992 онд мэндэлжээ. Тэрбээр 2019 оноос тэргэнцэртэй сэлэмний спортоор хичээллэж эхэлсэн байна. Одоо зургаа дахь жилдээ хичээллэж байгаа. Д.Цолмон ер нь багын урлаг, спортод дуртай хүүхэд байжээ. Өмнө нь тэргэнцэртэй марафонд уралддаг байсан юм. 2010 оноос эхлэн тэмцээн уралдаанд орж эхэлсэн. Хамгийн сүүлд 2012 онд Монголын бүх ард түмний XIII их наадмын 800 м-ийн зайн  марафоноос алтан медаль хүртсэн.

   Харин 2019 онд тэргэнцэртэй сэлэмний анхны тэмцээнээс алтан медаль хүртсэн. Тэр үеэс хойш нийт 12 алтан медаль хүртсэн. Улсын аварга шалгаруулах тэмцээнд дөрвөн удаа түрүүлж, гурван алтан медаль хүртсэн байгаа. Хамгийн сүүлд Азийн аваргаас хүрэл медаль хүртсэн амжилт гаргаад байгаа юм. Тэрбээр “Wheelchair fencing”-ийн  дасгалжуулагч Мөнхтулга, Гэрэлмаа, хүчний бэлтгэлийн дасгалжуулагч Хүсэлтүвшин нарын удирдлага дор бэлтгэл, сургуулилалтаа хийдэг.

    Д.Цолмон 2019 оноос туялзуур сэлэмний  спортоор хичээллэж, 2022 онд анхны УАШТ зохиогдсоноос хойш 2022, 2023, 2024, 2025 онуудад  дараалан дөрвөн удаа түрүүлээд байгаа манай улсын шилдэг тамирчдын нэг юм. Амьдрал түүнд хатуу хандаж, өсвөр насанд нь тэргэнцэр дээр суулгасан ч шантралгүй хичээж,  зүтгэсээр өнөөгийн амжилтад хүрсэн юм. Түүний хувьд маш их хөдөлгөөнтэй, урлаг, спортын авьяастай, сагс, волейбол тоглодог идэвхтэй хүүхэд байв. Гэтэл 2004 онд хавирганы  нь доогуур  хатган өвдөх болжээ. Эмчид үзүүлж, шинжилгээ өгөхөд элэг, бөөр, цөс гэж янз бүрийн онош хэлсээр хугацаа алдсан байна.

     Улмаар 2005 он болоход гишгэж ч чадахаа больж, гуравдугаар эмнэлэгт яаралтай хагалгаанд оржээ. Энэ үед нуруу, нугасны хавдартай болох нь илэрсэн байна. Хагалгааны дараа Д.Цолмонд эмч нар  “Чамайг эргээд хөл дээр чинь босгож  чадна  гэсэн амлалт өгч чадахгүй. Ямар ч байсан амь насыг чинь аварч чадлаа. Бүх зүйл чиний гарт байгаа. Алхаж, чадах үгүй нь чамаас л шалтгаална” хэмээн  хэлжээ.  Эмч нар сэтгэлийн тэнхээтэй байвал  удахгүй алхдаг болно гэж сэтгэл санаагаар дэмжсэн байна. Харин Д.Цолмонд  тэсэхийн аргагүй  өвдөлт нь хагалгааны дараа гайгүй болсон ч юм шиг санагджээ.  Тийм болохоор  түр боловч сэтгэл нь тайвширчээ.

    Тэр цагаас эхлэн тэргэнцэр дээр суудаг  болжээ.  Эхэндээ  түүнд хэцүү санагдаж байгаагүй аж.  Сайн найз нөхдийнхөө хүрээлэл дунд түүний өсвөр нас өнгөрсөн болохоор сэтгэл, санаагаар унаж,  айхтар их зовж шаналаагүй гэдэг.  Хэзээ нэгэн цагт алхдаг болно гэсэн итгэл найдвар тээсээр байжээ.  Гэхдээ өөрийн хувь тавиланд одоо хүртэл харамсаж байсан удаа байгаагүй  гэсэн лээ.  Д.Цолмон “Хавдрын өвчнийг даван туулан гарч, амьд яваа минь их хувь тавилан, аз завшаан юм. Хүний амьдралд зовлон, жаргал ээлжилдэг хорвоо, ертөнц шүү дээ. Амьдралын өмнө сөхөрч, гудайлгүй, эрүүл саруул хүмүүсийн адил амьдарч яваадаа баяртай байдаг даа” гэж  хэлж байлаа.

    Тэрбээр найзынхаа зөвлөснөөр тэргэнцэртэй бүжгийн спортоор хэсэг хугацаанд хичээллэж,  дараа нь Эрдэнэцогт дасгалжуулагчийн удирдлага дор тэргэнцэртэй марафоны тамирчин болж үзжээ.  Аль болохоор өвчин, зовлонг мартаж, өөрийгөө завгүй байлгаж, цагийг үр бүтээлтэй, өөдрөг хүсэл тэмүүлэлтэй амьдрахыг хичээж байв.  Д.Цолмон тэргэнцэртэй миссийн тэмцээнд орж, тэнгэнцэртэй бүжгийн жүжигт хүртэл тоглоод амжив.

   Ингээд 2012 онд  Монголын бүх ард түмний спартакиадын тэргэнцэртэй марафонд түрүүлж, спортод төрөлхийн авьяаслаг нэгэн болохоо харуулжээ.  Гэхдээ цээж, гарын булчин томорч өрөөсгөл байдлаар  хөгжих нь  эмэгтэйлэг шинжээ алдан, зохимжгүй харагдах юм байна гээд марафоны спортоо орхижээ. Харин 2019 оноос тэргэнцэртэй сэлэмний  спортоор хичээллэж эхэлсэн нь түүний амьдралыг эрс өөрчилжээ

    “Хамгийн их таалагдсан зүйл нь туялзуур сэлэмнийй хувцас хэрэглэл байсан гэдэг. Цав цагаан өмсгөл, хар дуулга өмсөөд, чичлүүр сэлмээр тулалдахаар нэг л тийм баатарлаг, хүчирхэг нэгэн болсон мэт санагдсан”  гэсэн.  Харин түүний  анхны  оролцсон УАШТ нь маш ширүүн өрсөлдөөнтэй болжээ. Өрсөлдөөн дундаас ялагч болон түрүүлэх мэдрэмж  Д.Цолмонд гайхалтай санагдсан гэдэг.  Тийм болохоор тэр УАШТ-ий анхны алтан медаль түүний  хувьд үнэ цэнтэй санагддаг гэнэ лээ.  2022 оны улсын  аваргын төлөөх тулаанд 14:14-өөр тэнцээд,  шийдвэрлэх оноог авч, ялалт байгуулжээ. Харин  2023, 2024, 2025  оны хоёр улсын аваргад бусдаасаа илүү их хичээж, бэлтгэл сургуулилалтаа тасралтгүй хийдэг байсны ачаар торох зүйлгүйгээр  түрүүлж  чаджээ.