Талх, гурилын үнэ “тэнгэр”-т хадаж, туйлдсан түмний амьдралыг улам л тартагт нь тулгаж байна. Гэтэл хоржоонтой гэх үү, хяслантай гэх үү, Хүнс, хөдөө аж ахуй, хөнгөн үйлдвэрийн салбарын сайдаар “Дорнод гурил”-ын эзэн Х.Болорчулууныг томилогдоод сар гаруй болж байна. Өөрөөр бол, “Талх, гурилын үнэ хямдрах болов уу” гэж хүлээх нь ямар ч утгагүй гэдгийг улс төрийн эл томилгоо харуулсан. Хэрвээ Х.Болорчулуун гурилын үнийг хямдруулбал халаасаа сэгсэрснээс өөрцгүй хэрэг шүү дээ.
Тэгвэл ард түмэн тал талх, атга гурил ч авч чадахгүйд хүртлээ туйлдаж байхад ар хударгаар нь төрийн сайдын төрсөн дүү нар нь төсвийн тендерээр “зоолж” байна. Тодруулбал, төр түшилцсэн 10 жилийн тэгш ойн дээрээ төрийн сайд болж амжсан Х.Болорчулууны төрсөн дүү төрсөн дүү Х.Болор-Эрдэнийн “Дорнод газар” ХХК, төрсөн дүү Х.Болорчимэгийнх нь хүү О.Тэмүүлэнгийн “Саруул өргөө констракшн” ХХК төрөөс 20.9 тэрбум төгрөгийн тендер авч, төсөв “хонхойлсон” ноцтой баримтыг дэлгэж байна.
Х.БОЛОРЧУЛУУНЫ ТӨРСӨН ДҮҮ, “ЭРДЭНЭС ТАВАНТОЛГОЙ” ХК-ИЙН ТУЗ-ИЙН ХАРААТ БУС ГИШҮҮН Х.БОЛОР-ЭРДЭНЭ ТӨСВИЙН 8.0 ТЭРБУМ ТӨГРӨГИЙН 17 ТЕНДЕРТ ШАЛГАРЧЭЭ
УИХ-ын гишүүн, ХХААХҮ-ийн сайд Х.Болорчулуун олон дүүтэй. Ахынхаа араас албан тушаалд дэвшиж, Ардын намын ач буяныг хүртэж яваа нэг дүү нь Х.Болор-Эрдэнэ. Х.Болор-Эрдэнийн хувьд 2018 оноос “Эрдэнэс тавантолгой” ХК-ийн ТУЗ-ийн хараат бус гишүүнээр сонгогдон ажиллаж буй. ХОМ-ийг нь харсан ч ахынхаа араас тун ойрхон яваа буюу 2.3 тэрбум төгрөгийн нэг орон сууц, нэг хаустай, 170 сая төгрөгийн Lexus-570 жийптэй, дотоодын банканд 1.0 тэрбум төгрөг, гадаадын банканд 513 сая төгрөгийн хадгаламжтай, 1.0 тэрбум төгрөгийн авлагатай, “Дорнод газар” ХХК-ийг эзэмшдэг.
Хамгийн ноцтой нь, Х.Болорчулууны төрсөн дүү Х.Болор-Эрдэнэ “Дорнод газар” ХХК-иараа 2018 оноос төрийн байгууллагуудын төсвийн хөрөнгөөр зарласан тендерүүдийг түүж эхэлжээ. Тэр төрийн 17 тендерт шалгарч, 8.0 тэрбум төгрөг “халаасалсан” бөгөөд Х.Болорчулууны удирдаж буй ХХААҮЯ-наас л гэхэд 2.8 тэрбум төгрөгийн тендер авсан баримт байна.
Х.Болор-Эрдэнийн “Дорнод газар” ХХК-ийн шалгарсан тендерүүдийг дэлгэрэнгүй танилцуулъя.
“Багануур зүүн өмнөд бүсийн цахилгаан түгээх сүлжээ” ТӨХК-ийн:
“35/10 кВ-н Жаргалтхаан дэд станцын 10 кВ-нэ иж бүрэн тоноглол бүхий халаалттай хуваарилах байгууламж”- 352 сая төгрөгийн тендер
Мэргэжлийн хяналтын ерөнхий газрын:
“Ус тээвэрлэх зориулалт бүхий автоцистерн нийлүүлэх”- 150 сая төгрөгийн тендер
Нийслэлийн худалдан авах ажиллагааны газрын:
“Мэргэжлийн хяналтын байгууллагын материаллаг баазыг бэхжүүлэх”- 400 сая төгрөгийн тендер/Мэргэжлийн хяналтын автомашин нийлүүлэх-160.0 сая төгрөг/
Онцгой байдлын ерөнхий газрын:
-
“Ариутгалын автомашин нийлүүлэх”- 329 сая төгрөгийн тендер
-
“Гал сөнөөгчийн хүн нэг бүрийн хувцас хэрэглэл нийлүүлэх”- 334 сая төгрөгийн тендер
Төрийн худалдан авах ажиллагааны газрын:
“Агаарын навигацийн үйлчилгээний ажилчдын 2 автобус нийлүүлэх”- 383 сая төгрөгийн тендер
“Улаанбаатар цахилгаан түгээх сүлжээ” ТӨХК-ийн:
-
“Универсал трактор нийлүүлэх”- 280 сая төгрөгийн тендер
-
“ХТП-001 дэд станцыг транформторын дэд өртөө бүхий ХБ болгон шинэчлэх ажлын материал нийлүүлэх” 883 сая төгрөгийн тендер
-
“Өндөр хүчдэлийн кабель нийлүүлэх”- 683 сая төгрөгийн тендер
-
“Кабель нийлүүлэх” 97.7 сая төгрөгийн тендер
-
“Тусгай зориулалтын дамжуулагч утас нийлүүлэх”- 173.6 сая төгрөгийн тендер
-
“Тэжээлийн блок нийлүүлэх”-439.6 сая төгрөгийн тендер
-
“Өрмийн тоноглолтой, тэвштэй автокран нийлүүлэх”-350 сая төгрөгийн тендер
Хүнс, хөдөө аж ахуй, хөнгөн үйлдвэрийн яамны:
-
“Төмс, хүнсний ногооны техникийн шинэчлэл хийх” 1.0 тэрбум төгрөгийн тендер
-
“Дунд оврын трактор, хүнсний ногооны иж бүрдэл техник нийлүүлэх”- 1.8 тэрбум төгрөгийн тендер
“Цахилгаан дамжуулах үндэсний сүлжээ” ТӨХК-ийн:
“25 тонны даацтай автокран нийлүүлэх”- 420 сая төгрөгийн тендер
Шүүхийн шийдвэр гүйцэтгэх ерөнхий газрын:
“Хүнд даацын механизм болон хүн тээврийн автомашин нийлүүлэх”- 195 сая төгрөгийн тендерт тус тус шалгарчээ.
Х.БОЛОРЧУЛУУНЫ ТӨРСӨН ДҮҮ Х.БОЛОРЧИМЭГИЙН ХҮҮ О.ТЭМҮҮЛЭН ТӨРИЙН 11 ТЕНДЕРТ ЯЛЖ, 12.9 ТЭРБУМ ТӨГРӨГ АВЧЭЭ
УИХ-ын гишүүн, ХХААХҮ-ийн сайд Х.Болорчулууны төрсөн дүү Х.Болорчимэг Барилгын хөгжлийн төвд аж ахуй хариуцсан менежерээр ажилладаг. Харин түүний төрсөн хүүг О.Тэмүүлэн гэдэг бөгөөд нагац ах буюу дээр дурдсан Х.Болор-эрдэнийн “Дорнод газар” ХХК-ийн нэг хувьцаа эзэмшигч байсан.
Тэгвэл О.Тэмүүлэн өдгөө хувьдаа “Саруул өргөө констракшн” ХХК-тай болсон бөгөөд тус компани 2021 онд барилга угсралтын тусгай зөвшөөрөл, 2022 оны гуравдугаар сард эрчим хүчний цахилгаан хангамжийн тусгай зөвшөөрөл авсан. Хамгийн ноцтой нь, тэр даруйдаа л төсвийн тэрбумаар тоологдсон санхүүжилттэй тендерүүдийг “түүж” эхэлсэн байна. Тус компани хоёр жил гаруйн дотор төрийн байгууллагуудын 11 тендерт ялж, 12.9 тэрбум төгрөг “халаасалжээ”. Тэр тусмаа, УИХ-ын гишүүн Х.Болорчулууны төрсөн нутаг, сонгогдсон тойрог буюу Дорнод аймагт энэ оны гуравдугаар сард зарлагдсан 9.8 тэрбум төгрөгийн тендерийг “Саруул өргөө констракшн” ХХК авчээ.
Тухайлбал,
Төрийн худалдан авах ажиллагааны газрын:
“Дорнод аймгийн төвийн 1800 айлын орон сууцны хорооллын цахилгаан хангамж, инженерийн шугам сүлжээний ажлыг гүйцэтгэх”- 9.8 тэрбум төгрөгийн тендер
“Багануур зүүн өмнөд бүсийн цахилгаан түгээх сүлжээ” ТӨХК-ийн:
“35 кВ-ын ЦДАШ-ын төмөр хийцүүд нийлүүлэх”- 226 сая төгрөгийн тендер
“Дорнод бүсийн эрчим хүчний систем” ТӨХК-ийн:
“КРУ-6кВ-ын II секцийн цахилгаан тоноглолын шинэчлэл”- 1.2 тэрбум төгрөгийн тендер
Булган аймгийн Баян-Агт суманд:
“Хог, зам засварын техник нийлүүлэх”- 80.0 сая төгрөгийн тендер
Орон сууц, нийтийн аж ахуйн удирдах газрын:
“Төвийн бүсийн орон сууцны байруудын цахилгааны ерөнхий щит шинэчлэн солих”- 74.7 сая төгрөгийн тендер
СБД-ийн Худалдан авах ажиллагааны газрын:
“Жижиг дунд үйлдвэрлэлийг дэмжих төвийн дээврийн засварын ажил”- 146.5 сая төгрөгийн тендер
Өмнөговь аймгийн Орон нутгийн өмчийн газрын:
“Удам залгасан залуу малчдад олгох 5 ханатай 30 монгол гэр нийлүүлэх”- 150 сая төгрөгийн тендер
Онцгой байдлын ерөнхий газрын:
-
“Ариутгалын автомашин нийлүүлэх”- 160 сая төгрөгийн тендер
-
“Ус зөөврийн автомашин нийлүүлэх”- 260 сая төгрөгийн тендер
-
“Ариутгалын 5 тоннын багтаамжтай автомашин нийлүүлэх”- 272 сая төгрөгийн тендер
-
“Гал сөнөөгчийн хүн нэг бүрийн хувцас хэрэглэл нийлүүлэх”- 600 сая төгрөгийн тендерт тус тус ялжээ.
УИХ-ын гишүүн Х.Болорчулууны төрсөн дүү Х.Болор-Эрдэнийн “Дорнод газар” ХХК болон нагац дүү О.Тэмүүлэнгийн “Саруул өргөө констракшн” ХХК-ийн ялсан тендерүүдэд дотор Эрчим хүчний салбарын тендер хэд хэд байгаа нь анхаарал татна. Тодруулбал, Парламентад Х.Болорчулуун, Ц.Даваасүрэн хоёр хэлхээтэй мэт дотно нөхөрлөдөг. 2016 онд МАН-ын батлахаа хамтдаа сэргээсэн, Оюутолгойн гэрээг хамтдаа эсэргүүцсэн, Ноён уулын төлөө хамт тэмцсэн гээд хоршил, хамтралыг нь дурдвал дундрахгүй олон. Ц.Даваасүрэнгийн хувьд 2017 онд Эрчим хүчний сайд болж, “10 хувийн Ц.Даваасүрэн” гэгдтэлээ салбараа “базаж”явсан. “Үхсэн буурын толгойноос амьд ат айх”-ын үлгэрээр тус салбарт түүний нөлөөлөл одоо ч бий. Тэгвэл Ц.Даваасүрэнгийн нөлөөг ашиглан Х.Болорчулууны төрсөн дүү Х.Болор-Эрдэнэ, нагац дүү О.Тэмүүлэн нар эрчим хүчний салбарын тендерүүдийг түүдэг байж болох хардлага төрж байгаа юм.
Х.БОЛОРЧУЛУУНЫ ТЕНДЕР ТҮҮЖ, ТӨСӨВ “ХОНХОЙЛДОГ” ДҮҮ НАР БУЮУ 20.9 ТЭРБУМ ТӨГРӨГИЙН ТЕНДЕРИЙН БАРИМТ |
|