-УИХ-ЫН ГИШҮҮН, БШУ-Ы САЙД Л.ЭНХ-АМГАЛАН БАГЫН НАЙЗ Ч.БАТСАНСАРЫГАА БОАЖЯ-НЫ ТХНУГ-ЫН ДАРГААР ТОМИЛУУЛЖ, Ч.БАТСАНСАР НЬ Л.ЭНХ-АМГАЛАНГИЙН ХАМААТНЫ ДҮҮ НАРЫН НЭР ДЭЭРХ 11 КОМПАНИД БОГД УУЛЫН АМАНД ГАЗАР ОЛГОЖЭЭ-
УИХ-ын гишүүн, БШУ-ны сайд Л.Энх-Амгалангийн төрсөн дүү, хурандаа Л.Ганбаатар ахынхаа чихийг хоёр дахиа халууцуулав. Өнгөрсөн хавар БЗС-гийн зээлээр ОХУ-д сурч цагдаа болсон нь илчлэгдэж, хэвлэлээр бичигдэхэд Л.Энх-Амгалан айхавтар унтууцсан. Гэтэл өчигдөр албан тушаалаасаа чөлөөлөгдөж, бүр баларлаа. Ахын хувиар дүүгээ алсдаа ЦЕГ-ын дарга болгохоор битүүхэндээ бэлдэж байснаас зайлахгүй. Тиймдээ ч, Чингис хаан нисэх буудал дахь цагдаагийн хэлтсийн дарга төдий байснаа 2020 оны сонгуулийн дараахан Булган аймгийн Цагдаагийн дарга болоод дэвшсэн биз. Наанадаж л, төрсөн дүү нь ЦЕГ-ын дарга байвал ахад нь хууль арай хөнгөн бууна. Ер нь ч УИХ-ын гишүүн Л.Энх-Амгалан хань, хамсаатнуудаасаа төрд томилгоо хийхдээ айхтар алсыг хардаг, ашгийг тооцоолдог нэгэн аж.
УИХ-ын гишүүн, БШУ-ы сайд Л.Энх-Амгалан найз нөхөд, нэг тогооныхноо төрд яаж томилж, тэднээрээ дамжуулан яаж халаасаа дүүргэдгийг харуулах маш ноцтой нэг баримтыг одоо дэлгэе. Л.Энх-Амгалан 2012 онд УИХ-ын гишүүн болж, дараа жил нь буюу 2013 онд багийн найз Ч.Батсансартай “Хөвсгөл аймгийн малчин тариаланчдын холбоо” ТББ-ыг хамтран үүсгэн байгуулсан. Ингээд Ч.Батсансар нь “Хөвсгөл аймгийн малчид тариаланчдын холбоо” ТББ-ын ТУЗ-ийн гишүүн, байгаль орчны судлаач гэж малчид, тариаланчдад өөрийгөө танилцуулан жил тойрон Хөвсгөлөөр, хөдөөгөөр “тэнэсэн”. Улмаар жилийн дараа, 2014 оны арванхоёрдугаар сард УИХ-ын гишүүн Л.Энх-Амгалан Ч.Батсансарыг Байгаль орчин, аялал жуулчлалын яамны Тусгай хамгаалалттай нутгийн удирдлагын газрын дарга болгож томилуулсан. Үнэн хэрэгтээ, Л.Энх-Амгалан УИХ-ын гишүүн болмогцоо л Ч.Батсансарыг БОАЖЯ-ны Тусгай хамгаалалттай нутгийн удирдлагын газрын дарга болгохоор тооцоолж, төлөвлөсөн. Гэтэл Ч.Батсансарт байгаль орчны салбарт ажилласан туршлага, мэдлэг, намтар “А” ч байгаагүй. Иймд, Л.Энх-Амгалан Ч.Батсансартай хамт төрсөн нутгаа түшиглэн “Хөвсгөл аймгийн малчин тариаланчдын холбоо” ТББ-ыг байгуулж, “байгаль орчны судлаач” гэх ганц мөр намтартай болгосон. Ингээд жилийн дараа Ч.Батсансарыг БОАЖЯ-ны Тусгай хамгаалалттай нутгийн удирдлагын газрын дарга болгож, төрийн тусгай хамгаалалттай газар нутагт эзэн суух эхлэлээ тавьсан байгаа юм.
Санасандаа хүрсэн Л.Энх-амгалан Ч.Батсансарыг БОАЖЯ-ны Тусгай хамгаалалттай нутгийн удирдлагын газрын даргын албан тушаалаа авснаас зургаан сарын дараа буюу 2015 оны тавдугаар сарын 14-ний өдөр “Улаанбаатар хот, Хан-Уул дүүрэг, 4-р хороо, Вива Сити, 3/23, 5-5 тоот” гэх нэг хаяг дээр “Эм Зэт санрайс тур” ХХК, “Амирлан тур” ХХК, “Мандах нар тур” ХХК, “Үйлст тур” ХХК гэсэн дөрөн компанийг нэгэн зэрэг байгуулсан.
Энэ компаниудыг Л.Энх-Амгалан нийтээс нууцлахын тулд өөрийнхөө төрсөн эгчийнхээ хүү В.Баяржаргал, аавынхаа төрсөн дүүгийн хүүхдийн хүүхэд Г.Тэгшбаяр болон хамаатны дүү нар болох Д.Ган-Очир, Ч.Хишигжаргал нарын нэр дээр бүртгүүлж, захирлаар нь томилсон байгаа юм.
Тайлбар: Л.Энх-Амгалангийн аавынх нь төрсөн дүүгийн хүүхдийн хүүхэд Г.Тэгшбаяр, төрсөн эгчийнх нь хүү В.Баяржаргал нар
Тайлбар: Л.Энх-Амгалангийн үеэл дүү Г.Тэгшбаяр 2020 оны сонгуулиар аав Л.Ганбаатар, ээж П.Ариунгэрэл нарын хамт хандивч өгч байсан баримт
Ингээд,
- “Амирлан тур” ХХК-ийн нэр дээр Хан-Уул дүүргийн 11-р хороо, Зайсангийн аманд "Аялал жуулчлалын бааз" зориулалтаар Байгаль орчин, аялал жуулчлалын сайдын 2015 оны арванхоёрдугаар сарын 22-ний өдрийн А/433 дугаар тушаалаар 0.3 га, 2016 оны долдугаар сарын 7-ний өдрийн А/220 дугаартай тушаалаар 0.2 га, нийт 0.5 га газар,
- “Мандах нар тур” ХХК-ийн нэр дээр Хан-Уул дүүргийн 11-р хороо, Зайсангийн аманд "Аялал жуулчлалын бааз" зориулалтаар Байгаль орчин аялал жуулчлалын сайдын 2015 оны наймдугаар сарын 6-ны өдрийн тушаалаар 1181м2 газар,
- “Эм зэт санрайс тур” ХХК-ийн нэр дээр "Аялал жуулчлалын бааз" зориулалтаар Байгаль орчин аялал жуулчлалын сайдын 2016 оны зургадугаар сарын 9-ний өдрийн тушаалаар Хан-Уул дүүргийн 4-р хороо, Зайсангийн аманд 3344м2 газар,
“Үйлст зул тур” ХХК-ийн нэр дээр “Аялал жуулчлалын бааз” зориулалтаар Байгаль орчин, аялал жуулчлалын сайдын тушаалаар Хөвсгөл аймгийн Чандмань-өндөр сумын 3-р баг, Улаан асга хэмээх газарт 10.1 га газар тус тус авсан байна.
Багийн найз Ч.Батсансарыг БОАЖЯ-ны Тусгай хамгаалалттай нутгийн удирдлагын газрын даргаар томилуулж, дараа нь хамаатныхаа дүү нарын нэр дээр дөрвөн компани нэг өдөр, нэг хаяг дээр байгуулж, улмаар Ч.Батсансараар дөрвүүлэнд нь Тусгай хамгаалалттай газарт буюу Богдхан уулын аманд газар олгуулжээ. Л.Энх-амгалан Ч.Батсансарыг зориуд Тусгай хамгаалалттай нутгийн удирдлагын газрын дарга болгосны алсын хараа, цаад шалтгаан нь тусгай хамгаалалтай Богдхан уулын амууд байжээ гэсэн үг.
Цааш хөөвөл, Л.Энх-Амгалан, Ч.Батсансар нарын тусгай хамгаалалттай газрын тонуул илүү өргөн хүрээтэй үргэлжилсэн нь харагдана. Тодруулбал,
Дээрх дөрвөн компанийн “Амирлан тур” ХХК нь Л.Энх-Амгалангийн үеэл дүү болох Г.Тэгшбаярын нэр дээр бүртгэлтэй байдаг. Тэгвэл Л.Энх-Амгалан Г.Тэгшбаярын нэр дээр “Жи Эн саншайн скуэр” ХХК, “Интер нутришн импорт” ХХК-иудыг мөн бүртгүүлж, захирлаар нь томилсон. Улмаар,
- “Жи Эн саншайн скуэр” ХХК-ийн нэр дээр Байгаль орчин, аялал жуулчлалын сайдын 2015 оны тавдугаар сарын 29-ний өдрийн тушаалаар Налайх дүүргийн 6-р хороо, Горхи тэрэлжийн цогцолбор газарт “Аялал жуулчлалын бааз” зориулалтаар 5.2 га газар авсан.
- “Интер нутришн импорт” ХХК-ийн нэр дээр Байгаль орчин, аялал жуулчлалын сайдын 2017 оны аравдугаар сарын 3-ний өдрийн тушаалаар Хан-Уул дүүргийн 4-р хороо, Арцатын аманд “Аялал жуулчлалын бааз” зориулалтаар 5.0 га газар авсан. Энэ газрыг өөр компани эзэмшиж байхад нь БОАЖЯ-наас “Газрын төлбөрөө төлөөгүй” гэх шалтгаанаар цуцалж, улмаар “Интер нутришн импорт” ХХК-д олгосон. Гэвч хуучин эзэмшигч нь шүүхдээд ялсан тул Байгаль орчин, аялал жуулчлалын сайдын 2018 оны долдугаар сарын 18-ний өдрийн А/241 дугаартай тушаалаар “Интер нутришн импорт” ХХК-ийн газар эзэмших эрх цуцлагдсан.
Дээрх дөрвөн компанийн “Үйлст зул тур” ХХК нь Л.Энх-Амгалангийн төрсөн эгчийн хүү В.Баяржаргалын нэр дээр бүртгэлтэй байдаг. Тэгвэл Л.Энх-Амгалан В.Баяржаргалын нэр дээр “Монгол фармасютикал корпораци” ХХК, “Ногоон байшин” ХХК-иудыг мөн бүртгүүлж, захирлаар нь томилсон. Улмаар,
- “Монгол фармасютикал корпораци” ХХК-ийн нэр дээр Байгаль орчин, аялал жуулчлалын сайдын 2015 оны дөрөвдүгээр сарын 24-ний өдрийн тушаалаар Хан-Уул дүүргийн 11-р хороо, Зайсангийн аманд “Аялал жуулчлалын бааз” зориулалтаар 4140м2 газар авсан. Энэ газар дээр “Монгол фармасютикал корпораци” ХХК-ийн захиалгаар “Нутгийн буян групп” ХХК “River palace” нэртэй тансаг зэрэглэлийн орон сууцны хотхон барьж байгаа.
- “Ногоон байшин” ХХК-ийн нэр дээр Байгаль орчин аялал жуулчлалын сайдын 2015 оны наймдугаар сарын 5-ны өдрийн тушаалаар Баянзүрх дүүргийн 11-р хороо, Залаатын аманд “Аялал жуулчлалын бааз” зориулалтаар 6.5 га газар авсан.
Дээрх дөрвөн компанийн “Эм зэт санрайс тур” ХХК-ийг Л.Энх-Амгалан Ч.Хишигжаргалын нэр дээр бүртгүүлсэн. Тэгвэл Ч.Хишигжаргалын нэр дээр “Талст ширээт” ХХК гэх бас нэг компани бий. “Талст ширээт” ХХК нь мөн л Байгаль орчин, аялал жуулчлалын сайдын 2017 оны зургадугаар сарын 14-ний өдрийн А/167 дугаартай тушаалаар Арцатын аманд 5.0 га газар газар авсан. Энэ газар дээрээ “Сedar city resudence” нэртэй 600 айлын орон сууцны хотхон барьсан.
Тайлбар: Арцатын аманд буюу Яармагийн зам дагуу "Талст ширээт" ХХК-ийн газар дээр баригдсан "Cedar city" хотхон
Дээрх дөрвөн компанийн “Мандах нар тур” ХХК нь Л.Энх-Амгалангийн хамаатны дүү Д.Ган-Очирын нэр дээр бүртгэлтэй байдаг. Тэгвэл Д.Ган-Очирын нэр дээр дахиад “Мүүн стрийт” ХХК гэх компани бий. “Мүүн стрийт” ХХК нь мөн Байгаль орчин, аялал жуулчлалын сайдын тушаалаар Баянзүрх дүүргийн 11-р хороо, Хүрэлтогоотын аманд газар авсан. Гэхдээ 2020 онд цуцлагдаж, мэдээлэл нь устсан.
Ингэж хамаатныхаа дүү нарыг тусгай хамгаалалттай газрын тонуулдаа татан оролцуулсан Л.Энх-Амгаланг эхнэрийнхээ компаниудын нэр дээр ч газар авчээ. Түүний эхнэр М.Сэржмядаг нь “Интергрупп интернэйшнл” ХХК, “Интерпресс” ХХК, “Мед импекс натурал” ХХК, “Мед импекс интернэшнл” ХХК-уудыг эзэмшдэг. Энэ компаниуд нь мөн л бүгд газар авсан. Тодруулбал,
“Мед импекс интернэшнл” ХХК нь Байгаль орчин, аялал жуулчлалын сайдын 2015 оны дөрөвдүгээр сарын 24-ний өдрийн тушаалаар Баянзүрх дүүргийн 11-р хороо, Залаатын аманд “Аялал жуулчлалын бааз” зориулалтаар 4.2 га газар авсан.
Харин “Мед импекс натурал” ХХК нь Сэлэнгэ аймгийн Сайхан сумын Засаг даргын захирамжаар тус сумын 3-р баг, Номгон гэх газарт “Газар тариалан” зориулалтаар 45.3 га газар, “Интерпресс” ХХК нь Нийслэлийн Засаг даргын захирамжаар Хан-Уул дүүргийн 20-р хороонд “Үйлдвэрлэл, үйлчилгээ” зориулалтаар 1266м2 газар тус тус авчээ.
Ийнхүү Л.Энх-Амгалан багийн найз Ч.Батсансарыгаа 2014-2019 онд БОАЖЯ-ны Тусгай хамгаалалттай нутгийн удирдлагын газрын даргаар ажилуулахдаа бүх компаниа Тусгай хамгаалалттай газарт газартай болгож амжжээ. Нэгэнт, Богдхан уулын тусгай хамгаалалттай газруудыг Л.Энх-Амгалангийн компаниудад хуваарилж өгөөд дууссан Ч.Батсансар 2020 оноос БОАЖЯ-ны харьяа Цэнгэг усны нөөц, байгаль хамгаалах төвийн захирлаар шилжин томилогдсон байдаг. Хоржноонтой нэг баримт эргэн сануулахад, Ч.Батсансарыг БОАЖЯ-ны Тусгай хамгаалалттай нутгийн удирдлагын газрын даргын албан тушаалаа өгсний дараахан буюу 2020 онд газрын асуудал сөхөгдөхөд тухайн үеийн ЗГХЭГ-ын дарга Л.Оюун-эрдэнэ “Байгаль орчны яамны Ч.Батсансар гэж хүн хаана байна. Гурван үсэгтэй компанийн гар хөл, утсан хүүхэлдэй болсон нөхдүүд аятайхан байна шүү. Би бүгдийг нь мэдэж байгаа шүү. Хатуу сануулъя, төр гэж байгаа шүү. Энэ Ч.Батсансар гэх хүнийг төрөөс зайлуулах хэрэгтэй” гэж байсан удаатай. “Гурван үсэгтэй компани” гэдэг нь “МCS” буюу Л.Энх-Амгаланг онилж хэлсэн хэрэг. Гэтэл Ерөнхий сайд болсныхоо дараа Ч.Батсансарын ардах “эзэн” болох Л.Энх-Амгаланг Боловсрол, шинжлэх ухааны сайдаар томилж, өдгөө нэг танхимд тохой нийлүүлэн сууж байна.
| БШУ-Ы САЙД Л.ЭНХ-АМГАЛАН БОГД УУЛЫН АМАНД ХУВИЙН 11 КОМПАНИДАА ГАЗАР АВЧЭЭ |
|
