Хамгаалалтад гарах үедээ Дарвийн нуруунаас алт олборлосон Говь-Алтай аймгийн цагдаагийн албан хаагчдыг шалгаж байгаа талаар бид өмнө нь мэдээлсэн. Тодруулбал, эх сурвалжийн мэдээлснээр “Говь-Алтай аймгийн цагдаагийн албан хаагчид Дарвийн нурууг хамгаалж байхдаа ухсан хэрэгт орсон. Нинжа нар Дарвийн нурууны гол хэсэгт ухсан юм билээ. Алт илэрсэн газарт нь дахиж ухуулахгүй гээд хяналтын постны гэрийг нүхэн дээр нь барьчихсан гэсэн. Өөрөөр хэлбэл, цагдаа нар хууль бус алт олборлогчдын ухсан нүхэн дээр гэрээ барьсан гэсэн үг. Долоо хоног тэндээ байрлаж, хамгаалж байсан ч харамсалтай нь өөрсдөө энэ хэрэгт орооцолдсон. Өөрсдийнхөө ээлжин дээр хүн оруулсан юм уу, өөрсдөө ухсан юм уу бүү мэд. Ямартай ч гэр дотроосоо доошоо ухаад, цооног үүсгэчихсэн байсан гэнэ лээ. Нутгийн хүмүүс янз бүрээр л ярьж байна. Цагдаагийн албан хаагчдыг хамгаалж байхдаа техниктэй хүмүүсийг оруулсан л гэнэ. Цагдаагийн албан хаагчдад тэтгэвэртээ гарсан хурандаа, генералууд чиглэл өгсөн л гэнэ. Тэгээд ухуулсан л гэнэ. Ямартай ч цагдаа нарыг 7-8 кг алт олборлосон. Тэгээд баригдсан л гэх юм билээ” гэсэн юм.

О.Амгаланбаатар: Дарвийн нурууг хамгаалж байсан цагдаагийн албан хаагчдыг алт олборлосон хэргээр чөлөөлөн шалгаж байгаа нь үнэн

          Говь-Алтай аймгийн Дарив сумын нутагт орших алдарт Дарвийн нуруунд алт илэрч, хууль бусаар алт олборлогчид сүйтгэж байгаа асуудлыг аймаг, сумын удирдлагууд хэлэлцэж, хамгаалалтын пост байрлуулан ажиллаж байгаа билээ. Тодруулбал, хууль бус алт олборлогчдыг Дарвийн нуруу руу нэвтрүүлэхгүй, алт олборлуулахгүй байх ажиллагааг авч хэрэгжүүлж байгаа гэсэн үг. Гэвч харамсалтай нь, Дарвийн нурууг хамгаалж байсан цагдаа нар хууль бус алт олборлогчдын гар, хөл болж, алт олборлосон нь тогтоогдож, хуулийн байгууллага шалгаж байна. Энэ талаар Говь-Алтай аймгийн Засаг дарга О.Амгаланбаатараас тодрууллаа.

             Тэрбээр “Дарвийн нурууг хууль бус алт олборлогчдоос хамгаалахын тулд аймгаас төсөв гаргаж, цагдаагийн байгууллагын албан хаагчид хамгаалан ажиллаж байгаа. Гэвч хамгаалалтад гарч байсан цагдаа нар өөрсдөө олборлосон хэрэгт орооцолдсон. Хоёр, гурван ээлжинд үүрэг гүйцэтгэж байсан цагдаагийн албан хаагчид ажлаасаа халагдсан. Хуулийн байгууллага шалгаж байгаа” гэлээ.

ДАРВИ СУМЫН ИРГЭД: ДАРВИЙН НУРУУНД БИЧИЛ УУРХАЙ БАЙГУУЛАХЫГ ЗӨВШӨӨРӨХГҮЙ. ДАХИАД ХҮНИЙ АМЬ ЭРСДЭХ ВИЙ

            Тэгвэл хаваржин хамгаалах нэрээр иргэдээ талцуулж, төрийн албан хаагчдаа дайчилж, аймаг, сумын төсвөөс баахан хөрөнгө гаргасан Дарви сумын удирдлагууд Дарвийн нуруунд бичил уурхай байгуулах шийдвэр гаргажээ. Өөрөөр хэлбэл, Сэлэнгэ аймгийн Ерөө, Бугант, Орхон голын эмгэнэл Дарвийн нуруунд давтагдах нь. Аймгийн цагдаагийн албан хаагчид нь хамгаалах нэрээр ухаж, эцэст нь сумын удирдлагууд бичил уурхай байгуулах болсон талаар сумын хэд хэдэн иргэнтэй холбогдож, тодрууллаа.

            Дарви сумын иргэн Н “Өдийгөөс 10 гаруй жилийн өмнө Говь-Алтай аймгийн Шарга, Бигэр, Дарви сумд алт илэрч нинжа дайрч орж ирж байлаа. Хууль бус алт олборлогчдоос нутгаа хамгаалахын тулд иргэд бөөн л юм болж байсан. Бүр хүний амь эрсдэж байсан гашуун түүх бий. Нинжа нар нутгийн иргэд рүү чулуу нүүлгэж, алт олборлохоор улайрч, дайрсны гороор хүний амь эрсдсэн байдаг. Тодруулбал, малчид, нинжа нарын зөрчил сүүлдээ мөргөлдөөн болсон. Нутгийн малчин залуу нинжа нарыг ахалж явсан 30 орчим насны залууг буудаж, амийг нь хөнөөсөн байдаг. Тухайн үедээ олон хүнийг дайчлан баривчилж, сум орон нутгаараа чичлүүлж байсан. Энэ гашуун түүх давтагдахгүй байсан баталгаа огт алга. Бичил уурхай байгуулах саналыг сумын удирдлагууд л гаргасан бололтой. Нутгийн иргэд энэ саналыг дэмжихгүй байгаа. Бичил уурхай байгуулаад хэнд ч ашиггүй. Ядарсан иргэн нь биш, задарсан техникжсэн нинжа нар нь ухаад дуусна. Хариуцлага гэж зүйл тэдэнд огтоосоо байхгүй шүү дээ. Хэдхэн жилийн дараа Дарвийн нуруу сэглэгдээд хаягдах байх даа. Харамсалтай байна” гэлээ.

           Дарви сумын иргэн Б “Малчид бидэнд мэдээлэл алга. Гэхдээ бичил уурхайгаар ажиллуулах саналыг сумын ИТХ-аар шийдсэн гэж сонссон. Хэрэв бичил уурхайгаар ажиллуулах байсан бол яах гэж бүтэн жил хамгаалах нэрээр мөнгө идэж, ухаж сэндийчих хэрэггүй байсан. Алдарт Сутай хайрхны энгэр бэл, Дарвийн нурууг тийм амархан ухчихаж чадахгүй байх” гэлээ.

ДАРВИ СУМЫН ИТХ-ЫН ДАРГА: ДАРВИЙН НУРУУНД БИЧИЛ УУРХАЙ БАЙГУУЛАХ САНАЛ ХҮРГҮҮЛСЭН

Харин бид уг шийдвэрээр сумын ИТХ-аараа хэлэлцэж, шийдвэрлэсэн гэх Дарви сумын ИТХ-ын даргатай холбогдож, тодрууллаа.

Тэрбээр “Дарвийн нуруунд бичил уурхай ажиллуулах санал гаргаж, сумын ИТХ-аараа дэмжсэн. Энэ хүсэлтээ Говь-Алтай аймгийн ИТХ руу явуулсан. Уг саналыг явуулаад удаж байна. Удахгүй шийдэх байх” гэлээ.