Ховд аймгийн Засаг дарга асан Б.Дүгэржавыг хууль хяналтын байгууллагаас шалгаж эхэлсэн талаар эх сурвалж мэдээллээ. Тодруулбал, Засаг даргаар ажиллаж байхдаа эрх мэдэл, албан тушаалын байдлаа урвуулан ашиглаж, бусдад давуу байдал олгосон, үндэслэлгүйгээр хөрөнгөжсөн, тендер будилаантуулсан гэх үндэслэлээр шалгаж байгаа ажээ.

Ерөнхий сайд Л.Оюун-Эрдэнэ өнгөрсөн өдрүүдэд Ховд аймагт ажиллаад ирсэн байдаг. Уулзалтын үеэр Ховд аймгийн иргэд Засаг дарга Э.Болормааг шиүүмжилж, огцруулах хүсэлт хүртэл өгсөн. Тухайлбал, иргэд “АНУ-д хамт сурсан найзаа аваад манай аймгаас яв. Таны томилсон Засаг дарга Э.Болормаа ажил хийж чаддаггүй. Уулзах гэхээр цаг ав гэж хэлдэг. Сумын Засаг дарга нар уулзах гэж хэдэн өдрөөр үүдэнд сууж, хүлээдэг. Доод шатны ажилтнуудаа хүн гэж үздэггүй. Намайг томилсон Ерөнхий сайд, ЗГХЭГ-аас асуу гэж томордог” хэмээсэн юм.  

Харин Ерөнхий сайд Л.Оюун-Эрдэнэ “Э.Болормаагийн талаар иргэдийн саналыг сонслоо. Мэдээж аливаа асуудал хоёр талтай. Гэхдээ би ЗГХЭГ-ын даргатай ярьж байгаад асуудлыг маш нарийн судалж үзнэ. Мэдээж дэмжиж байгаа хүмүүс ч байгаа, эсэргүүцэж байгаа янз бүрийн хүмүүс ч байгаа. Тэгэхээр маш сайн нягтлаад үнэхээр  хууль зөрчсөн асуудал байгаад, үнэхээр ажиллаж байгаа арга барил нь огт болохгүй байгаа бол үүнийг шийдэх шиг хялбар зүйл байхгүй. Харин сая манай Засгийн Газрын гишүүд яриад байсан зүйлд та бүхэн маань сайн ойлголцох хэрэгтэй. Анх удаа эмэгтэй хүн аймгийн Засаг даргаар томилогдсон зүйл болох шиг болсон.Үүнд иргэдийн байр суурь ямар байна, судалгаа хийгээд үзэх хэрэгтэй. Тийм учраас Д.Амарбаясгалан дарга нягтлаад, нарийвчилж үзэх ёстой. Ер нь бол Ховд аймгийн ИТХ Э.Болормааг аймгийн Засаг даргаар сонгоод, уг шийдвэрийг л би албажуулсан. ИТХ-ын шийдвэр бол ИТХ-ын шийдвэр байдаг" гэсэн хариу өгсөн билээ.

Тэгвэл Ховд аймгийн Засаг дарга Э.Болормаагийн ажлыг шүүмжилж, тендерийн асуудалд гомдол мэдүүлсэн нь зохион байгуулалттай байж болзошгүй ажээ. Засаг дарга асан Б.Дүгэржавын үед хахууль өгч, тендер авдаг байсан иргэдийн эрх ашиг зөрчигдсөн учраас зохион байгуулалттайгаар Засаг дарга Э.Болормааг шүүмжилсэн байж болзошгүй гэнэ.

Ийм шалтгааны улмаас Ховд аймгийн Засаг дарга Б.Дүгэржавыг хууль хяналтын байгууллагаас шалгаж эхэлсэн гэнэ. Б.Дүгэржавыг өнгөрсөн 2022 оны наймдугаар сарын 22-ны Засгийн газрын хуралдаанаар чөлөөлсөн байдаг.Тодруулбал, түүнийг Эрдэнэбүрэнгийн УСЦ-ын төслийн ажлыг удаашруулсан гэж үзэж, уг үндэслэлээр ажлаас нь чөлөөлж байгаа аж.

       Бид тухайн үед Ховд аймгийн Засаг дарга асан Б.Дүгэржавтай холбогдож, энэ талаар тодруулахад “Эрдэнэбүрэнгийн усан цахилгаан станцын төслийн ажлыг удаашруулсан гэх үндэслэлд тайлбар өгмөөргүй байна. Харин би улс төрийн албан тушаалтан, намынхаа удирдах байгууллага өөрийнхөө хүсэлтийг өгчихсөн байгаа. Өөрөөр хэлбэл, өөр ажил хийх хүсэлтэй байгаагаа хэлж, чөлөөлөгдөх хүсэлтээ өгсөн гэсэн үг. Өнөөдөр шийдвэр гарч байх шиг байна. Өөр тодорхой хэлэх мэдээлэл алга байна” гэсэн байдаг.