Эхнэр нь нөхрийнхөө өмнөөс шинжилгээ өгдөг байсан зөрчил илэрчээ. Тодруулбал, нөхрийгөө орон нутагт ажиллахаар явах бүрт эхнэр нь коронавирусийг илрүүлэх шинжилгээ өгдөг байсан гэнэ. Ингэсээр хамгийн сүүлд өгсөн шинжилгээний хариу нь эерэг гарсан байна. Ингээд ХӨСҮТ-өөс ойрын хавьтлыг тусгаарлах, илрүүлэх ажил өрнүүлэх үеэр ийм зөрчил илэрсэн гэнэ. Мөн үүнээс гадна хэд ийм тохиолдол илэрчээ.

Энэ талаар ХӨСҮТ-ийн Тандалт, судалгааны албаны дарга Ж.Байгалмаагаас тодруулахад “Эрүүл мэндийн яамны 11:00 цагийн мэдээллээр энэ талаар хариулах байх. Би энэ талаар мэдэхгүй” гэв.

Харин баттай эх сурвалжийн мэдээлснээр “Иргэний үнэмлэхийг нь шалгахгүйгээр эхнэрээс нь шинжилгээ авдаг байсан юм билээ. Регистерийн дугаараар нь шинжилгээний цахим бүртгэлд оруулсан гэсэн үг. Уг нь бол иргэний үнэмлэхийг нь тулгаж үзэх ёстой байдаг. Ачаалал ихтэй байснаас ийм үйлдэл гаргасан байж болзошгүй” гэв.

Мөн үүнээс гадна ХӨСҮТ-ийн ажилтан шинжилгээний хариуг хуурамчаар үйлддэг байсан гэх мэдээлэл ч гараад байна.