ЗТХЯ, АТҮТ-ИЙН ЭСРЭГ "СОШИАЛ ДАЙН" ӨДӨӨГЧ "ДРАГОН ХОЛДИНГ"-ИЙН ЭЗЭН С.БАЯРТ ГЭЖ ХЭН БЭ

Ц. АМУНДРА:
Эрэн сурвалжлах

2023-09-08, 3318

АТҮТ-ийн харьяа баруун бүсийн автовокзалыг “Драгон холдинг” ХХК-ийн байрнаас “Номин риалтор” ХХК-ийн байр руу шилжүүлэх асуудал сошиалд хэрүүл тариад сар боллоо. Эхэндээ “Драгон холдинг” ХХК-ийнхан үйлчлүүлэгчдээ алдахгүй гэсэндээ нүүлгэх шийдвэрийг эсэргүүцэж байна гэж ард түмэн ойлгож байсан. Гэвч эцэстээ “Драгон холдинг” ХХК-ийнхний сошиал ажиллагаа хэрээс хэтэрч, төрийн түвшинд хүрэв.

Асуудал юунаас эхэлснийг ойлгомжтойгоор тайлбарлъя. “Драгон холдинг” ХХК-ийн эзэмшлийн “Драгон” төвөөр өдөрт 8000-10 мянган хүн үйлчлүүлдэг. Гэхдээ энэ бол баруун аймгууд руу автобусанд суухаар очсон хүмүүс тоо гэж ойлгож болно. Автобус хүлээх зуураа “Драгон” төвөөр үйлчлүүлдэг гэсэн үг л дээ. Харин баруун бүсийн автовокзал “Драгон” төвөөс нүүчихвэл дээрх 8-10 мянган үйлчлүүлэгч байхгүй болно гэсэн үг. Үйлчлүүлэгчгүй болчихвол “Драгон” төв дампуурах нь ойлгомжтой. Тиймээс “Драгон холдинг” ХХК-ийнхан баруун бүсийн автовокзалыг “Номин” руу нүүлгэхийг эсэргүүцэж, ЗТХЯ болон АТҮТ-ийн эсрэг сошиал “дайн” зарлаад буй хэрэг.

Тэгвэл АТҮТ-ийн харьяа Баруун бүсийн автовокзалыг “Драгон холдинг” ХХК-ийн байрнаар “Номин реалтор” ХХК-ийн байр руу шилжүүлж буйг эсэргүүцсэн сошиал ажиллагааг “Драгон холдинг”-ийн эзэн С.Баярт, түүний том охин Б.Октябрь, хүргэн Ж.Энхжаргалан, бага охин Б.Нарангоо, хүргэн Ч.Эгүүнбат нар гардан зохион байгуулж буй ажээ. Тэр тусмаа том хүргэн Ж.Энхжаргалан нь “Биднийг хэн ч барахгүй шүү. Сайд гуай талцаад үзэлцэе” гэж сошиалд баруун, солгойгүй цамнаж байх аж. Судалж үзвэл, “Драгон холдинг”-ийн эзэн С.Баярт болон түүний хүүхдүүдийн худ ураг, холбоо хамаарал, улс төр, бизнесийг дамнасан нөлөөлөл үнэхээр том ажээ. Тийм ч учраас С.Баярт болон түүний хүүхэд, хүргэчүүд Баруун бүсийн автовокзалыг өөрсдийн “Драгон” төвөөс нүүлгэхийг зүсэн зүйлийн аргаар эсэргүүцэж, төр эргүүлэхэд бэлэн байгаа ж.

“Драгон холдинг”-ийн эзэн С.Баярт МАН-ын нөлөө бүхий гишүүн, хууччуулын нэг. Улс төрийн карьер нь Сонгинохайрхан дүүргийн ИТХ-ын даргаас дээшлээгүй ч МАН дотроо нөлөө бүхийд тооцогддог нэгэн. 2010 онд СХД-ийн ИТХ-ын дарга байхдаа төлөөлөгч нараа талдаа оруулж, Засаг даргыгаа огцруулж явсан зартай нөхөр. С.Баяртыг СХД-ийн ИТХ-ыг ийн бужигнуулж явах үед одоогийн Хууль зүй, дотоод хэргийн сайд Х.Нямбаатар түүний цэрэг буюу Төрийн захиргаа, удирдлагын дарга нь байлаа. С.Баяртыг ИТХ-ын даргын албаа өгсний дараа Х.Нямбаатар түүний орыг залгаж ИТХ-ын даргаар томилогдож байв. Сонирхуулахад, Х.Нямбаатар СХД-ийн ИТХ-ын дарга болсныхоо дараа СХД-ийн “Хүндэт дэвтэр”-т С.Баяртыг нэрийг бичиж, батламж гардуулж байв.

С.Баяртын бага охин Б.Нарангоогийн нөхөр буюу хүргэн Ч.Эгүүнбат нь УИХ-ын гишүүн асан, Монголбанкны Ерөнхийлөгч асан О.Чулуунбат агсны хүү. Өөрөөр хэлбэл, С.Баярт О.Чулуунбат агсны худ юм. Тэгвэл С.Баяртын хүргэн Ч.Эгүүнбатын төрсөн эгч Ч.Агиймаагийн нөхөр нь Эдийн засгийн хөгжлийн Дэд сайд Г.Түвдэндорж. Түүний аав нь Ховд аймгийн уугуул, Алдарт уяач, “Торгоны зам групп”-ын Ерөнхийлөгч Ц.Гантөмөр гэж зартай эр бий. Ц.Гантөмөр Миеэ.Энхболдыг МАН ба ММСУХ-г удирдаж байх үед Удирдах зөвлөлийн гишүүнээр нь ажиллаж, гол хүн нь гэгдэж явсан. Цаашилбал, С.Баяртын хүргэн Ч.Энгүүнбат нь эгч Ч.Агиймаагийнхаа хамт аав О.Чулуунбатынхаа бизнесүүдийг үргэлжлүүлж буй. Ингэхдээ О.Чулуунбат агсан бүх бизнесээ Б.Одгэрэл гэгчтэй хамтран явуулдбаг байсан. Тэгвэл Ч.Эгүүнбат, Ч.Агиймаа нар аавынхаа хуучны хамтрагч Б.Одгэрэлийн охин О.Хулантай үе дамжуулан бизнесээ хамтран явуулж буй. Харин О.Хулангийн нөхөр нь Эрчим хүчний дэд сайд М.Баярмагнай. Гэх мэтээр С.Баяртын худ ургийн холбоо төрийн албыг дамнан үргэлжилнэ.

“Драгон холдинг”-ийн эзэн С.Баяртын том охин Б.Октябрь, хүргэн Ж.Энхжаргалан нар нь алтны магнатууд буюу “Гацуурт”-ын эзэн Л.Чинбатын охин Ч.Номин, “Баян-айраг эксплорэйшн” ХХК-ийн эзэн Т.Ганхуягийн хүү буюу Ч.Номингийн нөхөр Г.Бат-Эрдэнэ дөрөв дотно найзууд, бизнесийн түншүүд. Жишээ нь, “Би Ар Би пикчерс” ХХК, “Би Ар би” ХХК, “Би Ар Би саунд” ХХК гэх мэт тэдний хамтарч байгуулсан компаниуд олон бий. “Би Ар Би” ХХК-ийг л гэхэд Б.Октябрь, түүний нөхөр Ж.Энхжаргалан, Соёлын сайд Ч.Номин, түүний төрсөн дүү Ч.Батхүү дөрөв 2017 онд хамтран үүсгэн байгуулж байв. Баян айлын хүүхдүүд хамтарч бизнес хийхийг аль тэр гэх вэ. Гэтэл Ч.Номин Соёлын сайд болсны дараа Ж.Энхжаргалан нь соёл урлагийн арга хэмжээ бүр дээр дрон шоу хийж, төсвийг нь Ч.Номингоос буюу Соёлын яамнаас “Би Ар Би” ХХК-ийн дансаар авдаг болсон. Ил цагаан ашиг сонирхлын зөрчил боловч аавууд нь С.Баярт, алтны магнат худууд буюу Л.Чинбат, Т.Ганхуяг нар учраас хууль хяналтынхан шалгах ч үгүй орхисон байдаг.

Бас нэг сонирхолтой баримт дуулгахад, “Драгон холдинг”-ийн эзэн С.Баяртын охин Б.Нарангоо УИХ-ын гишүүн А.Адъяасүрэнгийн төрсөн дүү А.Одгэрэлтэй “Ноба тур” ХХК-ийг хамтран эзэмшдэг аж. Гэтэл “Ноба тур” ХХК-ийн хаяг дээр А.Адъяасүрэнгийн эзэмшлийн “Премиум кастомс” ХХК бүртгэлтэй байдаг. Харин “Премиум кастомс” ХХК нь өдгөө хууль хяналтын байгууллагад шалгагдаж буй нүүрс тээврийн “Азын хишиг дэлгэрэх” ХХК, “Ивээл сар транс” ХХК, “Хишиг сайхан ундрах” ХХК, “Дайлангийн хишиг тээвэр” ХХК гэх дөрвөн компанийн толгой компани юм. Эндээс, “Драгон холдинг”-ийн эзэн С.Баярт нүүрсний сүлжээтэй холбоотой байж болзошгүй ноцтой сэжүүр гарч ирнэ.Мөн УИХ-ын гишүүн А.Адъяасүрэн Баянхонгорынх, С.Баяртын эхнэр Г.Пунцагцогвоо нь мөн Баянхонгорийн юм билээ.

Энэ мэтээр улс төр, бизнесийг дамнасан асар их холбоо сүлбээтэй “Драгон холдинг”-ийн эзэн С.Баярт Баруун бүсийн автовокзалыг хувийн мэт өмчилж, төрийн өөдөөс даналзах нь аргагүй бололтой.

ЗТХЯ, АТҮТ-ИЙН ЭСРЭГ "СОШИАЛ ДАЙН" ӨДӨӨГЧ "ДРАГОН ХОЛДИНГ"-ИЙН ЭЗЭН С.БАЯРТ ГЭЖ ХЭН БЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 10

Сэтгэгдэл үлдээсэн: 2023-09-11 16:45:45

Зочин: ДРАГОН МАШ БАЛИАР БОХИР ШИГҮҮ МУУХАЙ ГАЗАР НҮҮСЭН НЬ ДЭЭР.ЭД НАР Ч ХУЙГААРАА НҮҮРСНИЙ ХУЛГАЙЧУУД ЮМ БИШҮҮ ЭДНИЙ ЮМ ГЭЖ ЮУ БАЙХАВ ДЭЭ МОНГОЛЧУУДЫН Л БОЛОМЖИЙГ ХУЛГАЙЛСАН НӨХДҮҮД БАЙНА
Сэтгэгдэл үлдээсэн: 2023-09-10 06:58:40

Ард иргэд: Муусайн хулгайчуудийн бүлэглэл юм бна ш дээ Төр төмөр нүүрээ харуулах хэрэгтэй нүүрсний хулгайчууд гэдэг нь ойлгомжтой бна
Сэтгэгдэл үлдээсэн: 2023-09-09 16:25:01

Зочин: Сүртэй хол нүүгээгүй л юм бна лээ.аль аль талдаа л ашиг сонирхол бий.ямар улс орноо ард иргэдээ боддог биш
Сэтгэгдэл үлдээсэн: 2023-09-09 12:37:38

Лигмаа: шинэ зогсоолыг мэдэхгүй. хуучин нь бол орж гарахад төвөгтэй чихэлдсэн газар л баысан. Ганц даргон бишээ үйлчилгээний газрууд зай завсартай, чөлөөтэй, зогсоолтой л байвал зүгээр юм.
Сэтгэгдэл үлдээсэн: 2023-09-09 09:25:24

Fuck : Баярт гэж бас л тендер энэ тэр гэж их явсан даа. Драгон дээр яагаад ч аюулгүй ажиллагаа хангагдахгүй гэдгийг зун харсан шүү бүх хүмүүс оготны нүхэнд орсон шиг. ЗТХЯ-ны маш зөв ард иргэдийн аюулгүй байдлыг хангаад
Сэтгэгдэл үлдээсэн: 2023-09-09 07:45:08

Ө: За ёстой айхтар сүлжээ танилтай найзуудтай юм бна. Хэн ч барахгүй Төр ч барахгүйн бноо. Бууж өг
Сэтгэгдэл үлдээсэн: 2023-09-08 16:34:28

zochin: Мөнгөтэй өөрсдийгөө тэнгэрийн амьтад гээд бодчихсон энэ хүмүүсийг төрийн бодлогод огт оролцуулж болохгүй
Сэтгэгдэл үлдээсэн: 2023-09-08 15:52:59

Зочин: Аалзны торыг тасчин хаях хэрэгтэй.
Сэтгэгдэл үлдээсэн: 2023-09-08 13:07:05

з: үндсээр сугалж хая төрд бүү ойртуул
Сэтгэгдэл үлдээсэн: 2023-09-08 08:31:32

жа: аалзны тор шиг хэлхэсэн, хэний авгайгийн дүүгийн нөхөрийн эгчийн ахынх нь үелийн эхнэрийн хадмын хүргэнийн багын найзын хуурай дүү гээд явж өгөх юмаа