Баянзүрх дүүргийн нутаг дэвсгэр Улиастайн гүүрний орчимд Тээврийн цагдаагийн албаны цагдаа машинд мөргүүлж, хүнд гэмтэл авсан ноцтой  осол гарчээ. Хэргийн талаар албаны эх сурвалжаас авсан мэдээллээр Хан-Уул дүүргийн цагдаагийн хэлтсийн ахмад цолтой нэгэн алба хаагч ажил үүргээ гүйцэтгэж явсан замын цагдааг автомашинаараа мөргөж, хүнд гэмтэл учруулсан  гэнэ.  Юунаас болж цагдаагийн алба хаагчид  нэгнийгээ  автомашинаар мөргөсөн бэ гэдгийг Цагдаагийн ерөнхий газрын харьяа Тусгай субъектийг шалгах хэлтэс шалгаж, тогтоохоор ажиллаж байгаа аж.  Машинд мөргүүлсэн цагдаагийн алба хаагчийн биеийн байдал тааруу, эмнэлэгт хэвтэн эмчлүүлж байгааг эх сурвалж онцолж байна. Мөн Цагдаагийн ерөнхий газраас Ерөнхийлөгчийн сонгууль болох гэж байгаа энэ үед дээрх хэрэгтэй холбоотой ямар нэгэн мэдээлэл задруулж болохгүй. Хэргийг чандлан нууцалж шалгах үүрэг даалгавар өгсөн гэнэ.