-Эмч нарын буруутай үйлдлээс болж эх, нярай амиа алдсан эсэхийг тогтоохын тулд дахин шинжээч томилжээ-

         Ховд аймгийн Булган сумын Эрүүл мэндийн төвд эх, нярай эндсэн харамсалтай хэрэг гарсан талаар бид өмнө мэдээлсэн. Тодруулбал, өнгөрсөн дөрөвдүгээр сарын 29-нд 33 настай Э гэх эмэгтэй амаржихаар сумынхаа эмнэлэгт очоод, дөрвөн цаг эмнэлгийн орон дээр тарчилж, амиа алдсан байдаг. Тэрээр амаржиж, охинтой болсон ч нярай мөн хоёр хоногийн дараа сумын эмнэлэгт цахилгаан хоёр цаг тасарсны улмаас сормуус амьдаараа хатаж, амьсгал хураасан ноцтой хэрэг гарсан билээ.

     Эх, хүүхдийг эх барьж авсан тус эмнэлгийн эмэгтэйчүүдийн их эмч н.Мөнхнаран одоог хүртэл хариуцлага үүрэхээс мултарч, эмнэлгийн дарга болох нөхөр нь хаацайлж, шүүх шинжилгээний дүгнэлт гарахгүй удаж байна гэх гомдлыг талийгаачийн ар гэрийнхэн манай сайтад өгсөн ярилцлагадаа дурдсан билээ. Талийгаачийн хадам ээж энэ талаар ярихдаа “Бэр минь гурван удаа төрөхдөө өөрөөрөө төрж байсан юм. Ингэхдээ бага зэргийн хүндрэлтэй төрдөг байсан гэсэн. Тийм учраас хийсвэр хагалгаагаар төрмөөр байна гэдгээ хяналтын эмчдээ хоёр ч удаа хэлсэн байдаг. Гэтэл эмч нь “Өмнө нь өөрөөрөө төрж байсан юм чинь энэ удаад ч бас өөрөөрөө төр” гэж хэлж, хийсвэр хагалгаа хийгээгүйгээс болж ийм аймшигт зүйл боллоо. Нярай нь 4.8 кг төрсөн. Охин минь маш их хэмжээний цус алдаж, цус сэлбэх гэсэн боловч сумын эмнэлэгт байгаа цус нь хөлдүү байсны улмаас яаж ч чадаагүй. Донор болох хүнийг нь манай хүүхдүүд гэрээс нь шөнө аваад ирэхэд охин минь хэдийн амьсгал хураасан байсан. Эмнэлгийн зургаан эмчийг манай хүү гэрээс нь шөнө дунд авчирсан. Ямар ч бэлэн байдал хангаж ажиллаагүйн улмаас ийм хэрэг болсон. Миний охиныг гардаж хариуцсан эмч н.Мөнхнаран нь Эрүүл мэндийн төвийн дарга н.Батбаатарын эхнэр юм. Өнөөдрийг хүртэл бидэнтэй уулзаж, эмгэнэл илэрхийлээгүй. Ийм л цэвдэг сэтгэлтэй хүмүүс байна. Хар нялхаараа ээжээсээ өнчирч үлдсэн гурван үрийг нь, залуугаараа ханиасаа хагацсан нөхрийг нь ч тэд хүн гэж үзсэнгүй. Биднээс ядаж уучлалт гуйвал тайвширна шүү дээ.

Булган суманд хоёр цаг цахилгаан тасарсны улмаас хүчилтөрөгч дутагдаад нярай минь хоёр хоногийн дараа эндчихсэн. Нүдний бүрхүүл гэдэг чинь сормуусаараа чийглэгдэж байдаг. Гэтэл нярайгийн маань нүдний бүрхүүл амьдаараа хатчихсан байсан. Нярайгаа амьдарсан хоёр хоногийн хугацаанд тийм байдалтай байгааг нь харах амьдын там юм билээ. Харахаас нүд хальтрам, хүн болох гэж ирсэн нялх ачийгаа тийм байдалтай байгааг харсаар байгаад явууллаа. Бурхан болсных нь дараа цогцос нь цогцос хадгалах өрөөнд муудчих гээд байхаар нь бид гэрээсээ хөргөгч авчирч, нярайгаа хийсэн. Ийм л гашуун, эвлэрч чадахгүй хэцүү юм боллоо. Шүүх шинжилгээний дүгнэлт үнэн зөв гараасай гэж бодож сууна” гэж байсан юм.

Тэгвэл эндсэн эхийн шүүх шинжилгээний дүгнэлт тавдугаар сарын 31-нд гарчээ. Тодруулбал, “Эхийг хийсвэр хагалгаагаар төрүүлээгүйн улмаас саванд язралт, цус алдсаны улмаас нас барсан” гэх урьдчилсан дүгнэлт гарсан байна. Мөн “Ховд аймгийн Булган сумын эмнэлэг талийгаач Э-г хүлээн авсан болон төрөлт удирдсан эмч нар эхийг хянаагүй, эх барихын ужиг, хожуу хордлоготой, бүхий мэс заслын заалттай эхийн төрөлтийг буруу удирдаж төрөх замаар хүчлэн төрүүлснээс умай урагдаж цус алдан эх эндэхэд хүргэсэн. Мөн умайн урагдлыг яаралтай оношилж, мэс засал эмчилгээг шийдвэрлэх арга хэмжээг аваагүй байна” гэсэн дүгнэлт гарсан байна. Түүнчлэн эмч нарын буруутай үйлдлээс эл хэрэг болсон гэдгийг тогтоохын тулд дахин шинжээч томилжээ. Мөн нярай ямар шалтгааны улмаас нас барсан шүүх дүгнэлт одоогийн байдлаар гараагүй байна.

Талийгаач эмэгтэй айлын ганц охин байжээ. Тэрээр дөрөв дэх хүүхдээ төрүүлэхээр сумын эмнэлэгтээ очсон ч харамсалтайгаар амиа алдсан юм. Нөхөр, гурван хүүхэд нь сэтгэл санааны хямралтай, хүнд нөхцөлд байгаа талаар талийгаачийн ар гэрийнхэн хэлэв.

    Энэ талаар талийгаачийн аав “Охин минь “Өөрөөрөө төрнө гэнэ, ааваа” гэж хэлсэн ч удахгүй нас барчихлаа. Би тухайн өдөр гэртээ байсан юм. Шөнө 05:00 цагийн үед эмнэлгээс яаралтай дуудагдаж, очсон ч охин минь хэдийн амьсгал хураасан байсан. Ганц охин минь үртэйгээ цуг бурхан болчихлоо. Дахиж энэ эмнэлэгт ийм хэрэг битгий болоосой гэж бодож сууна. Эх, үртэйгээ цуг эмнэлгийн орон дээр бурхан болчихсон гэхээр гомдолтой байна” гэлээ.