“Дорноговь симба” хамтлагийнхантай уран бүтээлийнх нь талаар ярилцлаа. Гэхдээ тэд хамтлагийнхаа нэрийг “Соёмбо” болгон өөрчилж, уран бүтээлээ туурвиж эхэлжээ. 

-Хамтлаг болж нэгдэхээс өмнө бие биеэ таньдаг байв уу? 

    Ц.Лхамжав: Тийм ээ, бид багын найзууд. Арван жилдээ нэг сургуульд сурч, хамтдаа урлагийн үзлэгт оролцдог байлаа. 2007 оноос Дорноговь аймгийнхаа Данзанравжаагийн нэрэмжит “Саран хөхөө” театрт нэг дуучнаар ажилласан юм. Харин 2008 онд “Хос тэнгэр” нэртэй анхны хамтлагаа байгуулсан. Хамтлагийнхаа анхны нэрийг ингэж нэрлэх болсон шалтгаан нь их сонин. Тухайн үед БНХАУ-ын Эрээн хотод Монгол туургатны дууны их наадам болсон юм. Энэ уралдаанд бид оролцохдоо хамтлагийнхаа нэрийг “Хос тэнгэр” гэж нэрийдээд, үзэгчдийн нэрэмжит шагнал хүртэж байлаа. 

-Соёмбо хамтлагийг “Дорноговь симба” нэрээр нь хүмүүс андахгүй шүү дээ. Хамтлагаа яагаад ингэж нэрлэх болсон юм бэ? 

     Б.Ууганбаяр: Хамтлагийнхаа нэрийг “Дорноговь симба” гэж нэрлэх болсон түүх 2009 оноос эхлэлтэй. Тухайн үед “Гурван бүдүүн” хамтлагийн уран бүтээл олон нийтэд түгж, хит болж байлаа. Бид ч бас хамтлагийнхаа нэрийг ийм содон байдлаар өгч, уран бүтээлээ бусдад таниулахаар шийдсэн нь энэ. Хамтлагийн минь нэрэнд гэр бүл, найз нөхөд минь дуртай байсан. Учир нь, тэр үед хошин урлагийн нэгэн продакшн “Дорноговь симба” гэх хамтлагийн тухай хөгжилтэй үзүүлбэр үзүүлж, олонд нэлээд танигдаад байсан үе. Тийм ч учраас бид энэ нэрээр нэрлэх нь зөв юм байна гэж бодсон л доо. 

Хэдий хошин байдлаар “Дорноговь симба” хэмээн нийгэмд танигдсан ч бид үүнийг уран бүтээлээрээ дамжуулан илүү өөрөөр харуулах гэж зорьсон. Ер нь бол хошин шогийн тэр продакшн манай хамтлагийн сурталчилгаа, менежментийг эрт хийчихсэн гэсэн үг. Тиймдээ ч бид 2019 он хүртэл нийтдээ 10 жил “Дорноговь симба” нэрээрээ олон хит уран бүтээл туурвижээ.

-Албан ёсоор хамтлагаа байгуулсны дараах уран бүтээлээс дурдахгүй юу? 

   Ц.Лхамжав: Бидний анхны уран бүтээл Н.Данзандоржийн үг, Ч.Цэцэгмаагийн аялгуу “Хадамд гарсан бүсгүй” хэмээх дуугаар эхэлж байлаа. Нутгийн уран бүтээлчид ая, үгийг нь зохиож, бид дүрсжүүлэн цацсан юм. Энэ уран бүтээл минь цацагдсан даруй Монгол орон даяар хит болж, “Дорноговь симба” гэх нэрийг улам ч таниулж эхэлсэн дээ. 

-“Хадамд гарсан бүсгүй” дуу санамсаргүйгээр олон нийтэд цацагдаж байсан тухай сонссон. Энэ тухай хуваалцвал?

    Б.Ууганбаяр: Тухайн үед Дорноговь аймагт дууны мэргэжлийн студи гэж байгаагүй. Тийм болохоор бид “Хадамд гарсан бүсгүй” дуугаа ширээний ард микрофон барьж суугаад дуулчихсан. Ингэж бичигдсэн дуугаа компьютер дээр хадгалаад орхитол Дорноговь аймгийн FM-д ажилладаг найз минь хуулж аваад цацчихсан. Түүнээс хойш хүн бүрийн сэтгэлд хоногштолоо FМ-ээр цацагдаж, захиалгын дууны тоонд багтах болсон. Түүнээс хойш бид албан ёсны уран бүтээл болгохоор “F” студийг зорин, дуугаа дүрсжүүлэн, албан ёсны уран бүтээл болгож байлаа. 

-Анхны уран бүтээлээс бусад уран бүтээлийнхээ тухай ярьж өгөөч? 

Ц.Лхамжав: “Хадамд гарсан бүсгүй” дуунаас хойш цөөнгүй дуу олон нийтэд хүргэсэн байна. Тухайлбал, “Миний майгахан Думаа”, “Миний амьдралын бэлэг” зэрэг хит дуу бий. Тиймдээ ч нийт уран бүтээлээрээ 2018 онд “Хадамд гарсан бүсгүй” нэртэй анхны дуун цомгоо сонсогчдодоо хүргэсэн.

-Олонд танигдаад байсан хамтлагийнхаа нэрийг “Соёмбо” хэмээн өөрчлөх болсон шалтгаан нь юу юм бэ? 

     Б.Ууганбаяр: 2019 онд Дорноговь аймгийн хүргэн “Харанга” хамтлагийн дуучин Х.Лхагвасүрэн ах айлын найранд бидэнтэй таарч, хамтлагийнхаа нэрийг солих санал дэвшүүлсэн. Тэр 10 гаруй жилийн түүхтэй хамтлагийнхаа нэрийг өөрчилж, илүү олон уран бүтээл туурвиж, үзэгч түмэнд хүрэх ёстой гэж зөвлөсөн юм. Нэрний утга учир мөн л сонин. “Харанга” хамтлаг анх байгуулагдахдаа цахилгаан хөгжмийн “Соёмбо чуулга” нэртэйгээр байгуулагдсан юм билээ. Тийм ч учраас Лхагвасүрэн ах “Хоёр дүү минь цаашид илүү сайхан дуун уран бүтээл туурвиарай гэж ерөөгөөд анхны нэрээ хайрлая” гэсэн. Ингээд бид 2019 онд хамтлагаа “Соёмбо” гэж албан ёсоор нэрлэсэн. 

-“Соёмбо” хамтлагийн анхны уран бүтээлээс дурдахгүй юу? 

    Ц.Лхамжав: Хамтлагаа “Соёмбо” гэж нэрлэсний дараа “Хар сарнай” хамтлагийн С.Амармандах ахтай хамтран “Миний Монгол” хэмээх уран бүтээлийг сонсогч олондоо дүрсжүүлэн хүргэсэн. Энэ нь цэвэр Монгол үндэсний урлаг буюу хөөмий, морин хуурын аялгуугаар бүтсэн. Түүнчлэн гучин гурван говийн магтаал зэрэг уран бүтээлийг цэвэр хөөмийн аялгуугаар дуулсан.

-Хамтлаг бүрд өөрийн гэсэн онцлог, донж гэж бий. “Соёмбо” хамтлагийн онцлог юу вэ?

    Б.Ууганбаяр: Манай хамтлаг Үндэсний соёл урлагыг дамжуулан орчин үеийн хэв маягтай нийцүүлж, цоглог, хурдтай хэмнэлд тохируулан уран бүтээлээ хийдэг. Тийм ч учраас үзэгчид бидний уран бүтээлд сэтгэл хангалуун байдаг байх. Бидний олонх уран бүтээл нутгийн ая зохиогч, яруу найрагчидтай холбоотой. Учир нь, Дорноговийн уран бүтээлчдийнхээ бүтээлийг олонд хүргэхийн төлөө зорьдог. Өөрөөр хэлбэл, бидний уран бүтээлтэй нутаг минь салшгүй холбоотой байдаг. 

-Бидний урилгыг хүлээн авч сонирхолтой яриа өрнүүлсэнд баярлалаа.

-Баярлалаа.