ТӨРИЙН ТОМЧУУДЫН ТАВИУЛ ДЭД САЙДУУД

Ц. АМУНДРА:
Эрэн сурвалжлах

2023-09-12, 1984

Ерөнхий сайд Л.Оюун-Эрдэнийн Засгийн газар 16 дэд сайдтай ажиллаж буй. Бид Засгийн газрын 16 дэд сайдын намтрыг нь “нэгжиж”, хэн нь хэний хүн болохыг нэгтгэж гаргалаа.

ХХААХҮ-ийн дэд сайд М.Ганхүлэг - Л.Оюун-Эрдэнийн туслах

М.Ганхүлэг Хэнтий аймагт төрж өссөн. Түүх сөхвөл, Л.Оюун-Эрдэнэ 2002 онд “Дэлхийн зөн Монгол” ОУ-ын байгууллагын Хэнтий салбарын захирлаар ажиллаж байхдаа “Хүслэн-Хүүхдийн оролцооны удирдах зөвлөл” гэх байгууллагыг байгуулж, удирдаж байв. Энэ байгууллагын анхны гишүүд нь УИХ-ын гишүүн асан Л.Гантулга, ХХААХҮ-ийн дэд сайд М.Ганхүлэг нар юм. Өөрөөр хэлбэл, М.Ганхүлэг Л.Оюун-Эрдэнийг 20 гаруй жил дагаж яваа. Хожим, 2019 онд Л.Оюун-Эрдэнийг ЗГХЭГ-ын дарга болмогц М.Ганхүлэг зөвлөхөөр нь томилогдож, Ерөнхий сайд болсных нь дараа ч улирч ажилласан. Улмаар өнгөрөгч 2022 оны аравдугаар сард дэд сайдаар томилогдсон. Өдгөө М.Ганхүлэг ХХААХҮ-ийн дэд сайдаас гадна Хэнтий аймгийн Нутгийн зөвлөлийн Гүйцэтгэх захирал гэх давхар сэтэртэй. Мөн Л.Оюун-Эрдэнийн төрсөн дүү Б.Баярнэмэхтэй “Ашид пресс” ХХК-ийг хамтран эзэмшдэг нэгэн.

Тайлбар: 2002 он, Л.Оюун-Эрдэнийн "Хүслэн-ХОУЗ"-ийн нээлт- ХХААХҮ-ийн дэд сайд М.Ганхүлэг

Эдийн засаг, хөгжлийн дэд сайд Г.Түвдэндорж-Монголбанкны Ерөнхийлөгч асан О.Чулуунбат агсны хүргэн

Г.Түвдэндорж Ховд аймгийн уугуул боловч хотод төрж өссөн. Г.Түвдэндоржийн хувьд, “Чингис хаан гоулд” ХХК, “Индастриал газ депо” ХХК, “Өндөр Баянцогт” ХХК тэргүүтэй хувийн компаниудаа удирдаж байгаад 2017 онд шууд Сангийн яамны Нягтлан бодох бүртгэлийн газрын дарга болж төрд орж ирсэн. Хувийн компанийн захирлаар Сангийн яаманд газрын дарга болж, удалгүй дэд сайд болж “крандуулсан” Г.Түвдэндоржийн аав нь ч, хадам аав нь ч төрд нөлөөтэй хүмүүс. Тодруулбал, Г.Түвдэндоржийн хадам аав нь УИХ-ын гишүүн асан, Монголбанкны Ерөнхийлөгч асан О.Чулуунбат агсан. Харин аав нь “Капитал” банкны дампууралд гол үүрэгтэй оролцсон гэгдэж, саяхан 3.0 тэрбум төгрөгийн залилангийн гэх хэрэгт холбогдож, хэвлэлийн эхний нүүрүүдэд “заларч” явсан “Торгоны зам групп” ХХК-ийн эзэн, Алдарт уяач Ц.Гантөмөр юм. Г.Түвдэндоржийг анх 2017 онд Сангийн яаманд газрын дарга болж төрд орж ирэх үед аав Ц.Гантөмөр нь УИХ-ын дарга асан М.Энхболдтой хамт ММСУХ-г удирдаж байв.

Тайлбар: 2016 он, О.Чулуунбат агсны охин Ч.Агиймаа, дэд сайд Г.Түвдэндорж

Гадаад харилцааны дэд сайд Г.Амартүвшин - Элчин сайд Ц.Гомбосүрэнгийн хүү

Г.Амартүвшин Өвөрхангай аймгийн уугуул, хотод төрж өссөн. Тэрбээр, УИХ-ын гишүүн асан, Гадаад хэргийн сайд асан, СГЗ Ц.Гомбосүрэнгийн хүү. Гадаад харилцааны яаманд атташе, газрын дарга, тусгай үүрэг гүйцэтгэгч элчин сайдаар ажиллаж байсан. Хамгийн сүүлд, 2021 онд Ерөнхийлөгчийн тамгын газрын Бодлого хэрэгжилтийн газрын даргаар, 2022 Ерөнхийлөгч У.Хүрэлсүхийн зөвлөх, ЕТГ-ын харьяа Монцамэ агентлагын даргаар ажиллаж байгаад Гадаад харилцааны дэд сайдаар томилогдсон.

Барилга хот байгуулалтын дэд сайд Э.Золбоо- Шадар сайд асан, Элчин сайд Ө.Энхтүвшингийн хүү

Э.Золбоо Хөвсгөл аймгийн уугуул, хотод төрж өссөн. Тэрбээр, УИХ-ын гишүүн асан, Шадар сайд асан, ОХУ-д суугаа Онц бөгөөд Бүрэн эрхт элчин сайд Ө.Энхтүвшингийн хүү. 2008 оны УИХ-ын сонгуулиар Ө.Энхтүвшин гурав дахь удаагаа УИХ-ын гишүүнээр сонгогдож, намар нь орон нутгийн сонгуулиар хүү Э.Золбоогоо Хан-уул дүүргийн ИТХ-ын төлөөлөгч болгож, анх төрд оруулсан. Түүнээс хойш Э.Золбоо 2014 онд МАН-ын Ерөнхий нарийн бичгийн даргын зөвлөх, 2016 онд МАН-ын дэргэдэх НАМЗХ-ны Ерөнхий нарийн бичгийн дарга, 2018 онд МАН-ын дарга, Ерөнхий сайд У.Хүрэлсүхийн зөвлөх гэхчилэн намын гал тогоогоор эргэлдсэн. Улмаар 2020 оны долдугаар сард аав Ө.Энхтүвшингээ Шадар сайдаас буухтай зэрэгцэн Барилга, хот байгуулалтын дэд сайдаар томилогдсон.

Цахим хөгжил, харилцаа холбооны дэд сайд Ж.Эрхэмбаатар- Д.Амарбаясгалангийн зөвлөх, Н.Учралын нутгийн найз

Ж.Эрхэмбаатар Хэнтий аймагт төрж, өссөн. Хуульч мэргэжилтэй, “Легас Партнерс”, “Монрос консалтинг”, Эрхэм энд бэркли” зэрэг хуулийн фирмүүдийг удирдаж байгаад 2022 онд Хөгжлийн банкны Үйл ажиллагаа эрхэлсэн дэд захирлаар томилогдож төрд орж ирсэн. Улмаар энэ оны нэгдүгээр сард Цахим хөгжил, харилцаа холбооны дэд сайд болж дэвшсэн. Ж.Эрхэмбаатар дэд сайд болхоосоо өмнө Д.Амарбаясгалангийн зөвлөхөөр ажиллаж байсан. Зөвлөхөө Засагт дэд сайд болгосон гэхэд хилсдэхгүй. Нөгөөтээгүүр, Цахим хөгжил, харилцаа холбооны сайд Н.Учрал мөн Хэнтий аймгийн уугуул бөгөөд Хэнтий аймгийн Нутгийн зөвлөлийн Бизнесийн зөвлөлийн гишүүн, Хэн хэнтийн хүү хөгжлийн сангийн тэргүүнээр ажилладаг. Сонирхуулахад, Н.Учралын аав Н.Ням-Осор нь Хэнтий аймгийн Нутгийн зөвлөлийг санаачлан үүсгэн байгуулж байсан нэгэн. Өөрөөр хэлбэл, Ж.Эрхэмбаатарыг Д.Амарбаясгалан санал болгож, Н.Учрал нутаг нэгтнээ дэд сайд болгож, дэргэдээ авсан гэсэн үг.

Боловсрол, шинжлэх ухааны дэд сайд Г.Ганбаяр- “УБТЗ” ХНН-ын дарга Х.Хэрлэнгийн хадам дүү

Г.Ганбаяр өмнө нь “ТВ-5” телевизийн менежер, НИТХ-ын төлөөлөгч, МАН-ын Удирдах зөвлөлийн Ажлын албаны Хэвлэл мэдээлэл, олон нийттэй харилцах газрын дарга байсан. Улмаар 2018 оны дөрөвдүгээр сард Боловсрол, шинжлэх ухааны дэд сайдаар томилогдож, өдий хүртэл ажиллаж буй. Өөрөөр бол, Г.Ганбаяр БШУ-ны дэд сайдын сэнтийд дархлагдсан нэгэн. Учрыг нь ухвал, Г.Ганбаярын төрсөн эгчийнх нь нөхөр буюу хүргэн ах нь одоогийн “Улаанбаатар төмөр зам” ХНН-ийн дарга Х.Хэрлэн юм. Х.Хэрлэнгийн хувьд, Хэнтий аймгийн уугуул. Тиймдээ ч 2016 онд МАН ялж, Хэнтийнхэн төрийн эрхэнд гарсан цагаас Х.Хэрлэн “Монголын төмөр зам” ТӨХК-ийн Гүйцэтгэх захирал, Ашигт малтмал газрын тосны газрын дарга, “Улаанбаатар төмөр зам” ХНН-ын дарга зэргээр албан тушаалын “амттай” болгон дээр томилогдож яваа. Товчхондоо, Х.Хэрлэн Хэнтийнх гэдгээрээ МАН-аас зөвхөн өөрөө албан тушаал аваад зогсохгүй, хадам дүү Г.Ганбаярыгаа ч БШУ-ны дэд сайдын сэнтийд дархлаад байгаа гэсэн үг юм.

Эрчим хүчний дэд сайд М.Баярмагнай- Г.Занданшатарын нутгийн дүү, О.Чулуунбат агсны хамтрагчийн хүргэн

М.Баярмагнай Баянхонгор аймагт төрж өссөн. УИХ-ын дарга Г.Занданшатарыг 2012-2014 онд МАН-ын Ерөнхий нарийн бичгийн дарга байх үед М.Баярмагнай Баянхонгор аймгийн МАН-ын хорооны даргаар шууд удирдлага доор нь ажиллаж байлаа. Тиймдээ ч М.Баярмагнай төрд “Г.Занданшатарын хүн” гэх хаяг шошготой өдий хүрч буй. Нөгөөтээгүүр, М.Баярмагнайн хадам аав Б.Одгэрэл нь улс төр, бизнест том нөлөөтэй нэгэн. Тодруулбал, М.Баярмагнайн хадам аав Б.Одгэрэл нь УИХ-ын гишүүн асан, Монголбанкны Ерөнхийлөгч асан О.Чулуунбат агсантай хамтран 2006 онд “Ди Эйч Эл Данзаас интернэшнл” ХХК, 2007 онд “Шинэ-Эх говь” ХХК, 2011 онд “Сэлэнгэ-Оч” ХХК-ийг тус тус хамтран байгуулж байсан хамтрагчид. Өдгөө О.Чулуунбат агсны охин буюу Эдийн засаг, хөгжлийн дэд сайд Г.Түвдэндоржийн эхнэр Ч.Агиймаа болон Б.Одгэрэлийн охин буюу Эрчим хүчний дэд сайд М.Баярмагнайн эхнэр О.Хулан нар дээр дурдсан компаниудыг үе дамжуулан хамтран удирдаж буй.

Сангийн дэд сайд С.Мөнгөнчимэг- Ж.Энхбаярын туслах асан, Хэнтийн бэр

С.Мөнгөнчимэг Говь-Алтай аймгийн Халиун суманд төрж, өссөн. Тиймдээ ч 2008-2015 онд Говь-Алтай аймгийн Халиун сумын уугуул, УИХ-ын гишүүн асан, Батлан хамгаалахын сайд асан Ж.Энхбаярын туслахаар ажилласан. Ингээд 2015 онд “МИАТ” ТӨХЗ-д төлөвлөлт, эдийн засгийн хэлтсийн дарга, 2016 онд Хөдөлмөр, нийгмийн хамгааллын дэд сайд, 2020 онд Сангийн дэд сайд болж дэвшсэн. Товчхондоо, түүнийг туслахаас дэд сайд болтол нь дэвшүүлсэн хүн нь Ж.Энхбаяр. Цаашилбал, Сангийн дэд сайд С.Мөнгөнчимэг Хэнтийн бэр. Тодруулбал, С.Мөнгөнчимэгийн нөхөр Д.Бат-Эрдэнийн төрсөн эгч Д.Болортунгалаг нь Монголбанкны Хэнтий аймаг дахь салбарын захирлаар ажилладаг. Харин Д.Болортунгалагийн нөхөр Ж.Ганбаатар нь Хэнтий аймгийн ЗДТГ-ын даргаар ажилладаг. Ж.Ганбаатарын төрсөн дүү нь Сангийн яамны Төрийн нарийн бичгийн дарга Ж.Ганбат. Өөрөөр хэлбэл, Сангийн дэд сайд С.Мөнгөнчимэг, Сангийн яамны Төрийн нарийн бичгийн дарга Ж.Ганбат нар худууд гэсэн үг.

Хууль зүй, дотоод хэргийн дэд сайд Б.Солонгоо- Л.Оюун-Эрдэний Харвардын найз

Б.Солонгоо Ерөнхий сайд Л.Оюун-Эрдэнийн Харвардын найз. Тэд 2015 онд Харвардын их сургуулийг хамт төгссөн. Улмаар 2020 онд Л.Оюун-Эрдэнэ ЗГХЭГ-ын дарга байхдаа Б.Солонгоог ЗГХЭГ-ын дэд даргаар томилж, дэргэдээ авсан. Харин Ерөнхий сайд болсныхоо дараа Хууль зүй, дотоод хэргийн дэд сайдаар томилсон.

Хөдөлмөр, нийгмийн хамгааллын дэд сайд С.Зулпхар- УИХ-ын гишүүн асан А.Тлейханы дүү

С.Зулпхар урьд нь ЗГХЭГ-ын харьяа Удирдлагын академийн захирлаар ажиллаж байгаад Хөдөлмөр, нийгмийн хамгааллын дэд сайд болж дэвшсэн. Улс төр дахь ураг төрлийн хамаарлын хувьд, УИХ-ын гишүүн асан А.Тлейханы нагац эгчийн хүү гэх “хаягтай”.

Тайлбар: 2020 он, УИХ-ын гишүүн Т.Аубакир, ХНХ-ын дэд сайд С.Зулпхар, УИХ-ын гишүүн асан А.Тлейхан нар

Уул уурхай, хүнд үйлдвэрийн дэд сайд О.Цэндсүрэн- Н.Энхбаярын хуучин цэрэг

О.Цэндсүрэн МАН, МАХН хоёрыг салахад МАХН-д бууриа сахиж үлдсэн, Н.Энхбаярын хуучин цэргүүдийн нэг. Тиймдээ ч энэ Засгийн газарт Н.Энхбаярт хуваарилсан квотоор Уул уурхай, хүнд үйлдвэрийн дэд сайдаар томилогдсон. Цаашилбал, Уул уурхай, хүнд үйлдвэрийн дэд сайд О.Цэндсүрэн бизнесээрээ ТЕГ-ын дарга асан Д.Гэрэлийн охин Г.Уянга, хүү Г.Аранзал нарын хамаарал бүхий гэгдэх “Говь краван холдинг” ХХК, “Монгол перлит констракшн” ХХК, “Лодика Инвестментс” ХХК-уудтай шууд холбогдоно. Мөн Д.Гэрэлийн охин Г.Уянгыг “Шарын гол” ХК-ийн ТУЗ-ийн даргаар ажиллаж байх үед О.Цэндсүрэн ТУЗ-ийн гишүүнээр нь ажиллаж байсан намтартай.

Байгаль орчин, аялал жуулчлалын дэд сайд М.Ганбаатар- “Тавантолгой түлш” ХХК-ийн гүйцэтгэх захирал асан

М.Ганбаатар 2018 онд “Тавантолгой түлш” ХХК-ийг байгуулагдах үед анхны гүйцэтгэх захирлаар нь томилогдож танигдсан. Улс төрийн харьяаллын хувьд, У.Хүрэлсүхийн хүн гэх хаягтай. Гэхдээ шинэ хүн биш бөгөөд өмнө нь “Монгол шуудан” ХК-д хэлтсийн дарга, Нийслэлийн өмчийн харилцааны газрын дарга, Үндэсний цэцэрлэгт хүрээлэнгийн Ерөнхий менежер, Нийслэлийн МАН-ын хорооны дэд дарга гэхчилэн албан тушаал хашиж байсан МАН-ын хууччуулын нэг.

Соёлын дэд сайд М.Батбаяр - Хэнтийн нутгийн зөвлөлийн дэд дарга

М.Батбаяр Хэнтий аймагт төрж өссөн. “Идеал групп” ХХК, “Хот төлөвлөлтийн хүрээлэн” ХХК гэх хувийн компаниудаа удирдаж байгаад 2019 онд БСШУЯ-ны харьяа Чингис хааны өв соёлын хүрээлэнгийн захирлаар томилогдож, 2020 оны долдугаар сард Соёлын дэд сайд болж дэвшсэн. Соёлын дэд сайдаар томилогдох үедээ М.Батбаяр Хэнтий аймгийн Нутгийн зөвлөлийн гүйцэтгэх захирлаар ажиллаж байсан бол Нутгийн зөвлөлийн тэргүүнээр нь Л.Оюун-Эрдэнэ ажиллаж байлаа. Хэний хүн болох нь тодорхой харагдаж буй биз. М.Батбаярын хувьд, Соёлын дэд сайдын хувиар Л.Оюун-Эрдэнийн санаачлан Хэнтий аймагт хэрэгжүүлж буй аялал жуулчлалын таван цогцолборыг хариуцан ажиллаж буй.

Тайлбар: 2018 он, Хэнтий аймгийн Биндэр сум-Их хуралдай цогцолборын шав тавих ёслол

Батлан хамгаалын дэд сайд Б.Баярмагнай- Элчин сайд Б.Баярсайханы төрсөн дүү

Б.Баярмагнай У.Хүрэлсүхийн зөвлөхөөр ажиллаж байгаад 2020 оны долдугаар сард Батлан хамгаалахын дэд сайдаар томилогдсон. Б.Баярмагнайд улс төрд ураг төрлийн хамаарал их. Тухайлбал, төрсөн ах Б.Баярсайхан нь өдгөө Беларуст Онц бөгөөд Бүрэн эрхт элчин сайд, эхнэр Б.Баттуулийнх нь төрсөн ах Б.Баттүшиг нь Туркийн Станбулд суух дэд консул асан гэх зэргээр үргэлжилнэ.

Эрүүл мэндийн дэд сайд С.Энхболд

С.Энхболд халдварт тахлын сүүлийн жил Эрүүл мэндийн сайдаар хэл амтай ажиллаж, өдгөө дэд сайдын сэнтийд хэл чимээгүйхэн сууж буй. Нэгдүгээр эмнэлгийн Дүрс оношилгооны төвийн дарга, Хоёрдугаар эмнэлгийн Ерөнхий захирал гэсэн тун товчхон намтартайгаар Эрүүл мэндийн сайдаар томилогдож байсан. Өмнөх сайд Т.Мөнхсайханы үй зайгүй найз учраас ийн халааг нь авсан. Мөн Эрүүл мэндийн дэд сайд С.Энхболдын эхнэр Б.Цолмон нь дунд ангидаа Ерөнхий сайд Л.Оюун-Эрдэнэтэй нэг ангид хамт сурч байсан ч гэлцдэг.

Зам тээврийн хөгжлийн дэд сайд Л.Халтар

Л.Халтарыг анх “Улаанбаатар төмөр зам” ХНН-д ачигчаар ажлын гараагаа эхэлж, сайд болтлоо өгссөн “ясны төмөр замчин” гэж мөн ч их хөөргөж магтацгаасан. Л.Халтарыг сошиалаар сайлуулж, сайдын суудалд залсан цаад шалтгаан нь төмөр замынхны “лобби” байсан нь удалгүй ил болсон. Халдварт тахлын хоёр жил хамаг ачаа хил дээр гацаж, харин Л.Халтар ба түүний нөхөд чингэлэг тээвэр нэрээр түрийвчээ түнтийлгэсэн тухай хэсэгтээ л хэвлэлээр шуугьсан. Гэвч өдгөө Л.Халтарт хариуцлага тооцох байтугай, дэд сайдын сэнтийд суулгасаар буй.

ТӨРИЙН ТОМЧУУДЫН ТАВИУЛ ДЭД САЙДУУД

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 7

Сэтгэгдэл үлдээсэн: 2023-09-17 14:19:23

Й1wa: Сайхан юм аа.
Сэтгэгдэл үлдээсэн: 2023-09-12 22:25:49

Зочин: Ямар ч шаардлагагуй шагналын алба!!! Терийг унэхээр данхайлгаж, эх захгуй болгож байгаа нь улс орныг суйруулж байнаа!
Сэтгэгдэл үлдээсэн: 2023-09-12 20:39:39

nunu: Bugd l unen medeelel. Bidnii deer iim aalznii tor orshin baina aa, ur huuhded min usuj devjih ireedui tun chig alga daa, gadagshaagaa l yavah min
Сэтгэгдэл үлдээсэн: 2023-09-12 20:07:29

55: Данх зайлаарай
Сэтгэгдэл үлдээсэн: 2023-09-12 18:45:45

зочин: Ёстой наймаалжны тэмтрүүл шиг сүлжилдсэн муухай сүлжээ байна, ийм байхад авилга яаж үгүй болохов дээ, Монголд хэдэн гэр бүл, найз нөхөд баялгийг хамж, авилгыг цэцэглүүлж байгааг бүгд мэдэж байгаа ч яаж ч чадахгүй нь өрөвдөлтэй.
Сэтгэгдэл үлдээсэн: 2023-09-12 14:55:36

пэйл: сүржигнэх юм, шинэ мэдээлэл юу ч алга, угаасаа л улстөрд багийн ажиллагаа буюу ярьсан төлөвлөсөн ажлаа хийхийн тулд өөрийнхөө хүндээ л итгэж найдаж, хариуцуулж ажилладаг биз дээ. Багийн биш хүнийг дэд сайд болголоо гэхэд асуудлаа ойлгохгүй, ганцаарчилсан тоглолт хийгээд л дуусна шд
Сэтгэгдэл үлдээсэн: 2023-09-12 11:24:55

Ул: Дотор хүйт оргичихлоо.