Баян-Өлгий аймгийнхан гэж тусдаа Вант улс байгуулчихсан бололтой. Газрын наймаа, тендерийн будилаан тэнгэрт хадчихсан. Ердөөсөө л цөөн албан тушаалтан иргэдийн боломжийг хулгайлж, эрх мэдэл, албан тушаалын байдлаа урвуулан ашиглаж, өөрсдөө болон хамаарал бүхий этгээдүүдэд давуу байдал олгодог. Хууль бус ажиллагаа, хахуулийг дээд зэргээр хөгжүүлсэн аймаг нь Баян-Өлгий бололтой. Үүний нэг нь Баян-Өлгий аймгийн ЗДТГ-ын асан Б.Зархум гэнэ.

БАЯН-ӨЛГИЙ АЙМГИЙН ЗДТГ-ЫН ДАРГА АСАН Б.ЗАРХУМЫГ АТГ-ААС ШАЛГАЖ БАЙГАА ГЭВ

Баян-Өлгий аймгийн ЗДТГ-ын даргаар ажиллаж байсан яруу найрагч, СГЗ Б.Зархум гэх эрхэм эрх мэдэл, албан тушаалын байдлаа урвуулан ашиглаж, өлгийчүүдийн бахархал болсон Залуучуудын паркыг хувьчилж, орон сууцны хороолол барьсан талаар эх сурвалж мэдээллээ.

Тодруулбал, тэрбээр “Баян-Өлгий аймагт 1973 оноо хойш мод тарьж, цэцэрлэгт хүрээлэн болгосон Залуучуудын парк байлаа. Харамсалтай нь, аймгийн ЗДТГ-ын даргаар ажиллаж байсан Б.Зархум эрх мэдлээ ашиглаад, хувьчлаад авчихсан. Тэгээд парк тойруулж үйлчилгээний газар, хувийн орон сууц, авто угаалгын газар барьж байгаад орон сууцны хороолол болгочихсон. Энэ асуудлаар нь хууль хяналтын байгууллагад гомдол гаргаж, шалгуулж байгаа. АТГ-аас албан тушаалтантай холбоотой хэргийг шалгаж байгаа гэсэн хариу өгсөн. Хуулийн байгууллага үнэн шударгаар ажиллаж, хууль бус ажиллагааг нь зогсоож, барилга байгууламжийг нь нураах хэрэгтэй. Баян-Өлгий аймгийн залуучуудад амрах талбай, зугаалах, чөлөөт цагаа өнгөрүүлэх парк хэрэгтэй. Түүнээс биш шавар орон сууцны хороолол хэрэггүй” гэлээ.

ОРОН СУУЦНЫ ХОРООЛОЛ БАРИХЫН ТУЛД 500 МОД БУЛГАЛЖЭЭ

       Хамгийн ноцтой нь, Баян-Өлгий аймгийн ЗДТГ-ын дарга асан Б.Зархум нь орон сууцны хороолол барихын тулд 500 мод булгалсан гэнэ. Эх сурвалжийн мэдээлснээр “Б.Зархум гуай Саяажы нэртэй амралтын хүрээлэнг хувьдаа завшсан. Баян-Өлгий аймагт байдаг ганцхан ногоон байгууламж шүү дээ. Гэтэл энэ хүн эрх мэдэл, албан тушаалын байдлаа урвуулан ашиглаж, хувьчилж авсан. Тэгээд бүүр зогсохгүй амралтын хүрээлэнгийн хашаанд байсан 500 гаруй модыг булгалж, орон сууцны хороолол барьсан. Монгол Улсын Ерөнхийлөгч тэрбум мод тарина гээд байдаг. Гэтэл доод албан тушаалтнууд нь энэ мэт дураараа авирлаж, улсын хөрөнгийг хувьдаа завшаад, албан тушаалаасаа бууж байна. Тэгээд бүүр энэ хүнийг СГЗ цолоор шагнасан гээд бод. Байгаль орчны эсрэг ноцтой гэмт хэрэг үйлдчихээд байхад шалгах нь битгий хэл шагнаж урамшуулаад байгаа нь гажуудал. Баян-Өлгий аймгийнхан энэ хүнээс ногоон байгууламжаа буцаагаад авахын тулд хатуу тэмцэнэ. 50 биш, 500 мод булгалж байна гэдэг гэмт хэрэг” гэлээ.

Б.ЗАРХУМ ГЭЖ ХЭН БЭ

Эрх мэдэл, албан тушаалын байдлаа урвуулан ашиглаж, Баян-Өлгий аймгийн залуучуудын амралтын хүрээлэнг булааж, хувьчилж, ногоон байгууламж сүйтгэж орон сууцны хороолол барьсан гэх Б.Зархум гэж хэн бэ. Тэрбээр Баян-Өлгий аймгийн ЗДТГ-ын даргаар олон жил ажилласан. Өнгөрсөн 2021 оноос МЗЭ-ийн Баян-Өлгий аймаг дахь салбарыг хариуцаж ажиллаж байгаа. Тэрбээр өнгөрсөн хоёрдугаар сард Ерөнхийлөгчийн зарлигаар СГЗ цол тэмдгээр шагнуулсан. Б.Зархум нь “Үүлс болж нүүнэ”, “Нэгэн үг ч эрдэнэ” “Тэнгэрийн хаяа”, “Өгөөжтэй нутаг өлзийтэй газар”,“Бүхий л юм сонирхолтой” зэрэг номоороо танигдсан яруу найрагч ажээ.