Фэйсбүүкээр танилцсан залуугаа гэртээ дуудаж, 15-25 насны дөрвөн этгээдтэй нийлж шатаасан ноцтой хэрэг гарсан байдаг. Тодруулбал, 16 настай Р нь 26 настай Б-г гэртээ дуудаж, найзуудтайгаа цуг архидан согтуурсан. Улмаар түүний найзууд Б-г картны нууц дугаараа хэлээгүй гэх шалтгаанаар зодож, будаг шингэлэгч бие дээр нь асгаж, шатаасан гэх. Одоогийн байдлаар хэрэгт холбогдсон гурван эрэгтэйг цагдан хорьж, хоёр эмэгтэйг нь гадуур байцааж байгаа юм.

          Хохирогч залуугийн биеийн байдал хүнд Гэмтэл согог судлалын үндэсний төвийн Эрчимт эмчилгээний тасагт эмчлүүлж байна. Бид Б-ийн биеийн байдлын талаар түүний аав А-тай холбогдож, дахин тодрууллаа. Тэрбээр “Хүү минь эхний хагалгаандаа ороод гарлаа. Хүнд хагалгаа байлаа. Биеийн байдал нь хүнд, аав, ээж хоёр нь сахиж байна. Эмч нар хүнд гэдгийг удаа дараа хэлж байгаа. Биеийнх нь 80 хувь түлэгдсэн гэхээр хүнд ч байлгүй яах вэ дээ. Босож, өндийж чадахгүй, хоол ундандаа өдрөөс өдөрт муудаж байна. Ганц, хоёр үг л хэлж чадаж байгаа” гэв.