Ч.ТАМИРАА: ЭРГЭЛТ.МН МЭДЭЭЛЛИЙН САЙТЫН СЭТГҮҮЛЧИЙН БИЧСЭН НИЙТЛЭЛИЙН ДАГУУ НЭР ДУРДАГДСАН ГААЛИЙН 11 АЛБАН ХААГЧИЙГ АТГ-Т ШАЛГУУЛАХААР ХАНДЛАА

            Манай сэтгүүлч Б.Цогтбаяр Улаанбаатар хот дахь Гаалийн газрын улсын байцаагчдаас хөрөнгөөрөө тэргүүлдэг 13 байцаагчийн мэдээллийг баримттайгаар мэдээлж, “ХОТЫН ГААЛИЙН ТОЛГОЙ БАЯН БАЙЦААГЧИД” нийтлэлийг арваннэгдүгээр сарын 17-нд бичсэн билээ. Тэгвэл манай нийтлэлийн мөрөөр Гаалийн ерөнхий газраас мэдээлэл хийж, нэр дурдагдсан гаалийн байцаагчдыг Авлигатай тэмцэх газарт шалгуулахаар болжээ.

Тодруулбал,

            Гаалийн ерөнхий газрын Хуулийн хэлтсийн дарга Ч.Тамираа “Нэр бүхий гаалийн 13 албан хаагч, тэр дундаа албаны дарга, гаалийн улсын ахлах байцаагч, улсын байцаагчийн хөрөнгийн мэдээлэл зарим хэвлэл мэдээлэл, цахим сүлжээгээр цацагдсан. Эдгээр хүний хөрөнгө нь хууль бус хөрөнгө байгаа юм биш биз гэсэн хардлагын үүднээс сурвалжилга бэлтгэсэн байна гэж ойлгосон. Энэ мэдээллийг гаалийн байгууллага хүлээн авч, дотооддоо зохих ажиллагааг хийсэн. Тангараг өргөсөн гаалийн байцаагч, бүх албан хаагч хуулийнхаа дагуу АТГ-т хөрөнгөө мэдүүлэх ёстой байдаг. Хөрөнгөө мэдүүлдэггүй нэг ч албан хаагч байдаггүй.

            Дээрх 13 албан хаагчийг үндэслэлгүй хөрөнгөжсөн байж болзошгүй гэх баримтыг гаргаж, хардах эрхийнхээ хүрээнд сурвалжилга бэлтгэсэн Эргэлт.мн мэдээллийн сайтад бид хүндэтгэлтэй хандаж байгаа. Ийм учраас Авлигын эсрэгийн хуулийн дагуу нэр дурдагдсан 13 албан хаагчийг АТГ-т шалгуулахаар хүсэлт өгөөд байна. Уг эргэлзээтэй мэдээллийг хууль хяналтын байгууллага шалгаж тогтооно. Гаалийн улсын байцаагчийн үндсэн цалин 1.4 сая төгрөгөөс эхэлдэг. Мөн үүн дээр нэмэгдэл, урамшуулал нэмэгддэг. Гэхдээ тэрбумтан болох боломжгүй” хэмээн мэдээлэл хийлээ.  

            Тэгвэл АТГ-аас Гаалийн улсын ахлах байцаагч Б.Охиноо, Б.Солонго, Б.Төгсбаяр, Т.Дулмаа, Л.Долгормаа, улсын байцаагч Ж.Алтанчимэг, Ч.Байгалмаа, Д.Саранцэцэг, Х.Энхтуяа, Д.Цэцэгсүрэн, Ж.Булга нарын 11 хүний хөрөнгийг шалгахаар боллоо. Харин нийтлэлд дурдагдсан хоёр албан хаагч буюу Улаанбаатар хот дахь гаалийн газрын Хяналт шалгалтын албаны дарга Н.Уранчимэг, гаалийн улсын байцаагч Б.Отгончимэг нар ажлаасаа чөлөөлөгдсөн, тэтгэвэртээ гарсан гэх үндэслэлээр шалгуулах хүний нэрсээс хасагджээ.  

Гаалийн байцаагчдын хөрөнгөтэй холбоотой нийтлэлийг https://ergelt.mn/news/22/single/48775 энд дарж унших боломжтой.