Ганц өдрийн дотор Богдхан ууланд газар эзэмших гэрчилгээ авсан “Эбосорт Сийдэм” ХХК-ийн захирал З.Мөнгөнхуяг гэж хэн бэ

2023-07-07, 1087

Дархан цаазат Богдхан ууланд газар эзэмших гэрчилгээг ганц өдрийн дотор гаргуулсан “Эбосорт Сийдэм” ХХК холбогдох байгууллагын зөвшөөрөлгүйгээр газраа зориулалтын бусаар ашиглаж, хаус хотхон барьж эхэлжээ. Аялал жуулчлалын отог барих зориулалтаар гэрчилгээгээ гаргуулсан ч хаус, хотхон барьж байгаа тус компанийн цаад эзэн, холбогдогч хэн болохыг сурвалжилж, уншигч танд танилцуулж байна.

-УЛСЫН ТУСГАЙ ХАМГААЛАЛТАЙ 4.3 ГА ГАЗРЫН ГЭРЧИЛГЭЭГ ГАНЦ ӨДӨРТ ГАРГУУЛСАН НЬ-

“Эбосорт Сийдэм” ХХК нь 2021 оны нэгдүгээр сарын 28-ны өдөр цэцэрлэгжүүлэлт, аялал жуулчлалын чиглэлээр ажиллахаар улсын бүртгэл бүртгүүлж, компанийн гэрчилгээгээ авчээ. Тэгвэл компаниа байгуулсны маргааш нь буюу 2021 оны нэгдүгээр сарын 29-ний өдөр Дархан цаазат Богдхан уулын Бумбатын аманд улсын тусгай хамгаалалттай 4.3 га газрыг эзэмших зөвшөөрөл авсан байна. Ингэхдээ “Эбосорт Сийдэм” ХХК нь тус 4.3 га газрыг аялал жуулчлалын түр хоногдох отог байгуулах зориулалтаар таван жилийн хугацаанд эзэмших гэрчилгээ гаргуулж авсан.

Тайлбар: БОАЖЯ-ны Тусгай хамгаалалттай нутгийн удирдлагын газрын дарга Ч.Батсансарын гарын үсэг бүхий газар эзэмших гэрчилгээ

Ердөө ганц хоногийн дотор улсын тусгай хамгаалалттай Дархан цаазат газрын зөвшөөрлийг авсан “Эбосорт Сийдэм” ХХК өдгөө газар эзэмших гэрчилгээнд тусгасан зориулалтаа зөрчиж, орон сууцны хороолол барьж эхэлжээ.

Тайлбар: Дархан цаазат Богдхан уулын Бумбатын аман дахь "Эбосорт Сийдэм" ХХК-ийн барилгын ажлын талбай

-“ЭБОСОРТ СИЙДЭМ”-ИЙН ЭЗЭН З.МӨНГӨНХУЯГ ГЭЖ ХЭН БЭ-

Улсын тусгай хамгаалалттай газрын гэрчилгээг ганц хоногт гаргуулж, хаус, хотхон барьж эхэлсэн “Эбосорт Сийдэм” ХХК-ийн хувьцааг Б.Одончимэг, А.Доржханд гэх хоёр эзэмшиж байсан ч компанийн бүртгэлээс Б.Одончимэг 2021 онд, А.Доржханд 2022 онд хасагдсан байна. Харин “Эбосорт Сийдэм”-ийн эцсийн өмчлөг З.Мөнгөнхуягийн хувьд “Сандэй молл”-ын эзэн. Тухайлбал, З.Мөнгөнхуяг анх худалдаа, үйлчилгээний чиглэлээр ажлын гараагаа эхэлж, сүүлийн жилүүдэд орон сууцны хаус, хорооллын бизнест “гаршаад” байгаа нэгэн аж. Өдгөө З.Мөнгөнхуяг “Эбосорт Сийдэм” ХХК-аас гадна “Сандэй Молл” ХХК, “Сандэй департмент сторе” ХХК, “Хан Хөгшин Дриллинг” ХХК, “Шинэ Сандэй Худалдааны Төв” ХХК-д хувьцаа эзэмшигч, гүйцэтгэх захирлаар ажиллаж байгаа юм байна.