НААДАМ: Соёлын сайд Ч.Номингийн хамтрагч 187 сая төгрөгөөр дрон нисгэж, Б.Баатар тайз, Х.Дамдинсүрэн сандал түрээслүүлжээ

Ц. АМУНДРА:
Эрэн сурвалжлах

2022-08-15, 2409

- НААДМЫН САНХҮҮЖИЛТИЙН 1.9 ТЭРБУМ ТӨГРӨГИЙГ МУГЖ Г.АМГАЛАНБААТАР ХУВИЙН ТӨРИЙН БУС БАЙГУУЛЛАГЫНХАА ДАНСААР АВЧЭЭ-

Халдварт тахлаас болж хөл хөөртэй наадалгүй хоёр жил өнжиж, “Цахим наадам” нэртэй нэг цагийн тоглолтыг цэнхэр дэлгэцээр үзэж “аргацаасан”. Тиймдээ ч энэ жил Ардын хувьсгалын түүхт 100 жилийн ойг нөхөж, 101 жилийн ойтой хавсарган хамтад нь хөрөнгө мөнгө харамлахгүй өргөн дэлгэр хийлээ. Соёлын яамнаас Ардын хувьсгалын 100, 101 жилийн ойн нээлт, хаалт, урлаг соёлын арга хэмжээнд 2.0 тэрбум гаруй төгрөг зарцуулсан гэж мэдэгдээд буй. Тэгвэл Үндэсний их баяр наадмын энэ мөнгөнөөс хэн хэн хувь хүртсэнийг танилцуулж байна.

НААДМЫН НЭЭЛТ, ХААЛТАД ЗАРЦУУЛАХ 1.9 ТЭРБУМ ТӨГРӨГИЙГ МУГЖ Г.АМГАЛАНБААТАРЫН ЭХНЭР, ХҮҮХЭДТЭЙГЭЭ ЭЗЭМШДЭГ “ГЭГЭЭН ЭГШИГТ ТЭНГЭР” ТББ-ЫН ДАНС РУУ ШИЛЖҮҮЛЖЭЭ

Эргэн сануулахад, 2019 оны наадам болон 2020, 2021 оны цахим наадмын санхүүжилт болох нийт 4.0 тэрбум төгрөгийг “Шинэ үеийн нэгдмэл залуус” ТББ-ын данс руу шилжүүлсэн нь илэрч, хэсэгтээ л хэл ам гарч байлаа. Тус Төрийн бус байгууллагыг УДЭТ-ын маркетингийн албанд ажилладаг З.Нямзул гэх залуу эзэмшдэг байж таарсан. Өөрөөр хэлбэл, Улсын драмын эрдмийн театрынхан жил бүрийн наадмын нээлт хаалтын арга хэмжээг дангаараа шахуу зохион байгуулдаг мөртөө санхүүжилтийг нь байгууллагынхаа дансаар бус хэн нэгний хувийн төрийн бус байгууллагаар авдаг нь анхаарал татдаг. Тэгвэл энэ жилийн наадмаар ч мөн тэр түүх давтагджээ.

Тодруулбал, Соёлын яамны харьяа Соёл урлагийн газраас “Гэгээн эгшигт тэнгэр” ТББ-ын данс руу “Үндэсний их баяр наадмын нээлт, хаалтын санхүүжилт” гэх утгаар 1.9 тэрбум төгрөг шилжүүлжээ. Ингэхдээ Соёлын сайдын А/188, Соёл урлагийн газрын даргын А/30 тоот тушаалаар эл гүйлгээг хийсэн гэж бүртгэжээ.

Тэгвэл “Гэгээн эгшигт тэнгэр” ТББ-ыг УДЭТ-ын жүжигчин, МУГЖ Г.Амгаланбаатар, түүний эхнэр Б.Оюунжаргал, түүний хүү А.Тэмүүлэн болон хадам дүү буюу Б.Оюунцэцэг, түүний нөхөр О.Түвшинжаргал нар эзэмшдэг аж. Тэд энэхүү төрийн бус байгууллагыг өнгөрсөн дөрөвдүгээр сарын 11-нд байгуулсан бөгөөд урлаг соёлын болон бусад төрлийн ямар нэг үйл ажиллагаа явуулж байгаагүй юм байна.

Хамгийн гол нь, "Гэгээн эгшигт тэнгэр" ТББ нь хувь хүний, гэр бүлийн эзэмшлийнх учраас Г.Амгаланбаатар өөрөө дансны хуулгаа нийтэд дэлгэдэггүй л юм бол наадмын санхүүжилтийн 1.9 тэрбум төгрөгөөс хэн рүү хэдэн сая төгрөг шилжүүлснийг нь мэдэх боломжгүй. Тэгэхээр наадмын ерөнхий найруулагч, продюсер тэргүүтэй гол зохион байгуулагчид нь хэдэн төгрөгийн цалин авсныг мэдэх аргагүй гэсэн үг. Хэрвээ энэ 1.9 тэрбум төгрөг Улсын драмын эрдмийн театрын дансаар орсон бол орлого, зарлагынхаа гүйлгээг буюу хэн рүү хэдэн сая төгрөг шилжүүлснээ шилэн дансандаа байршуулж тайлагнах шаардлагатай. Магад, тийм ч учраас Улсын драмын эрдмийн театрынхан жил бүрийн наадмын нээлт, хаалтын санхүүжилтийг хувь хүний төрийн бус байгууллагын дансаар авдаг байж болзошгүй.

Түүнчлэн, Г.Амгаланбаатар нь энэ жилийн Үндэсний их баяр наадмын нээлт, хаалтын үйл ажиллагааны Уран бүтээлчид хариуцсан менежер, продюсероор ажилласан. Гэтэл хачирхалтай нэг зүйл нь, наадмын өмнөхөн санхүүжилтийн асуудал үүсэх үед Соёлын сайд Ч.Номин тайлбар хийхдээ "Г.Амгаланбаатарыг наадмын зохион байгуулалтад ямар үүрэгтэй оролцож байгааг нь мэдэхгүй" гэж хэлж байсан байх юм. нь Тодруулбал, Г.Амгаланбаатар наадмын өмнөхөн “Төр засгаас 100, 101 жил гээд л сүржигнээд байх юм. Энэ жилийн төрийн наадмын нээлт стадионд болох нь худлаа боллоо шүү. Ард түмэн минь их юм хүлээгээд хэрэггүй шүү. Одоо болтол төрөөс шийдэгдсэн мөнгөнөөс ганц ширхэг хадаасны мөнгө ч орж ирээгүй байна. Ид шидтэн л биш бол амжихаа байлаа” хэмээн твиттер хаягаараа жиргэж байв.

Харин хариуд нь Соёлын сайд Ч.Номин “Тухайн жүжигчнийг наадмын зохион байгуулалтад ямар оролцоотой оролцож байгааг мэдэхгүй байна. Үндэсний баяр наадмын найруулагч, продюсеруудын хувьд ийм хариуцлагагүй юм ярихгүй байх. Учир нь төсвийн тодотголоос наадмын төсөвт 2.3 тэрбум төгрөг суусан байгаа. Эхний ээлжид наадмын уран бүтээлчдийн зардалд нэг тэрбум төгрөгийн шилжүүлсэн. Тиймээс хэн нэгэн дурын уран бүтээлчийн мэдээлэлд итгэж, наадам болохгүй юм байна гэх мэтээр төөрөгдөхгүй байхыг ард түмнээсээ хүсмээр байна” гэх тайлбар хийж байлаа. Өөрөөр хэлбэл, Соёлын сайд Ч.Номин “Г.Амгаланбаатарыг наадмын зохион байгуулалтад ямар оролцоотой оролцож буйг нь мэдэхгүй байна” гэх агуулгатай тайлбар хийж байсан мөртөө хувийн төрийн бус байгууллагынх нь данс руу наадмын нээлт, хаалтын санхүүжилтийг шилжүүлсэн болж таарч байна.

Тэгэхээр наадмын санхүүжилт зориулалтын дагуу зарцуулагдсан эсэхийг мэдэхийг хүсвэл "Гэгээн эгшигт тэнгэр" ТББ-ын дансны хуулгыг нийтэд ил болгохыг шаардах хэрэгтэй ажээ.

СОЁЛЫН ГАВЬЯАТ ЗҮТГЭЛТЭН, СОЁЛЫН ЭЛЧ Х.ДАМДИНСҮРЭН НААДМЫН ЕРӨНХИЙ ПРОДЮСЕРООР АЖИЛЛАХЫН САЦУУ ГУРВАН КОМПАНИАРАА 38 САЯ ТӨГРӨГ АВЧЭЭ

Энэ жилийн Үндэсний их баяр наадмын Ерөнхий продюсероор Соёлын гавьяат зүтгэлтэн, Соёлын элч Х.Дамдинсүрэн ажилласан. Өмнөх жилүүдэд буюу “Херо” Б.Баатар наадам найруулж байх үед Х.Дамдинсүрэн куратор найруулагчаар нь ажилладаг байв. Тэгвэл энэ жилийн наадмаар Х.Дамдинсүрэн өөрөө наадам продюсерлохын сацуу хувийн компаниудаараа ч наадмын төсвөөс “тоншиж” амжжээ.

Тодруулбал, Соёлын яамны харьяа Соёл урлагийн газраас:

- Хүндэтгэлийн тоглолтын дууны техникийг Соёлын элч Х.Хүрэлбаатар, түүний эхнэр МҮОНРТ-ийн Үндэсний зөвлөлийн гишүүн М.Уянга нарын эзэмшдэг “Ти Энд Ти Агниста” ХХК-иас 20 сая төгрөгөөр түрээслэжээ.

- Хүндэтгэлийн тоглолтын үзэгчдийн сандлыг Соёлын элч Х.Дамдинсүрэнгийн “Робомега” ХХК-иас 12 сая төгрөгөөр түрээслэжээ.

- Үндэсний их баяр наадмын брэнд танилцуулах арга хэмжээний лед дэлгэцийг Соёлын элч Х.Дамдинсүрэнгийн “Саунд оф монголиа” ХХК-иас 6.0 сая төгрөгөөр түрээслэжээ.

Сонирхуулахад, Соёлын элч Х.Дамдинсүрэнгийн төрсөн дүү Х.Жигжидсүрэн нь Соёлын яамны тендерүүдийг түүдгээрээ “зард” гарч байгаа бөгөөд одоогоор 7.1 тэрбум төгрөг аваад буй.

СОЁЛЫН САЙД Ч.НОМИНГИЙН БИЗНЕСИЙН ХАМТРАГЧ Ж.ЭНХЖАРГАЛАН 187 САЯ ТӨГРӨГӨӨР ДРОНЫ ҮЗҮҮЛБЭР ҮЗҮҮЛЖЭЭ

Ардын хувьсгалын 100, 101 жилийн ойн Үндэсний их баяр наадмын хөтөлбөрийн нэг хэсэг нь дроны үзүүлбэр, лазер шоу байсан. Тэгвэл наадмын дроны үзүүлбэрийг “Би Ар Би пикчерс” ХХК-иар 187 сая төгрөгөөр хийлгэжээ. Тэгвэл “Би Ар Би пикчерс” ХХК-ийг эзэмшигч Ж.Энхжаргалан нь Соёлын сайд Ч.Номингийн бизнесийн хамтрагчдын нэг. Тодруулбал, Соёлын сайд Ч.Номин, Ж.Энхжаргалан нар “Би Ар Би” ХХК-ийг 2017 онд хамтран үүсгэн байгуулж байсан. Өдгөө ч Ч.Номин, Ж.Энхжаргалан нар “Би Ар Би саунд” ХХК-ийг хамтран эзэмшдэг.

Сонирхуулахад, өнгөрсөн онд Засгийн газар, Харилцаа холбоо, мэдээллийн технологийн газар хамтран “Цахим үндэстэн” гэх шоу зохион байгуулсан нь “Цар тахлын оргил үед олон хүн цуглуулж, эрсдэлд орууллаа” хэмээн олны хэл аманд өртөж байсан. Тухайн үед “Би Ар Би” ХХК-ийнхан 500 сая төгрөгөөр дроны үзүүлбэр үзүүлсэн гэх мэдээлэл тарж байсан билээ.

ЕРӨНХИЙ САЙД Л.ОЮУН-ЭРДЭНЭ, ТҮҮНИЙ АХ Б.БААТАР НАРЫН “ХЕРО ЭНТЕРТАЙНМЕНТ” ХХК-ИАС 44 САЯ ТӨГРӨГӨӨР ТОГЛОЛТЫН ТАЙЗ ТҮРЭЭСЛЭЖЭЭ

Ардын хувьсгалын 100, 101 жилийн ойн Үндэсний их баяр наадмын нэг чухал хэсэг нь Хүндэтгэлийн тоглолт байсан. Энэ жилийн наадмын Хүндэтгэлийн тоглолтыг Сүхбаатарын талбайд нийтэд нээлттэйгээр зохион байгуулсан. Тэгвэл Үндэсний их баяр наадмын Хүндэтгэлийн тоглолтыг Үндэсний урлагийн их театрынхан 274 сая төгрөгөөр зохион байгуулжээ. Энэ мөнгөний ихэнх нь найруулагч, уран бүтээлчдийн цалин болон бичлэгийн зардалд зарцуулагдсан байна.

Тухайлбал, Хүндэтгэлийн тоглолтыг Х.Энхбат найруулсан бөгөөд 10 сая төгрөг, хөгжмийн зохиолчоор М.Бирваа ажиллаж мөн 10 сая төгрөгөөр цалинжжээ. Мөн Хүндэтгэлийн тоглолтод Үндэсний урлагийн их театрын дуучин, СТА Т.Өлзийсайхан 14 сая төгрөгөөр ардын дуу дуулж, ардын дууны цоморлиг бэлтгэх гэрээ үзэглэжээ.

Хамгийн сонирхолтой нь, Үндэсний урлагийн их театрынхан “Херо энтертайнмент” ХХК-иас 44 сая төгрөгөөр тоглолтын тайз түрээсэлжээ. “Херо энтертайнмент” ХХК-ийг Ерөнхий сайд Л.Оюун-Эрдэнэ, түүний төрсөн ах Б.Баатар нар 50, 50 хувь эзэмшдэг. Өөрөөр хэлбэл, Ардын хувьсгалын 100, 101 жилийн ойн зохион байгуулалтын санхүүжилтээс Ерөнхий сайд Л.Оюун-Эрдэнэ ч хувь хүртсэн болж таарах нь.

Сонирхуулахад, Ерөнхий сайд Л.Оюун-Эрдэнэ, түүний ах Б.Баатар нарын “Херо энтертайнмент” ХХК нь өнгөрсөн дөрөвдүгээр сараас хойш Улсын драмын эрдмийн театртай хамтран “Тамгагүй төр” жүжгийн олны хүртээл болгож буй. Тэгвэл Улсын драмын эрдмийн театрынхан Б.Баатарын өөрийнх нь “Херо энтертайнмент” ХХК-иас “Тамгагүй төр” жүжгийн тайзыг 60 сая төгрөгөөр түрээслэж авч, ашиглаж байгаа ажээ.

НААДАМ: Соёлын сайд Ч.Номингийн хамтрагч 187 сая төгрөгөөр дрон нисгэж, Б.Баатар тайз, Х.Дамдинсүрэн сандал түрээслүүлжээ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.