Монголын мөрдөгчид нүүрсний хулгайчдын мөрөөр мөшгөж, хил давуулсан 10 гаруй тэрбум төгрөгийн сэжүүрээс атгаад авчээ. Тэр бүүхэл талыг нь эх орондоо оруулаад ирсэн гээд бужигнаж байна. “Эрдэнэс тавантолгой” компанийн хуучин удирдлагын багийнхан үнэхээр жаалжээ. Монголоос БНСУ руу “угаасан” зургаан сая ам.долларын хэрэгт “Эрдэнэс тавантолгой” компанийн гүйцэтгэх захирал асан, нүүрсний хулгайчдын “загалмайлсан эцэг” гэгдэх нь холгүй байгаа Б.Ганхуяг, тус компанийн Дотоод хяналт, эрсдэлийн удирдлагын газрын захирал асан Х.Нурлат тэргүүтэй хүмүүсийн нэр яригдаж байна.

Н.ТЭМҮҮЛЭН: Нүүрсний гэх хэрэгт холбогдсон албан тушаалтнууд АНУ руу 5.3 сая ам.доллар, БНСУ руу зургаан сая ам.доллар шилжүүлсэн нь тогтоогдсон

        АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэнгийн хэвлэлд өгсөн мэдээллээр “Нүүрсний хулгайн хэргийн хохирлыг тогтоох чиглэл дээр бид анхаарч ажиллаж байна. Нүүрсний гэх хэргийн мөрдөн шалгах ажиллагааны явцад 13.8 тэрбум төгрөгийг нэр бүхий албан тушаалтнууд хахууль хэлбэрээр авсан байж болзошгүй нь тогтоогдож байгаа. Мөн энэ хэргийн улмаас учирсан хохирлын мөнгө нь гадаад улс руу шилжүүлэгдсэн болохыг тогтоосон. Тухайлбал, 5.3 сая ам.доллар АНУ руу, БНСУ руу зургаа орчим сая ам.доллар шилжүүлсэн байна. Гадаад руу шилжүүлэгдсэн хоёр орчим сая ам.доллар нь Монгол Улс руу эргэн орж ирсэн. Харин үлдсэн нь хаана байгаа нь тогтоогдохгүй байгаа. Гэхдээ АТГ БНСУ-ын Ерөнхий прокурорын газартай хамтран ажиллаж байгаа” гэсэн юм.

       Мөн Хууль зүй, дотоод хэргийн сайд Х.Нямбаатар сэтгүүлчдэд мэдээлэл өгөх үеэрээ гадаад руу шилжүүлэгдсэн их хэмжээний гүйлгээний талаар цухас дурдаад амжсан. Тэрбээр “Хоёр улсын хууль сахиулах байгууллагын төлөөлөл уулзаж байна. БНСУ руу шилжүүлсэн гэх зургаан сая орчим ам.долларын хэрэг жичдээ яригдана. Одоогоор тодорхой тооны хүнийг эх орон руу нь шилжүүлж авах ажиллагаа яригдаж байна. БНХАУ-ын Нийгмийг аюулаас хамгаалах яамны төлөөлөлтэй мөн уржигдар уулзалт хийсэн. Энэ чиглэлийн ажлууд бий" гэлээ.

БНСУ РУУ ШИЛЖҮҮЛСЭН ЗУРГААН САЯ АМ.ДОЛЛАРЫН “ЭЗЭН” НЬ Б.ГАНХУЯГ, Х.НУРЛАТ НАР ГЭВ

       Хуулийн байгууллагын мөрдөгчид нүүрсний хулгайн мөнгө хил дамнаж шилжүүлэгдсэнийг илрүүлж, Хууль зүй, дотоод хэргийн сайд нь хилийн цаана байгаа мөнгийг олохын төлөө ажиллаж байгаагаа дуулгалаа. Ноцтой нь  БНСУ руу “угаагдаж” шилжигдсэн гэх зургаан сая ам.долларыг “Эрдэнэс тавантолгой” компанийн гүйцэтгэх захирал асан Б.Ганхуяг, тус компанийн Дотоод хяналт, эрсдэлийн удирдлагын газрын захирал асан Х.Нурлат нарын хүмүүс гаргасан байж болзошгүй талаар эх сурвалж мэдээлж байна.

       Эх сурвалжийн бидэнд өгсөн мэдээллээр “Б.Ганхуягийн багийнхан нүүрсний хулгайн хахуулийн мөнгөө хадгалж байх газраа жинхэнэ олж ядсан бололтой. Монголд хаус  хороолол болгоод зогсохгүй гадаад руу гаргаад явуулчихжээ. Монгол Улсын хэдэн жилийн төсвийг халааслаад, оффшор бүс рүү гаргачихсан гэсэн үг. Мөрдөгчдийн БНСУ-аас олсон зургаан сая ам.долларын эзэн нь Б.Ганхуяг, Х.Нурлат нар гэнэ лээ. Тэднээс гадна төрийн өмчит компанийн удирдлагууд ч оролцсон юм байна лээ. Хууль хяналтын байгууллагын мөрдөгчид гярхай сайн ажиллаж, гадаад руу гаргасан мөнгийг тогтоож, буцаан авчрах арга хэмжээ авч байна. Барилга, байшин болсныг олж тогтоогоод гаднын улсын хуулийн байгууллагатай хамтарч ажиллаж байгаа гэнэ лээ. Б.Ганхуяг, Х.Нурлат нарын хүмүүс “Эрдэнэс тавантолгой” компанийг цөлмөхийг дээд зэргээр үзүүлжээ. Хэлэх ч үг олдохгүй юм. АНУ руу гарсан 5.3 сая ам.доллар ч тэдэнтэй холбоотой байх. Нэг л технологиор гарсан байж таараа” гэлээ.

          Ямартай ч Монголоос хил дамнан шилжүүлэгдсэн нүүрсний хулгайн хахуулийн мөнгө БНСУ, АНУ руу гарсан нь тодорхой болж, талыг нь эх орондоо авчирч, эх үүсвэрийг нь тогтоох ажил үргэлжилж байна. Мөн мөрдөгчдийн илрүүлснээр зургаан сая ам.долларыг “Эрдэнэс тавантолгой” компанийн Дотоод хяналт, эрсдэлийн удирдлагын газрын захирал асан Х.Нурлат дамжуулан гаргасан байж болзошгүй сэжүүр олджээ. Цаашлаад, АНУ руу шилжүүлсэн 5.3 сая ам.доллар ч мөн Б.Ганхуягийн багийнхантай холбогдож байгаа ажээ.

Б.ГАНХУЯГ, Х.НУРЛАТ ТЭРГҮҮТЭЙ ХҮМҮҮС “ТАВАНТОЛГОЙ ТҮЛШ” ХХК-ИЙН АШИГ БОЛОХ ЗУРГААН САЯ АМ.ДОЛЛАРЫГ БНСУ РУУ ГАРГАСАН УУ

       Монгол Улсын Засгийн газрын 2018 оны дөрөвдүгээр сарын 25-ны өдрийн 18 дугаар тэмдэглэлийн “Сайжруулсан шахмал түлшний үйлдвэр байгуулах тухай” хуралдааны шийдвэрийг үндэслэн сайжруулсан шахмал түлш үйлдвэрлэх чиг үүрэг бүхий “Таван толгой түлш” ХХК үүсэн байгуулагдаж байлаа. Тус компани нь түүхий эд болох угаасан нүүрсээ “Энержи Ресурс”-ээс үнэ төлбөргүй авдаг. Өөрөөр хэлбэл, “Тавантолгой түлш” компани үнэ төлбөргүй авсан нүүрсээ барьцалдуулагчтай хольж, сайжруулсан түлш болгон үйлдвэрлэж, нийслэлчүүдэд зардаг гэсэн үг.  Хоржоонтой нь, түүхий эдээ үнэгүй авдаг, угаасан нүүрсээ боловсруулаад, өрсөлдөгчгүйгээр зах зээлд нийлүүлж, нийслэлчүүдэд зардаг “Тавантолгой түлш” ХХК таван жил алдагдалтай ажиллаж байна. Нэг ч төгрөгийн ашиггүй, байнгын алдагдалд орсон гэх нэрийдлээр төрийг “сааж” байгаа уг компанийн алдагдалтай ажиллаад байсан шалтгаан “Эрдэнэс тавантолгой” ХК-ийн гүйцэтгэх захирал асан Б.Ганхуяг, Х.Нурлат тэргүүтэй албан тушаалтнууд байсныг зарлах нь цаг хугацааны асуудал боллоо. 

“ТАВАНТОЛГОЙ ТҮЛШ” ХХК-Д САНХҮҮГИЙН ШАЛГАЛТ ДАХИН ОРУУЛНА

     “Тавантолгой түлш” ХХК-ийн мөнгийг Б.Ганхуяг, Х.Нурлат нар дур мэдэж гадаад руу гаргаагүй нь тодорхой. Тэдний гар, хөл “Тавантолгой түлш” компанид үүрлэж байсан гэсэн үг. Хууль хяналтын байгууллагынхан Б.Ганхуягтай хамтарч, төрийн өмчит хязгаарлагдмал хувьцаатай компанийг “цөлмөсөн” байж болзошгүй тухайн үеийн удирдлагын баг болон нэр бүхий албан тушаалтнуудыг хууль, хяналтын байгууллагаас шалгаж эхэлсэн гэнэ.

        Нүүрсний хулгайн жимээр орж, “Тавантолгой түлш” ХХК-ийн 2018-2022 он хүртэлх санхүүгийн тайланд аудитын шалгалт оруулж эхэлсэн талаар эх сурвалж мэдээллээ. Эх сурвалжийн бидэнд өгсөн мэдээллээр “Тавантолгой түлш” ХХК-ийн удирдлагын багийнхан сандралдаж эхэлсэн гэнэ. Тус компанид эрх бүхий алба хашиж байсан хүмүүсийг толгой дараалан дуудаж, мэдүүлэг авах ажиллагаа эхэлсэн юм шиг байна лээ. Нэг нэг рүүгээ чихээд хөгөө чирч байгаа сурагтай. Хэний тушаалаар, хэн гарын үсэг зурсан, хахуулийн мөнгөнөөс хэн ашиг хүртсэн гээд нэгдсэн шалгалт болох нь. Хөгжлийн банкны зээлдэгчийн хэргээс ч хөгтэй “юм” болох нь. “Чиний шахалтаар гарын үсэг зурсан. Хуурамчаар санхүүгийн бичиг үйлдсэн. Ашигтай ажилласныг зохион байгуулалттайгаар алдагдалтай болгосон” гээд л том асуудлууд эхэлж байгаа” гэлээ.

      Тодруулбал, 2018-2022 оны хугацаанд ажиллаж байсан “Тавантолгой түлш” ХХК-ийн Захиргаа, удирдлагын хэлтсийн дарга Р.Гансүх, ТУЗ-ийн дарга Ж.Батбаясгалан, Ерөнхий нягтлан бодогч С.Билэгдэмбэрэл нарын хүмүүсийг шалгаж болзошгүй байна.

НҮҮРСНИЙ ХУЛГАЙН МӨНГӨӨ КАЗАХСТАНД ОРОН СУУЦНЫ ХОРООЛОЛ БОЛГОСОН Х.НУРЛАТЫН НУУСАН ӨӨР ХӨРӨНГИЙГ ГАДААДААС ОЛЖЭЭ

      Үүнээс гадна Б.Ганхуягийн хамтрагч Х.Нурлатын нуусан хөрөнгийг хууль хяналтын байгууллагынхан тогтоосоор байгаа. 

Харин Х.Нурлатын гол хамтрагч нь Улаанбаатар хот дахь Гаалийн газрын улсын байцаагч З.Сырымбек гэх мэдээлэл бий. Тэрбээр эрх мэдэл, албан тушаалын байдлаа урвуулан ашиглаж, Х.Нурлаттай хамтарч, нүүрсний мөнгөөр Казахстанд хаус хороолол барьсан байж болзошгүй нөхцөл байдал илрээд он дамжих нь. Компанийн газрын дарга, гаалийн улсын байцаагч яаж нүүрсний хулгайч болж, гаднын улсад өндөр зэрэглэлийн хаус, орон сууцны хороолол барьсан бэ гэх асуулт эндээс урган гарч ирнэ. Х.Нурлат нь 2016 оноос “Эрдэнэс таван толгой” ХК-ийн Дотоод хяналт, эрсдэлийн удирдлагын газрын даргаар ажиллаж эхэлсэн байдаг. Харин гаалийн улсын байцаагч З.Сырымбек нь Буянт-Ухаа гаалийн газрын даргаар ажиллаж байгаад 2018 оноос одоогийн албан тушаалдаа томилогдсон байдаг юм билээ. Тэднийг холбож байгаа хамаарал нь “Онлайнложистикс" компани.Мөн нэг нутаг буюу Баян-Өлгий аймгийн Өлгий хот.

            “Онлайнложистикс" компанийг Х.Нурлат 2008 онд үүсгэн байгуулж, З.Сырымбек хувьцаа эзэмшиж ирсэн. 2021 оны аравдугаар сарын 11-нийг хүртэл тус компанийн захирлаар Х.Нурлат ажиллаж байгаад гүйцэтгэх захирлаар Б.Эрдэнээ гэх хүнийг томилж, нэрээ хасуулжээ. Одоо тус компанийг Зухайн Сырымбек, Батбаярын Эрдэнээ, Батбаярын Чөдөр-Эрдэнэ нар хариуцаж, хувьцаа эзэмшдэг. Өөрөөр хэлбэл, гадаад худалдааны чиглэлээр үйл ажиллагаа явуулдаг “Онлайнложистикс" компанийн бүртгэл, бичиг баримтаас харахад Х.Нурлат тус компанид хамааралгүй мэт шиг хэрнээ “нууц ноён” нь гэсэн үг. Үүнийг батлах ганцхан жишээ нь, “Онлайнложистикс" компани нь Х.Нурлатын гэрийн хаяг болон бусад НҮТББ-ын хаяг дээр бүртгэлтэй байдаг аж. Х.Нурлат, З.Сырымбек нар тус компаниараа мөнгө угааж, хулгайн нүүрсний мөнгийг Казахстан руу гаргасан байж болзошгүй байгаа юм. Үүгээр ч зогсохгүй эрх мэдэл, албан тушаалын байдлаа урвуулан ашигласан хулгайн нүүрсний мөнгөөрөө өндөр зэрэглэлийн орон сууцны хороолол барьсан гэх мэдээлэл бий.