Ерөнхий боловсролын 127 дугаар сургуулийн дөрөвдүгээр ангийн сурагч О гэх хүү алга болсон билээ. Түүнийг цагдаагийн албан хаагчид 12 цагийн дараа олж, Хүүхэд хамгааллын төвд хүлээлгэн өгсөн байдаг. Зарим хэвлэл мэдээллийн хэрэгслээр алга болсон хүүг гэр бүлийн хүчирхийлэлд байдаг, арга буюу өөрөө 108 төвд хандсан гэж мэдээлсэн.

        Харин хүүгийн асран хамгаалагч эгч манай сайтад ярилцлага өгөхдөө “Би талийгаач дүүгийнхээ таван хүүхдийг хардаг. Гэр бүлийн хүчирхийлэл үйлдэж байгаагүй. Дүү минь төөрч, алга болсон. Цагдаагийн албан хаагчид олж, 108 төвд өгсөн юм байна лээ. Буруу мэдээллийн уршигаар Хүүхэд хамгаалаллын хамтарсан баг манай гэрт ирж ажилласан. Хариу нь гартал дүүг минь бидэнд өгөхгүй гэсэн” гэсэн юм.

        Тэгвэл хүүг ар гэрийнхэнд нь хүлээлгэн өгчээ. Бид түүний ахтай холбогдож, тодруулахад “Дүүг минь долоо хоногийн дараа бидэнд хүлээлгэж өгсөн. Гэр бүлийн хүчирхийлэлд байгаагүй нь тогтоогдсон учир бидэнтэй цуг амьдархаар болсон. Хүмүүс буруу мэдээлэл түгээж, манай гэр бүл рүү маш их дайрлаа. Үүнд эмзэглэж, харамсаж байлаа. Харин одоо элэг бүтэн учраас бид тайван амьдарч байна. Дүү маань их айж, сандарсан байна лээ. Гэр рүүгээ явж байгаад төөрч, сонирхоод автобусанд суусан гэсэн. Тэгээд 100 айл орчмоос нэг эмэгтэй олж, цагдаад өгсөн байсан. Дүү минь 108 төвд хамгаалалтад байхдаа хүчирхийлэлд өртсөн байна лээ. Гэртээ ирсний дараа усанд оруулах гээд хувцсыг нь тайлсан чинь хөхөрч, няцарсан байсан. Дүү минь хэлэхдээ “Хоёр ах намайг ариун цэврийн өрөөнд оруулж байгаад зодсон. Багшид хэлбэл дахиад зодно шүү” гэсэн. Бид 108 төв рүү хандсан ч ирж уулз гэсэн. Цаг зав байхгүй учраас очиж уулзаж чадаагүй” гэв.