Хан-Уул дүүргийн гуравдугаар хорооны “Ирээдүй” хотхон дахь гэрээсээ гараад сураггүй болсон иргэнийг эрэн хайж байна.

    Э.Ганзориг нь 42 настай, 167 сантиметр өндөртэй. 2023 оны хоёрдугаар сарын 23-ны  07:47  гэрээсээ гарсан нь орцных нь хяналтын камерт бичигдсэн. Тэрбээр сураггүй болоод 36 хоног болж байгаа бөгөөд ар гэрийнхэн нь өнөөдрийг хүртэл хайсаар байгаа аж. Бид түүний ээжтэй холбогдож, эрлийн ажиллагаа хэрхэн үргэлжилж байгаа талаар тодруулсан юм.

           Тэрбээр “Хүү минь шинийн 3-ны өглөө  Хан-Уул дүүрэгт дүүтэйгээ амьдардаг байсан  гэрээсээ гараад эргэж ирээгүй. Хүүгээ байж болох бүх газраар хайж байна. Гэрээсээ гарах үеийн хяналтын камерын бичлэгээс өөр ямар ч сэжүүр олдоогүй. Цагдаагийн байгуулагд хандсан ч “Бид хайж байна“ гэхээс хариулт өгөхгүй байна. Хүү минь унаж татдаг өвчтэй. Өөрөө унах гэж байгаагаа мэдэхгүй, гэнэт унана. Ойролцоогоор 30 орчим минут таталт өгнө. Хаа нэг газар унасан байхвий гэхээс айж байна” гэлээ.