-5800 МЕТРИЙН ӨНДӨРТ ОНГОЦ БУУХ БОЛОМЖГҮЙ УЧИР ДҮҮГ МИНЬ УУЛЧИД АВАРЧ БАЙГАА-

       Киргизстан, Тажикстаны нутагт орших Памирын нурууны Ленин 7134 метр оргилд ганцаарчилсан авиралт хийхээр явсан "Цэгц" клубийн уулчин Х.Бумхишигийн хөл 5800 метрт хөлдөж, ууланд гацсан харамсалтай мэдээлэл бий. Энэ сарын 7-нд Консулын газраас уулчин Х.Бумхишигийн хөл хөлдөж, бэртсэн болохыг Монголын уулчдын холбоонд мэдэгдсэн байдаг. Мэдээллийн дагуу  түүнийг  аврахаар Монголын уулчдын Үндэсний холбооны Аврах ажиллагаа, эрсдэлийн удирдлага хариуцсан дэд ерөнхийлөгч С.Ганхүү, “Жаргалант” клубийн уулчин Э.Даваадорж нар энэ сарын 8-нд Улаанбаатар хотоос хөдөлсөн. Түүнийг аврах ажиллагаанд мөнгө хэрэгтэй учир С.Ганхүү уулчин хандивын данс нээж, аврах ажиллагаагаа эхлүүлсэн байдаг. Одоогийн байдлаар түүний аврах ажиллагаанд 2.5 сая төгрөг цугларсан аж. Тэдний аврах ажиллагаа хэрхэн үргэлжилж байгаа болон уулчин Х.Бумхишигийн биеийн байдал ямар байгаа талаар түүний ахтай холбогдож, зарим зүйлийг тодруулсан юм. 

-Дүүгийнх нь биеийн байдал ямар байгаа вэ. Аврагчид очсон уу?

     -Монголын уулчдын Үндэсний холбооны Аврах ажиллагаа, эрсдэлийн удирдлага хариуцсан дэд ерөнхийлөгч С.Ганхүү, “Жаргалант” клубийн уулчин Э.Даваадорж нар өнөөдөр (өчигдөр) 15:00 цагийн үед дүүгийн минь байгаа газар очиж, анхан шатны тусламж үзүүлсэн. Дүүгийн минь хоёр хөл хөлдчихсөн гутал нь орохгүй байгаа учир тариа хийсэн гэсэн. Тэгээд халуун хоол, цай өгч, сэтгэл санааг нь дэмжиж, биеийг нь тэнхрүүлж байгаад дүүг минь үүрээд ч болтугай бууна гэж хэлсэн. Аврах уулчид дүүд минь өвчин намдаах, тайвшруулах тариа хийсэн байх. Ямартай ч тусламжийн баг очсон учраас айх аюул ард хоцорсон. Дүүгээ аюулгүй, хурдан буугаад ирнэ гэдэгт итгэж байгаа.

-Дүүгийнх нь сэтгэл зүйн байдал хэвийн байгаа юу. Аврагчид энэ талаар мэдэгдсэн үү?

    -Дүүгийн минь ухаан, санаа, сэтгэл зүйн байдал хэвийн байгаа гэсэн. Хөл нь хөлдсөнөөс өөр гэмтсэн зүйл байхгүй болов уу гэж бодож байна. Мэдээж, аврах уулчид очихоос өмнө дүүгийн минь сэтгэл зүй нь хямарч, шоконд орсон байх. Тэр өндөрлөгт тийм байдалтай байх ямар хэцүү бол. Гэхдээ өмнө нь олон удаа оргилд хүрч байсан учраас сэтгэл зүйн бэлтгэлтэй, сэтгэлийн хаттай байсан болов уу гэж бодож байна. 

-Дүүгийнх нь хөлний хэдэн хувь нь хөлдсөн юм бэ. Эмчилгээ хийх боломжтой биз дээ?

    -Аврагчид дүүг минь яаралтай буулгаж, эмнэлэгт үзүүлэх байх. Эмчид үзүүлж байж хөлийнх нь хэдэн хувь хөлдсөн болохыг мэдэх боломжтой. Одоогоор хөл нь битүү хавдчихсан гэхээс өөр мэдээлэл ирээгүй байна. Түүний хөл хөлдөөд зургаа, долоо хонож байгаа учир эмчилгээ хийхэд хүндрэлтэй байж магадгүй гэж таамаглаж байгаа. Дүү минь бие дааж явсан учир бүх эрсдэлээ өрөө хариуцаж, эмчилгээгээ хийлгэнэ. Уулчин бэртчихсэн учир Монголын уулчдын Үндэсний холбооноос дүүг минь аврахаар тусалж байгаа. Монголын уулчдын Үндэсний холбооны хамт олонд баярлаж байна.

-Х.Бумхишиг хэдэн жил ууланд авирч байна вэ?

    -Би үеэл ах нь болохоор “Цэгц” клубт хэзээ элссэнийг нь мэдэхгүй байна. Сүүлийн жилүүдэд ууланд авирах сонирхолтой болсон байсан. 25 настай залуухан уулчин. Наймдугаар сард тус уул руу багийнхантайгаа яваад оргилд нь хүрч чадаагүй, буцаж ирсэн. Харин энэ сард ганцаарчилсан төрлөөр авирч байгаад бэртчихлээ. Харамсалтай байна. Гэхдээ удахгүй зүгээр эдгэрч, дахин ууландаа гарна гэдэгт итгэлтэй байгаа.  

/Х.БУМХИШИГИЙГ АВРАХААР ЯВСАН УУЛЧИД/

-Дүү нь хэдүүлээ амьдардаг вэ?

    -Дүүд минь ахаас нь өөр хүн байхгүй. Гэхдээ ах нь энэ талаар сайн мэдээгүй, мэдээлэлгүй байгаа.

-Аврах уулчид Монгол руу яаж холбогдож байгаа вэ. Түүнийг явган аврахаас өөр боломж байхгүй юу?

    -С.Ганхүү нь Киргизстаны уул руу олон удаа явж байсан мэргэжлийн уулчин. Тиймээс Киргизстан Улсын дугаартай юм билээ. Түүгээрээ Монголын уулчдын холбоо болон “Цэгц” клубтэй холбогдож байгаа. Харин Х.Бумхишигт холбоо барих утас байхгүй. Дүүгийн минь хөл даваа гарагт хөлдсөн юм билээ. Тэрбээр гаднын гурав, дөрвөн уулчинд бэртсэн тухайгаа мэдэгдэж, Монгол руу дамжуулж өгөхийг хүссэн юм билээ. Тус уулчид нь  гурав дахь өдөр уулнаас бууж Монголын Консулын газарт мэдэгдсэн юм билээ.

    5800 метрийн өндөрт онгоц буух боломжгүй учир заавал уулчид авирч, аврах боломжтой гэсэн. Мөн тус ууланд авирах улирал нь дуусчихсан учир дүүтэй минь уулчид таарахгүй, ганцаараа эвгүй байсан байх. Мөн Киргизстаны Онцгой байдлын газрынхан 3000 дээш өндөрт аврах ажиллагаа явуулах боломжгүй, бэлтгэлгүй байгаа гэх тайлбар өгсөн учир Монголын уулчид явсан. С.Ганхүү уулчин сарын өмнө дүүтэй минь хамт явж, тус өндөрлөгт хүрсэн учир дүүг минь аврахаар явсан. Тэдний баг, хамт олонд чин сэтгэлээсээ баярлаж байгаагаа хэлье. Бид Монголын уулчдын Үндэсний холбооноос дүүгийнхээ талаар мэдээлэл авч байгаа. Харин дүүтэйгээ нэг ч удаа холбогдоогүй байна. Ярих боломж ч байхгүй юм билээ.