Фэйсбүүкээр танилцсан залуугаа гэртээ дуудаж, 15-25 насны дөрвөн этгээдтэй нийлж шатаасан ноцтой хэрэг гарсан байдаг. Тодруулбал, 16 настай Р нь 26 настай Б-г гэртээ дуудаж, найзуудтайгаа цуг архидан согтуурсан. Улмаар түүний найзууд Б-г картны нууц дугаараа хэлээгүй гэх шалтгаанаар зодож, будаг шингэлэгч бие дээр нь асгаж, шатаасан гэх. Одоогийн байдлаар хэрэгт холбогдсон гурван эрэгтэйг цагдан хорьж, хоёр эмэгтэйг нь гадуур байцааж байгаа юм.

                          Хохирогч залуу ГССҮТ-ийн Эрчимт эмчилгээний тасагт эмчлүүлж байгаа. Бид Б-ийн биеийн байдлын талаар түүний аав А-тай холбогдож тодрууллаа. Тэрбээр “Хүүгийн минь эхний хагалгаа амжилттай болсон. Дараагийн хагалгааг нь хэзээ хийх талаар тодорхой мэдээлэлгүй байна. Хүүгийн минь биеийн байдал өмнөхөөсөө арай дээрдэж байгаа. Хэрэг гарснаас хойш хүүг маань шатаасан хэрэгтнүүд болон найз охин нь гэх эмэгтэй бидэнтэй ирж уулзаагүй. Одоо манай гэр бүл хэргийн үнэн, зөв тогтоолгохыг хууль, хяналтын байгууллагаас шаардаж, шалгалтын ажиллагааг түргэвчлүүлэх бодолтой байгаа” гэв.