УИХ-ын гишүүн Б.Баттөмөрийн хамаарал бүхий “Тэс петролиум” ХХК нь төрийн, төсвийн тендерүүдийг хэрхэн “түүдэг” вэ гэдгийг бид баримттайгаар хүргэсэн.

Тодруулбал, “Тес петролиум” ХХК нь,

ШШГЕГ-ын харьяа 415 дугаар нээлттэй, хаалттай хорих ангид шатахуун нийлүүлэх 23.5 сая төгрөгийн тендер

СХД-ийн хог тээврийн автомашинуудад түлш нийлүүлэх 750 сая төгрөгийн тендер

Хөвсгөл Дулааны станцад шатах, тослох материал нийлүүлэх 319 сая төгрөгийн тендер

Хөвсгөл Дулааны станцад шатахуун нийлүүлэх 128.4 сая төгрөгийн тендер

Хөвсгөл Дулааны станцад шатахуун нийлүүлэх 190.4 сая төгрөгийн тендер

ЦЕГ-ын Тээврийн цагдаагийн албанд шатахуун нийлүүлэх 200 сая төгрөгийн тендер

ЦЕГ-ын Тээврийн цагдаагийн албанд шатахуун нийлүүлэх 150 сая төгрөгийн тендер

Увс аймгийн цагдаагийн газарт шатахуун, шатах тослох материал нийлүүлэх 108.6 сая төгрөгийн тендер

Увс аймгийн Улаангом, Тохижилт үйлчилгээний газарт шатахуун, тослох материал нийлүүлэх 73.2 сая төгрөгийн тендер

Увс аймгийн Нэгдсэн эмнэлэгт шатах, тослох материал нийлүүлэх 58 сая төгрөгийн тендер

Орхон аймаг дахь бүсийн оношилгоо, эмчилгээний төвд шатах тослох, материал нийлүүлэх 63.2 сая төгрөгийн тендер

“Монголын төмөр зам” ТӨХК-д дизель түлш, шатахуун нийлүүлэх 44.3 сая төгрөгийн тендер

Дархан-Уул аймгийн Нэгдсэн эмнэлэгт шатахуун нийлүүлэх 88.2 сая төгрөгийн тендер

Багахангай дүүргийн онцгой байдлын хэлтэст шатахуун нийлүүлэх 13.8 сая төгрөгийн тендерт тус тус шалгарсан баримт юм.

Бид мэдээллийг тэнцвэртэй хүргэх үүднээс УИХ-ын гишүүн Б.Баттөмөртэй холбогдож, энэ талаар тодрууллаа.

         Тэрбээр “Шатахууны компани шатахууны тендерт л оролцоно шүү дээ. Түүнээс энэ тэнд бараа шахаж, хууль бус хийсэн юм байхгүй. “Тес петролиум” ХХК хамгийн бага үнээр тендерт оролцож, шалгарч байгаа. УИХ-ын гишүүн эрх мэдэл, албан тушаалын байдлаа урвуулан ашиглана гэж байдаггүй юм. “Петровис” ХХК 600 гаруй удаа тендер авсан байгаа. Манайх ердөө 14 удаа л тендер авсан. Би ашиг сонирхлын зөрчил гаргаж, эрх мэдлээ ашиглаж, тендерт ялуулсан юм байхгүй. Тендергүйгээр нийлүүлсэн бол ашиг сонирхлын зөрчил болно. “Тес петролиум” ХХК тендерт оролцох надад хамаагүй. Хариуцах хүмүүс нь ажлаа хууль ёсны дагуу хийгээд явж байгаа. “Тес петролиум” ХХК 1000 гаруй хүний амьдралыг авч явж байгаа. Мөн дээрээс хамгийн шилдэг татвар төлөгч компани” гэлээ.

        Мөн үүнээс гадна бид УИХ-ын гишүүн Б.Баттөмөр “Бэрэн групп” ХХК-аас гадна Хөгжлийн банкны бас нэгэн найдваргүй зээлдэгч “Зэст-Өндөр” ХХК-тай холбогдож байгаа баримтыг хүргэсэн билээ. Хөгжлийн банкны хэргийг шалгах Ажлын хэсгийн ахлагчаар Б.Баттөмөр ажилладаг. Ажлын хэсгийн ахлагч нь найдваргүй зээлтэй хоёр ч компанийн хувьцааг эзэмшдэг нь ашиг сонирхлын зөрчил биш үү. Энэ талаар түүнээс тодрууллаа.

УИХ-ын гишүүн Б.Баттөмөр “Хөгжлийн банкны найдваргүй зээлдэгч “Зэст-Өндөр” ХХК-ийг АТГ-т шалгуулахаар Ажлын хэсгийн ахлагчийн хувиар өгсөн байгаа. Та бүхэн үнэн зөв мэдээллийг хүргээрэй. Хөгжлийн банкны найдваргүй зээлдэгчдийн захиалгаар хүнийг гүтгэж болохгүй. Шүүхэд хандана” гэлээ.