Дарханы замын тендерийн асуудал олон хүний “дээл”-ийг нөмрүүлж, нартаас нарсанд аваачиж мэдэх нь ээ. 2019 оны зургадугаар сард ажил нь эхэлсэн Улаанбаатар-Дархан чиглэлийн 204 км автозам өдий хүртэл удаж, ужгирсан шалтгаан нь “урт гар”-тнууд хэтэрхий олон оролцсоных. Арга ч үгүй биз, анхны зураг төсвөөрөө бол Улаанбаатар-Дарханы 204 км авто замыг 822 тэрбум төгрөгөөр барих тооцоо гаргасан. Тэгэхээр хэн хүний хуруу, гараа дүрэх, хэтэвч, хормойгоо тосох шуналыг хөдөлгөсөн байж таарна.
Тиймдээ ч АТГ-аас тус 204 км авто замын тендер шалгаруулалтад оролцсон Зам, тээврийн хөгжлийн яамны дарга, цэрэг нарыг шалгаж эхэлсэн, улмаар тэдний орон байр, оффис өрөөнд нь нэгжлэг хийж, нэмэлт материалууд хурааж авсан. Мөнгө мөр үлдээдэг гэдэг үгтэй юм, сүлжээгээ сайн нуусан ч илрэх цаг нь ирсэн биз. Эхнээсээ ч баривчлагдаж, тухайн үед тендер шалгаруулалтыг зохион байгуулж, шүүсэн Үнэлгээний түр хорооны гишүүн ЗТХЯ-ны мэргэжилтэн Л.Баянзулыг саатуулаад байгаа гэх. Мөн мэргэжилтэн Ч.Сугармаа, газрын дарга Б.Оюундэлгэр нарыг баривчлах хүсэлт гаргаад буй гэх. Сонирхуулахад, жирийн нэг мэргэжилтэн Ч.Сугармаа л гэхэд 14 орон сууцтай, 200 сая төгрөгийн Ланд-200 автомашинтай, 365 сая төгрөгийн авлагатай гэж хөрөнгөө мэдүүлж байсан юм билээ.
Тэгвэл Дарханы зам төсөв, тендер тойрсон булхай, будилаантай холбоотой зарим шинэ баримтыг танилцуулж байна. Тодруулбал, Дарханы замын ажилд өмнө нь төрд буюу Авто замын газрыг даргаар ажиллаж байсан хоёр ч хүн оролцож байгаа ажээ. Мөн Дарханы замын тендерт Хятадуудыг оруулж, шалгаруулахад нь гол үүрэг гүйцэтгэсэн "нөхөр" хил давж зугтсан гэх мэдээлэл ч байна.
ДАРХАНЫ ЗАМЫН АЖИЛД 13 ТЭРБУМ ТӨГРӨГӨӨР ЗӨВЛӨГӨӨ ӨГЧ БУЙ ЭНЭТХЭГ КОМПАНИЙН ЗАХИРЛААР АВТО ЗАМЫН ГАЗРЫН ДАРГА АСАН, Л.ХАЛТАРЫН БОДЛОГЫН ЗӨВЛӨЛИЙН ГИШҮҮН С.ОЧИРБАТ АЖИЛЛАДАГ
Манай Засгийн газар, Азийн хөгжлийн банктай хамтран “Бүс нутгийн авто зам хөгжүүлэх зам засвар, арчлалтын төсөл”-ийг хэрэгжүүлэхээр тус бүр 60.0 сая ам.доллар, нийт 120.0 сая ам.долларын дүн бүхий МОН-3679, МОН-3786 дугаартай зээлийн гэрээг 2018 оны долдугаар сарын 23, 2019 оны аравдугаар сарын 2-нд тус тус байгуулж байв. “Бүс нутгийн авто зам хөгжүүлэх зам засвар, арчлалтын төсөл” гэдэг нь ярианы хэлээр бол Улаанбаатар-Дархан чиглэлийн 204 км авто замыг сэргээн засварлах, шинэчлэх төсөл юм. Ийнхүү санхүүжилтийн гэрээ хийгдсэний дараа ЗТХЯ-ны Төрийн нарийн бичгийн даргын тушаалаар тендерийн Үнэлгээний түр хороог байгуулж, өнөөг хүртэл хэл ам дагуулж буй дөрвөн Хятад компанийн сонгон шалгаруулсан. Түүх ингэж эхэлсэн гэсэн үг л дээ.
Тэгвэл Улаанбаатар-Дархан чиглэлийн 204 км авто замын ажилд гараа бохирдуулахгүй, гүйцэтгэгч компаниудтай адил хэл аманд өртөхгүй буюу хяналт тавих, зөвлөх үйлчилгээ үзүүлэх гэх тун цэвэрхэн нэртэй оролцож, тэгэх мөртөө ам.доллар ахиу “халаасалж” байгаа нэг компани байна. Тодруулбал, Улаанбаатар-Дархан чиглэлийн 204 км автозамын барилгын ажилд өдөр тутмын хяналт тавих, зөвлөх үйлчилгээ үзүүлэх компанийг сонгон шалгаруулах тендерийг 2018 оны аравдугаар сарын 29-нд зарлаж, 23 компани оролцсон байна. Улмаар БНЭУ-д бүртгэлтэй “Интерконтинентал консаланс энд техноратс” компани, туслан гүйцэтгэгчээр “Ай Си Ти Сайн консалтинг” ХХК тус тус шалгарч, 2019 оны зургадугаар сарын 5-нд 4.3 сая ам.долларын үнийн дүнтэй гэрээ байгуулсан байна. Энэ бол одоогийн ам.долларын ханшаар 13.7 тэрбум төгрөг гэсэн үг юм.
Тэгвэл Улаанбаатар-Дархан чиглэлийн 204 км автозамын барилгын ажилд өдөр тутмын хяналт тавих, зөвлөх үүрэг хүлээсэн “Ай Си Ти Сайн консалтинг” ХХК-ийг БНЭУ-д бүртгэлтэй Интерконтинентал консаланс энд техноратс” компани эзэмшдэг бол Ерөнхий захирлаар нь Содын Очирбат гэгч ажилладаг ажээ. Гэтэл судлаад үзвэл, С.Очирбат гэгч нь өмнө нь Авто замын газрын даргаар ажиллаж байсан, тэр байтугай манай улсын анхны замын тухай хуулийг боловсруулалцсан нэгэн байх ажээ. Мөн одоо ЗТХ-ийн сайд Л.Халтарын дэргэдэх буюу түүнд зам, тээврийн салбарын мэргэжлийн зөвлөгөө өгөх үүрэгтэй Бодлогын зөвлөлийн гишүүн ажээ. Тэгсэн мөртөө БНЭУ-д хөрөнгө оруулалттай компанийн нэрээр Улаанбаатар-Дарханы замын тендерт зөвлөх үйлчилгээ үзүүлэх нэрээр шалгарч, 13 тэрбум төгрөг “халаасалж” байгаа аж.
Сонирхуулахад, “Бүс нутгийн авто зам хөгжүүлэх зам засвар, арчлалтын төсөл”-ийн нэгжийн шилэн дансыг шүүж үзвэл, зөвхөн долдугаар сарын 1-31 хүртэлх нэг сарын ажлын хөлсөнд С.Очирбатын толгой компани руу 132 ам.доллар буюу 420 гаруй сая төгрөг шилжүүлжээ.
Ийм өндөр төсвөөр зөвлөгөө өгч, хяналт тавих үйлчилгээ үзүүлж буй атал Дарханы зам ганц бороонд урсчихаад байдаг нь гайхмаар биш гэж үү.
НИЙСЛЭЛИЙН АВТО ЗАМЫН ГАЗРЫН ДАРГА АСАН Д.НАНЗАДДОРЖИЙН ХҮҮ Д.МӨНХБАЯСГАЛАН ДАРХАНЫ ЗАМЫН ГҮЙЦЭТГЭГЧ КОМПАНИУДЫН САНХҮҮЖИЛТИЙГ “ОЛГОДОГ”
Дээр дурдсанчлан, Улаанбаатар-Дархан чиглэлийн 204 км автозамыг Зам, тээврийн хөгжлийн яамны харьяа “Бүс нутгийн авто зам хөгжүүлэх, засвар арчлалтын төсөл”-ийн нэгж хариуцаж байгаа. Өөрөөр хэлбэл, Улаанбаатар-Дарханы замыг гүйцэтгэгч компаниудын ажлын тайланг хянаж, нэгтгээд Зам, тээврийн хөгжлийн яаманд тайлагнах, Азийн хөгжлийн банк, Европын сэргээн босголтын банкнаас орж ирсэн санхүүжилтийг гүйцэтгэгч компаниуд руу шилжүүлэх буюу гардан хариуцаж буй төслийн нэгж гэсэн үг. Тэгвэл энэхүү төслийн нэгжийн удирдагчаар Нанзаддоржийн Мөнхбаясгалан гэх залуу ажилладаг. Тодруулбал, тэрбээр Нийслэлийн замын хөгжлийн газрын дарга асан Д.Нанзаддоржийн хүү бөгөөд “Мөнхөд ашдын зам” ХХК-ийн захирал юм. Аавынх нь авто замын газрыг удирдаж байсан нөлөө байв уу, аль эсвэл төр өөрөө түүнийг соёрхов уу, ямартай ч нас залуу, намтар нимгэн атлаа асар өндөр санхүүжилттэй төслийг хариуцаж байгаа ажээ.
Түүнчлэн, Нийслэлийн авто замын газрын дарга асан Д.Нанзаддорж төрийн албыг орхисноосоо хойш автозамын тендерүүдийг ёстой л түүж байгаа ажээ. Тодруулбал, түүний гэр бүл “Мөнхөд ашдын зам” ХХК-тай бөгөөд Д.Нанзаддорж өөрөө ерөнхий инженерээр, эхнэр Н.Мөнхжаргал нь ерөнхий нягтлан бодогчоор ажилладаг бол Ерөнхий захирлаар нь хүү Н.Мөнхбаясгалан ажилладаг ажээ.
Тухайлбал, “Мөнхөд ашдын зам” ХХК-ийн сүүлийн хоёр жил гаруй хугацаанд “түүсэн” тендерүүдийг нь түүвэрлэн танилцуулж байна.
-
Налайх-Чойр чиглэлийн 20.9 км автозамын өргөтгөл, шинэчлэлтийн ажлын зөвлөх үйлчилгээний 2.0 тэрбум төгрөгийн тендер
-
Улаанбаатар хотын гол гудамж замын болон явган зорчигчийн хөдөлгөөний эрчмийн тооллогын ажлын 50.0 сая төгрөгийн тендер
-
Архангай аймгийн Өгийнуур-Батцэнгэл-Ихтамир чиглэлийн 63 км хатуу хучилттай автозам, төмөр бетон гүүрийн угсралтын ажилд зөвлөх үйлчилгээ үзүүлэх 923.2 сая төгрөгийн тендер
-
Тосонцэнгэл-Улиастай чиглэлийн 67 км хатуу хучилттай автозамын ажилд хяналт тавих, зөвлөх үйлчилгээ үзүүлэх 2.2 тэрбум төгрөгийн тендер
-
Замын-Үүд боомтын авто зам, талбайн барилгын ажилд хяналт тавих 463.4 сая төгрөгийн тендер
-
Гашуунсухайт боомтын автозам, талбайн барилгын ажилд хяналт тавих 162.0 сая төгрөгийн тендер
-
Баруун чиглэлд автозамаас Аргалант сумын төв хүртэлх 7.1 км авто замын 142 сая төгрөгийн тендер
-
Зуунмод сумын төвөөс Хөшигийн хөндийн шинэ нисэх онгоцны буудал чиглэлийн автозамын 117.9 сая төгрөгийн тендер
-
ЧД-ийн 149 дүгээр сургуулийн урд талын автозам, авто зогсоол, автобусны буудлын зураг төсөв гаргах 25.0 сая төгрөгийн тендер
-
Гашуунсухайт автозамын захиалагчийн хөндлөнгийн хяналт тавих 265.8 сая төгрөгийн тендер
-
Үйлдвэрлэл технологийн паркийн автозамын техник, хяналтын үйлчилгээний 482.8 сая төгрөгийн тендер зэрэг тус тус шалгарчээ.
Өөрөө авто замын газрыг удирдаж явсан, танил талтай, тендер зарлах, арга технологийг нь мэддэг учраас шалгарахад нь хялбар байдаг ч байж болох. Ямартай ч түүний гэр бүл Дархан-Улаанбаатарын авто замын санхүүжилтийг “базах”-ын сацуу хувийн компаниараа тендерүүдийг “түүж” байгаа ажээ.
ДАРХАНЫ ЗАМЫН ТЕНДЕРТ “АВЛИГА”-ААР ШАЛГАРСАН ХЯТАД КОМПАНИУДЫН АРД З.БУЯННЭМЭХ ГЭХ ЗАЛУУ БАЙДАГ ГЭВ ҮҮ
Улаанбаатар-Дархан чиглэлийн 204 км автозамыг тав хувааж, тус бүрд нь тендер зарладаг БНХАУ-ын дөрвөн компани шалгарч байв. Үүнийг ЗТХЯ-ныхан “Азийн хөгжлийн банк болон Европын банкны шалгуурт Монгол компаниуд тэнцэх боломжтой байсан” гэж тайлбарлаад өнгөрсөн. Гэтэл өнөө хятад компаниуд нь удалгүй асуудал дагуулж эхэлсэн, өнөөдөр ч үргэлжилж байна. Тэгвэл тухайн хятад компаниудын цаана З.Буянтогтох гэх залуу байсан байж болзошгүй мэдээлэл байна. Гэтэл, хамгийн ноцтой нь, хууль хяналтынхан өөртэй нь холбоотой сэжүүр олмогц хил давж зугтсан гэх.
Судлаад үзвэл, З.Буяннэмэх гэгч нь 2004 онд “Альфа ассет менежмент Монголиа” ХХК-ийг байгуулж, бизнес хийж эхэлсэн. Мөн Улсын харцага Г.Ганхуягтай хамтран “Бөх харцага” ХХК-ийг байгуулж байсан. Удалгүй “Бурхан буудай групп” ХХК-ийн байгуулж, бизнесээ өргөжүүлсэн товч намтартай нэгэн ажээ. Нийгмийн оролцооны хувьд З.Буянэмэх нь Монголын пауэрлифтингийн нэгдсэн холбооны ерөнхийлөгчөөр ажилладаг юм байна.
Гэр бүл, гарал угсааны хувьд, аав Б.Заяабаатар нь ахмад улстөрч, яруу найрагч, ээж С.Лхамжав нь хүний их эмч, клиникийн профессор ажээ. З.Буяннэмэх нь З.Буяннэмэх З.Ичинхорлоо, З.Янжинхорлоо гэдэг хоёр эгчтэй, айлын бага хүү юм байна.
Дарханы замтай холбогддог сэжүүрүүдийнх нь нэг нь, түүний эгч нар буюу З.Янжинхорлоо, З.Ичинхорлоо нарын эзэмшдэг “Энх төгөл бэх” ХХК нь Улаанбаатар-Дарханы замын ерөнхий гүйцэтгэгч хятад компаниудтай гэрээ байгуулж, туслан гүйцэтгэгчээр нь ажилладаг ажээ.
Сонирхуулахад, З.Буяннэмэх нь 2012 онд Тайландын нислэгээр явж байх үедээ террорист халдлагаас 216 хүний амь насыг аварсан гэж тухайн үеийн Ерөнхий сайд С.Батболд сайшааж байсан. Улмаар өнгөрөгч 2021 оны арваннэгдүгээр сард Ерөнхийлөгч У.Хүрэлсүх тэр гавьяаг нь үнэлж, Хөдөлмөрийн гавьяаны улаан тогийн одон хүртээсэн байдаг. Олон жилийн дараа нөхөн шагнагдсан нэг шалтгаануудынх нь З.Буяннэмэх Говь-Алтай аймгийн Халиун сумынх буюу Ерөнхийлөгч У.Хүрэлсүхийн ээжтэй нэг сумынх ажээ.
ҮРГЭЛЖЛЭЛ БИЙ...
| ДАРХАНЫ ЗАМЫН ХЯТАДУУДЫГ ХЭН "ЗАХИРДАГ" ВЭ |
|
(6).jpg)
Ерөнхийлөгчийн дүү Ухнаагийн Отгонбаяр телевизээр шалгалт өглөө
“Нээлттэй ирээдүй” арга хэмжээ Дархан, Эрдэнэт, Хөвсгөл аймагт...
Тоглоомын талбайн стандартын хэрэгжилтийг хангуулах ажлын хэсэг хуралдав
Н.НОМТОЙБАЯР: Л.Оюун-Эрдэнэ, Лу.Гантөмөртэй аль ч тойрогт халз үзэхэд бэлэн байна
Ус гүн цэвэршүүлэх үйлдвэрийн бүтээн байгуулалт ирэх онд бүрэн дуусна
Онцгой байдлын байгууллага шинэ төрлийн гал унтраах дрон, роботыг олон нийтэд танилцууллаа
Бурхан Багшийн Их Дүйчэн өдрийг 25 дах жилдээ тэмдэглэж байна
Г.Занданшатар: Орон нутгийн иргэд татгалзаад байхад ашигт малтмалын лиценз олгодог байдлыг хална
Лу.Гантөмөр С.Баярцогтыг сонгуульд дэвшүүлэхгүй гэв үү
Оросын олон улсын тэмцээнээс “Хангарьд”-ын жүдочид медаль хүртжээ
Хөгжмийн олон төрлөөр бүтээлээ туурвидаг B.L.M.D хамтлаг энэ сарын 31-нд тоглолтоо хийнэ
Самбо бөхийн Ази тивийн аварга амжилттай оролцжээ
Дорнод аймгийн 1993 оны төгсөгчид спортын аваргуудаа шалгаруулжээ
“Азийн тэсвэртэй хотууд” төсөл Улаанбаатар хотод хэрэгжинэ
Согтуугаар жолоо барьсан 79 зөрчил бүртгэгдэж, 92 хүнийг эрүүлжүүлжээ
“Парис 2024” олимпын чөлөөт бөхийн төрөлд барилдах тамирчдын нэрс тодорлоо
ГОЛОМТ БАНК ОЛОН УЛСЫН ЗАХ ЗЭЭЛ ДЭЭР АНХНЫ БОНДОО АМЖИЛТТАЙ ГАРГАЛАА
УИХ-ын чуулганы нэгдсэн хуралдаан эхэллээ
2024 онд 12 нэр төрлийн 600 дээжид туршилт шинжилгээ хийлээ
Дэлхийн аваргад оролцох жүдочид түрүүчээсээ Абу Дабиг зорилоо
АТГ: Авлигын эсрэг сургалтад 1765 иргэн, албан тушаалтныг хамруулав
Дэлхийн аварга М.Анхцэцэгийн олимпын эрх баталгаажав
С.ЧИНЗОРИГ ЭРҮҮЛ МЭНДИЙН САЛБАРЫГ, ХОЁР ОХИН НЬ БОЛОВСРОЛЫН ЗЭЭЛИЙН САНГ "ТОНОЖ" ДУУССАН
ШИЛДЭГ ДИПЛОМАТЧ ГЭХ ПИ АР НЬ АХАДСАН Б.БАТЦЭЦЭГ САЙД УЛСЫН ГАДААД ХАРИЛЦАА БИТГИЙ ХЭЛ ГЭРЭЭ, ХЭЛЭЛЦЭЭНИЙ ГАРЫН ҮСГИЙНХЭЭ УЧРЫГ МЭДДЭГГҮЙ ЮМ БАЙНА
УЛСЫГ Л.ОЮУН-ЭРДЭНЭ, УЛААНБААТАРЫГ Х.НЯМБААТАР БУЮУ ТОСГОНЫ АХ, ДҮҮСИЙН ТӨРИЙГ ТҮР БИШ БҮР ХААНЧЛАХ ТӨЛӨВЛӨГӨӨ
“МАНДУХАЙ ЦЭЦЭН ХАТАН”, “ЧИЛҮГЭН”, “СЭТГЭЛ”-ЭЭС АНИРДАХУЙ
ХӨГЖЛИЙН БАНКИЙГ "ДАМПУУРУУЛАЛЦСАН" ГУРВАЛЫН Г.АМАРТҮВШИН ЖИЙГДЭЖ, Х.ГАНХУЯГ, Г.ДАМДИННЯМ НАР НЭР ДЭВШИХЭЭР ЗЭХЭЖ БАЙНА
Д.СУМЪЯАБАЗАР СУГАРЧ, Ж.СҮХБААТАРААР ТУГ ТАХИХ НОГООН АВТОБУСНЫ СОНСГОЛ
Г.МОНГОЛЖИН: АЗИЙН АВАРГА ШАЛГАРУУЛАХ ТЭМЦЭЭНЭЭС МӨНГӨН МЕДАЛЬ ХҮРТСЭНДЭЭ БАЯРТАЙ БАЙНА
М.Бөхбат: Аав маань бүх л амьдралаа жүдод зориулсан хүн
ЦАГ АГААР: Улаанбаатарт өдөртөө 29 хэм дулаан байна
