Цагдаагийн дарга нартай холбоотой хууль бус мэдээллийг цагдаагийн албан хаагч О.Цэлмэг мэдээлсэн. Тодруулбал, тэрбээр Булган аймгийн цагдаагийн удирдлагууд албан хаагчдын цалинг үндэслэлгүйгээр хасаж, дарамт шахалт үзүүлж, бэлэн мөнгө хураасан талаарх мэдээллийг цахим сүлжээнд байршуулж, олон нийтэд хүргэсэн байдаг. Үүний дагуу ЦЕГ-ын дэд даргаар ахлуулсан Ажлын хэсэг байгуулагдаж, Булган аймагт ажиллаж байгаа юм. Мөн Булган аймгийн цагдаагийн дарга Л.Ганбаатарыг ажлаас чөлөөлөн, шалгаж байна.

Тэгвэл цагдаагийн албан хаагч О.Цэлмэг өөр нэгэн ноцтой мэдээллийг хүргэсэн нь анхаарал татаж байна. Тодруулбал, тэрбээр цахим хуудастаа “Миний утасны биллийг зөвшөөрөлгүйгээр авч, тагнаж, чагнасан. Цагдаагийн нэг даргаас танил нь “Эхнэрээ хардаад байна. Гар утасных нь биллийг аваад өг” гэж гуйсаар байгаад авахуулаад хүн амины ноцтой хэрэг гарсан гашуун түүх бий шүү. Үүнтэй адилхан зүйл болов” гэх агуулгыг бичиж, нийтэлжээ.

      Энэ мэдээллийн мөрөөр цагдаагийн албан хаагчдыг шалгах ажиллагааг эхлүүлж болзошгүй байна. Хэрэв цагдаагийн хурандаа, дарга нар бусдын гар утасны биллийг зөвшөөрөлгүйгээр авч, хүхүн амины хэрэг гарахал хүргэсэн бол хэн хариуцлага хүлээх вэ. Цагдаагийн ерөнхий газрын дарга Ж.Болд оо, албан хаагчдынхаа хууль бус ажиллагааг шалгаж, олон нийтэд мэдээлнэ үү. 

Ядарсан иргэн нь алга болсон хүнийхээ хамгийн сүүлд хэнтэй утсаар ярьсан, хаашаа явсан гэх утас, камерын бичлэгийг шүүлгэх гэж олон шат дамжлага болдог. Гэтэл танил тал, эрх мэдлээ ашиглаад, цагдаагийн дарга нар бусдын гар утасны бичлэгийг хууль бусаар олшруулаад байгаа юм биш биз.