Монгол Улсын Засгийн газрын 2021 оны 321 дүгээр тогтоолоор Өмнөговь аймагт эрчим хүч, геологи, уул уурхай, барилга, мэдээллийн технологийн чиглэлээр ШУТИС-ийн харьяа сургуулийг шинээр байгуулахаар шийдвэрлэсэн байдаг. Тэгвэл бүтэн жилийн хугацаанд бэлтгэл хангалтаа хийж, намрын элсэлтээ авч, салбар яамнаас нь бодлогын хүрээнд дэмжиж, багагүй хөрөнгө зарцуулсан тус сургууль нээгдээгүй байхдаа хаалгаа барих дээрээ тулжээ. Тодруулбал, сургуулийн захирлыг томилохтой холбоотойгоор Засгийн газрын алсыг харсан шийдвэр цуцлагдаж, гацаж магадгүй болжээ. Мөн элссэн суралцах хүсэлт өгсөн олон оюутан хохирч үлдэх эрсдэл үүссэн гэнэ.

Угтаа Өмнөговь аймагт байгуулагдсан ШУТИС-ийн харьяа сургуулийн захирлын суудалд тус аймгийн Засаг дарга Р.Сэддоржийн найз Б.Баяржавхлан гэх хүн томилохоор болсон гэнэ. Дөнгөж үүсэж, хөл дээрээ тогтож ядаж байгаа шинэ сургуулийн захирлаар мэргэжлийн бус хүнээр удирдуулахаар болсон БШУ-ны сайд Л.Энх-Амгалангийн шийдвэрийг тус сургуулийнхан гайхан хүлээн авч, эсэргүүцээд байгаа гэнэ.

Учир нь, шинэ захирал Б.Баяржавхлан нь ерөнхий мэргэжлийн хувьд дутуу дулимаг, аймгийн Засаг дарга Р.Сэддоржийн найз гэдэг утгаараа арын хаалгаар захирал болох гэж байна хэмээн эсэргүүцээд буй. Мөн түүнийг Засаг даргын нөмөр нөөлгөөр албан тушаалд томилогдож, авлига, хээл хахуулийн хэрэгт нэр холбогдсон байж болзошгүй гэж хардаж байгаа ажээ. Мөн түүнчлэн түүнийг аймгийн Засаг дарга Р.Сэддоржтой хамтарч тендерийн будилаан үүсгэдэг, эрх мэдэл, албан тушаалын байдлаа урвуулан ашиглаж, өөрсдөдөө болон бусдад илт давуу байдал үүсгэдэг гэх мэдээлэл хүртэл бий. Тэрбээр өмнө нь Өмнөговь аймгийн Инновац, технологийн төвийн даргаар ажиллаж байжээ. 

Ерөнхий сайд Л.Оюун-Эрдэнийн “Алсын хараа-2050”, Шинэ сэргэлтийн бодлогын хүрээнд хот хөдөөгийн хөгжлийг дэмжих, төвлөрлийг сааруулах зорилгын хүрээнд хэрэгжих төсөл энэ мэт албан тушаалын тэмцлээс болж саатаж болзошгүй байна. Иймд Ерөнхий сайдыг энэхүү төсөлд анхаарлаа хандуулж, олон оюутны эрх ашгийг хамгаалахыг учир мэдэх хүмүүс уламжилж байна лээ.